ಸಂಪಾದಕೀಯ್:
ದಾದ್ಲೆ, ಆಜಯ್ ಸ್ತ್ರೀಯಾಂಕ್ ಫಾತ್ರಾಂನಿ ಮಾರ್‍ತಾತ್ ಕಾಂಯ್?
ವ್ಯಭಿಚಾರಿ ಅಸ್ತುರೆಚಿ ಕಾಣಿ ಬೈಬಲಾಂತ್ಲಿ ಆಮಿ ಆಯ್ಕಲ್ಯಾ. ತೆ ಕಾಣಿಯೆಕ್ ಉಣೆ ತರೀ ದೋನ್ ಹಜಾರ್ ವರ್ಸಾಂಚೊ ಇತಿಹಾಸ್ ಆಸಾ. ಹೆ ಕಾಣಿಯೆಂತ್ ಏಕ್ ವಿಚಾರ್‌ಧಾರಾ ಆಸಾ, ತತ್ವಗಿನ್ಯಾನ್ ಲಿಪ್ಲಾಂ. ಹೆ ಕಾಣಿಯೆಂತ್ಲೊ ಭಾವಾರ್ಥ್ ನವ್ಯಾ ಯುಗಾಂತ್ಲ್ಯಾ ಸಂದರ್ಭಾಂತ್ ಜಾಣಾ ಜಾಂವ್ಚೆಂ ಏಕ್ ಪ್ರೇತನ್ ಕವಿ ಪ್ರಕಾಶ್ ಪಾಡ್ಗಾಂವ್ಕಾರ್ ಹಾಣೆ ಹೆ ಕವಿತೆ ಮಾರಿಫಾತ್ ಕೆಲಾಂ.
ದೋನ್ ಹಜಾರ್ ವರ್ಸಾಂ ಆದಿಂ ಜೆಜುನ್ ತಿಕಾ ರಾಕ್ಚೆಂ ಪಡ್ಲೆಂ. ಆಜ್ ತಿಣೆ ಕಾಂಯ್ ಧೈರ್ ಆಪ್ಣಾಯ್ಲಾಂ? ಫಾತರ್ ಮಾರುಂಕ್ ಸೊಧ್ಚ್ಯಾ ದಾದ್ಲ್ಯಾಂಕ್, ತಾಂಣಿ ಉಡೊಂವ್ಚ್ಯಾ ಪಯ್ಲೆಂ, ಫಾತ್ರಾಂನಿ ಆಪುಣ್ ಜಾವ್ನ್ ಚೆಂಚಾಂವ್ಕ್ ಫುಡೆಂ ಸರ್‍ಚೆಂ ಧೈರ್ ತಿಣೆಂ ಕಾಂಯ್ ಆಪ್ಣಾಯ್ಲಾಂ?
ಹಿಂ ಸವಾಲಾಂ! ಜಾಪಿ ಆಮಿಂಚ್ ಸೊಧುನ್ ಕಾಡುಂಕ್ ಜಾಯ್. ಆಜೂನ್ ಜೆಜುಚಿ ಗರ್ಜ್ ಆಸಾ ಕಾಂಯ್ ಮ್ಹಳ್ಳೆಂ ಚಿಂತುನ್ ಪಳೆಂವ್ಕ್ ಜಾಯ್!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅಸ್ತುರಿ ವ್ಯಭಿಚಾರಿ
ವ್ಯಭಿಚಾರಿ ಅಸ್ತುರೆಚೆರ್
ಫಾತರ್ ಮಾರ್‌ಪ್ಯಾಂಕ್ ಲೆಖೂನ್
ಜೆಜೂನ್ ಮ್ಹಣಿಲ್ಲೆಂ:
ಜಾಣೆಂ ಕೊಣೆಂ
ತೆ ಅಸ್ತುರಿ ಭಶೆನ್
ಕೆನ್ನಾಚ್ ಕಸಲೆಂಚ್
ಪಾತಕ್ ಕರೂಂಕ್ ನಾ
ತಾಣೆಂ ತಿಚೆರ್
ಪಯ್ಲೊ ಫಾತರ್ ಮಾರ್‍ಚೊ
ಆಯ್ಕೂನ್ ಉತ್ರಾಂ ಜೆಜುಚಿಂ
ಗಳ್ಸಣ್ಲೆ ಹಾತ್ ಸಗ್ಳ್ಯಾಂಚೆ
ಅಚಳಯ್ ಪಡ್ಲೆ ಸಕಯ್ಲ್
ಫಾತರ್ ತಾಂಚ್ಯಾ ಹಾತಾಂತ್ಲೆ
ಹೊ ದೆಖಾವ್ ಪಳೊವ್ನ್
ಆಪ್ಲ್ಯಾ ವಿಚಾರಾಂನಿ
ಮೌನ್ ಜಾಲ್ಲ್ಯಾ ಜೆಜೂನ್
ತೆನ್ನಾ ಯೆವ್ಜಿಲ್ಲೆಂ ಕಾಯ್?:
ಮನೀಸ್ ಜಿಣೆಚೆ
ಕಾಳ್ ಪರ್ವಾಂಚೆ ಅಧ್ಯಾಯ್
ಉಲ್ಗಡೂನ್ ಸ್ಪಷ್ಟ್ ಜಾತನಾ
ಫುಡೆಂ ಕೆನ್ನಾ ತರೀ
ಹೀಚ್ ವ್ಯಭಿಚಾರಿ ಅಸ್ತುರಿ
ಹಾತಾಂತ್ ಫಾತರ್ ಘೆವ್ನ್
ದಿತಲಿ ಮ್ಹಣೂನ್ ಆಹ್ವಾನ್
ಸಗ್ಳ್ಯಾ ದಾದ್ಲ್ಯಾಂಕ್
ಭರ್ ತಿಠ್ಯಾರ್
ಉಬಿ ರಾವ್ನ್?
-ಪ್ರಕಾಶ್ ಪಾಡ್ಗಾಂವ್ಕಾರ್
संपादकीय:
दादले, आजय स्त्रीयांक फात्रांनी मारतात कांय?
व्यभिचारी अस्तुरेची काणी बैबलांतली आमी आयकल्या. ते काणियेक उणे तरी दोन हजार वर्सांचो इतिहास आसा. हे काणियेंत एक विचारधारा आसा, तत्वगिन्यान लिपलां. हे काणियेंतलो भावार्थ नव्या युगांतल्या संदर्भांत जाणा जांवचें एक प्रेतन कवी प्रकाश पाडगांवकार हाणे हे कविते मारिफात केलां.
दोन हजार वर्सां आदीं जेजून तिका राकचें पडलें. आज तिणे कांय धैर आपणायलां? फातर मारूंक सोधच्या दादल्यांक, तांणी उडोंवच्या पयलें, फात्रांनी आपुण जावन चेंचावंक फुडें सरचें धैर तिणें कांय आपणायलां?
हीं सवालां ! जापी आमींच सोधून काडूंक जाय. आजून जेजुची गर्ज आसा कांय म्हळ्ळें चिंतून पळेवंक जाय!
-मेल्विन रोड्रीगस
अस्तुरी व्यभिचारी
व्यभिचारी अस्तुरेचेर
फातर मारप्यांक लेखून
जेजून म्हणिल्लें:
जाणें कोणें
ते अस्तुरी भशेन
केन्नाच कसलेंच
पातक करूंक ना
ताणें तिचेर
पयलो फातर मारचो
आयकून उत्रां जेजुचीं
गळसणले हात सगळ्यांचे
अचळय पडले सकयल
फातर तांच्या हातांतले
हो देखाव पळोवन
आपल्या विचारांनी
मौन जाल्ल्या जेजून
तेन्ना येवजिल्लें काय?:
मनीस जिणेचे
काळ परवांचे अध्याय
उलगडून स्पष्ट जातना
फुडें केन्ना तरी
हीच व्यभिचारी अस्तुरी
हातांत फातर घेवन
दितली म्हणून आहवान
सगळ्या दादल्यांक
भर तिठ्यार
उबी रावन?
-प्रकाश पाडगांवकार