ಸಂಪಾದಕೀಯ್:
ಸುಸ್ಕಾರ್‍ಯಾಂ ಉಪ್ರಾಂತ್ಲಿ ಥಿರಾಸಾಣ್
ಮ್ಹಾಕಾ ಜಾಲ್ಲೊ ಅನ್ಭೋಗ್ ಆನ್ಯೇಕ್ಲ್ಯಾಕ್ ಜಾಂವ್ ಮ್ಹಳ್ಳೆಂ ಉದಾರ್ ಚಿಂತಪ್ ಘೆವ್ನ್ ಹಿ ಕವಿತಾ ಆಂಕ್ರೆಲ್ಯಾ. ವಿಷಯ್ ಹಾತಳ್ಳೆಲೆ ರಿತಿಕ್ ಲಾಗುನ್, ಹಿ ಕವಿತಾ ಮನಾಕ್, ಕಾಳ್ಜಾಕ್ ಥಂಡಾಯ್ ದಿತಾ. ಆಪ್ಣಾಕ್ ಜಾಲ್ಲ್ಯಾ ಅನ್ಭೋಗಾವರ್ವಿಂ, ಆಪ್ಣಾಚೆ ಪ್ರತಿಭೆಚಿ ತಾಂಕ್ ತೊ ಪಾರ್ಕುಂಕ್ ಸಕ್ಲಾ. ಆನಿ ಆತಾಂ ಆಪ್ಣಾವರ್ವಿಂ ಚ್ಯಾರ್ ಚೊವ್ಗಾಂಕ್ ಸುಖ್ ಲಾಭುಂದಿ ಮ್ಹಳ್ಳೆಂ 'ಪೊಸಿಟಿವ್' ಚಿಂತಪ್ ಘೆವ್ನ್ ತೊ ಕವಿತಾ ಲಿಖ್ತಾ.
ಮೆಲ್ವಿನ್ ಕೊಳಾಲ್ಗಿರಿ ಆಯ್ಲೆವಾರ್ ಕವಿತಾ ಶೆತಾಕ್ ಪಾವ್ಲಾಂ ದವರಲ್ಲೊ ಕವಿ. ಸುರ್‍ವಿಲ್ಯಾ ಥೊಡ್ಯಾ ಸುಸ್ಕಾರ್‍ಯಾಂ ಉಪ್ರಾಂತ್, ಹೆ ಕವಿತೆ ದ್ವಾರಿಂ ಆಪ್ಲ್ಯಾ ಪಾವ್ಲಾಂಚಿ ಥಿರಾಸಾಣ್ ಕಿತೆಂ ಮ್ಹಣುನ್ ಪಾಚಾರ್‍ಚ್ಯಾಂತ್ ತೊ ಯಶಸ್ವಿ ಜಾಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜಿ ಕವಿತಾ
ನಂಯ್ಚೆ ತಡಿಚೆಂ ಸಾಂಜೆ-ವಾರೆಂ
ಕಶೆಂ ಮ್ಹಾಕಾ ಇತ್ಲೆಂ ಥಂಡಾಯ್ ದಿತಾ?
ಕುಡಿಕ್ ಮ್ಹಜ್ಯಾ ಸ್ಪರ್ಶ್ ಸುಖ್ ದಿತಾ
ಕಾನಾಂನಿ ಮ್ಹಜ್ಯಾ ಕಿತೆಂಗಿ ಗುಣ್ಗುಣಾಯ್ತಾ.
ಹಾ...!
ಖಂಯ್ಸರ್-ಗಿ
ಖಂಯ್ ಥಾವ್ನ್-ಗಿ
ಎಕಾ ಕವಿನ್ ಭೊಗ್ಣಾಂ ಗುಂತುನ್
ಉಬಯಿಲ್ಲಿ ಏಕ್ ಕವಿತಾ ವಾರ್‍ಯಾರ್
ವ್ಹಾಳುನ್ ಮ್ಹಜೆಶಿಂ ಪಾವ್ಲಿ ಕಾಂಯ್?
******
ಕವಿತಾ...!
ಕವಿತಾ ಏಕ್ ಮ್ಹಜೆಶೀಂಯ್ ಆಸಾ
ಮ್ಹಜ್ಯಾಚ್ ಭೊಗ್ಣಾಂನಿ ಗುಂತಲ್ಲಿ
ಕೊಣಾಕಯ್ ಸಾಂಗುಂಕ್ ನಾತಲ್ಲಿ
ಕೊಣೇಂಯ್ ಯೆದೊಳ್ ಆಯ್ಕುಂಕ್ ನಾತಲ್ಲಿ
ಕವಿಕ್ ಸೊಡುನ್ ಹೆರಾಂಕ್ ಸಮ್ಜನಾತಲ್ಲಿ
ಹಾಂ...
ಹಾಂವ್‍ಯಿ ಮ್ಹಜಿ ಕವಿತಾ ವಾರ್‍ಯಾರ್ ಉಬಯ್ತಾಂ
ಉಬುಂದಿ ಮ್ಹಜಿ ಕವಿತಾ
ವ್ಹಾಳುಂದಿ ಮ್ಹಜಿ ಕವಿತಾ
ಖಂಯ್ಸರ್‌ಗಿ
ಖಂಯ್ಚ್ಯಾಯ್ ಎಕಾ ಕವಿಕ್ ವಚುನ್
ಪಾವುಂದಿ ಮ್ಹಜಿ ಕವಿತಾ
ಕವಿ ಮ್ಹಜಿ ಕವಿತಾ ಆಯ್ಕತಲೊ
ಕವಿತೆಚಿ ಥಂಡಾಯ್ ತೊ ಜೊಡ್ತಲೊ
ತೋಯ್ ಸ್ಪರ್ಶ್ ಸುಖ್ ಭೊಗ್ತಲೊ
ಕೊಣೇಂಯ್ ಸಮ್ಜುನ್ ಘೆನಾತ್ಲಿ ಮ್ಹಜಿ ಕವಿತಾ
ತೊ ಕವಿ ಪುಣಯ್ ಸಮ್ಜುನ್ ಘೆತಲೊ.
-ಮೆಲ್ವಿನ್, ಕೊಳಾಲ್ಗಿರಿ
संपादकीय:
सुसकाऱ्यां उपरांतली थिरासाण
म्हाका जाल्लो अनभोग आनयेकल्याक जांव म्हळ्ळें उदार चिंतप घेवन ही कविता आंकरेल्या. विषय हातळळेले रितीक लागून, ही कविता मनाक, काळजाक थंडाय दिता. आपणाक जाल्ल्या अनभोगावर्वीं, आपणाचे प्रतिभेची तांक तो पारकूंक सकला. आनी आतां आपणावर्वीं च्यार चोवगांक सुख लाभुंदी म्हळ्ळें पोसिटीव चिंतप घेवन तो कविता लिखता.
मेल्विन कोळालगिरी आयलेवार कविता शेताक पावलां दवरल्लो कवी. सुर्विल्या थोड्या सुसकाऱ्यां उपरांत, हे कविते द्वारीं आपल्या पावलांची थिरासाण कितें म्हणून पाचारच्यांत तो यशस्वी जाला.
-मेल्विन रोड्रीगस
कविता:
म्हजी कविता
नंयचे तडिचें सांजे-वारें
कशें म्हाका इतलें थंडाय दिता?
कुडीक म्हज्या स्पर्श सुख दिता
कानांनी म्हज्या कितेंगी गुणगुणायता.
हा...!
खंयसर-गी
खंय थावन-गी
एका कवीन भोगणां गुंतून
उबयिल्ली एक कविता वाऱ्यार
व्हाळून म्हजेशीं पावली कांय?
******
कविता...!
कविता एक म्हजेशींय आसा
म्हज्याच भोगणांनी गुंतल्ली
कोणाकय सांगूंक नातल्ली
कोणेंय येदोळ आयकूंक नातल्ली
कविक सोडून हेरांक समजनातल्ली
हां...
हांवयी म्हजी कविता वाऱ्यार उबयतां
उबुंदी म्हजी कविता
व्हाळुंदी म्हजी कविता
खंयसरगी
खंयच्याय एका कविक वचून
पावुंदी म्हजी कविता
कवी म्हजी कविता आयकतलो
कवितेची थंडाय तो जोडतलो
तोय स्पर्श सुख भोगतलो
कोणेंय समजून घेनातली म्हजी कविता
तो कवी पुणय समजून घेतलो.
-मेल्विन, कोळालगिरी