ಸಂಪಾದಕೀಯ್:

ಪಾಟೀಕ್ ಪಾಟ್ ಕರ್ನ್ ರಾವಲ್ಲೆ ಗಾಂಧಿ

ಕಾಳ್ಜಾಕ್ ಹಲ್ಕಂದಾವ್ನ್ ಸೊಡ್ಚಿ ಗಜಾಲ್ ಏಕ್ ಹೆ ಕವಿತೆದ್ವಾರಿಂ ಅನಿಲ್ ಬೈಂದೂರಾನ್ ಆಮ್ಚ್ಯಾ ಮುಖಾರ್ ದವರ್‍ಲ್ಯಾ. ಗಾಂಧಿ ಅಹಿಂಸೆಚೊ ಸಂಕೇತ್ ಮಾತ್ರ್ ನ್ಹಯ್, ಅಹಿಂಸೆನ್ ಕಾಳ್ಜಾಂ ಜಿಕಲ್ಲೊ ಮ್ಹಾನ್ ವ್ಯಕ್ತಿ. ಆಸಲ್ಲೆ ತರ್ ತಾಚೆ ಮುಖಾರ್ ಮಾರ್ಕ್ಸ್, ಜೆಜು ಆನಿ ಬುದ್ಧ ಸೈತ್ ಖಾಲ್ತಿಮಾನ್ ಘಾಲ್ತೆ. ಆಮ್ಚೆ ಧರ್ತೆರ್ ಆಮ್ಚ್ಯಾಚ್ ಕಾಳಾರ್ ಅಸಲೊ ಎಕ್ಲೊ ರಗ್ತಾ ಮಾಸಾಚೊ ಮನೀಸ್ ಚಲುನ್ ಗೆಲಾ ತೆಂ ಚಿಂತುಂಕ್ ಜಾಯ್ನಾ ಮ್ಹಣುನ್ ಗಾಂಧಿವಿಶಿಂ ಐನ್‌ಸ್ಟೈನ್ ಉದ್ಗಾರಲ್ಲೊ.

ಗಾಂಧಿಚ್ಯಾ ಮರ್ಣಾನಂತರ್ ತೊ ನೊಟಾಂನಿ ಘುಸ್ಲೊ. ಪುಣ್ ಹೆ ನೋಟ್ ಕಿತ್ಯಾ ಖಾತೀರ್ ವಾಪರ್ ಜಾತಾತ್? ಹಿಂಸೆ ಖಾತೀರ್, ಆಕಾಂತ್‍ವಾದಾಖಾತೀರ್, ವ್ಯಭಿಚಾರಾ ಖಾತೀರ್, ಏಕ್ ಪಾವ್ಟಿಂ ಆಮಿ ಆಮ್ಚೆಂ ಧ್ಯಾನ್ ಸಗ್ಳೆಂ ಹ್ಯಾ ವಿಷಯಾಚೆರ್ ದೀವ್ನ್ ಚಿಂತುಂಕ್ ಲಾಗ್ಲ್ಯಾಂವ್ ತರ್, ಆಮ್ಕಾಂ ಥರ್ಥರೆ ಸುಟ್ತಲೆ.

ಎಕ್ಲೊ ಗಾಂಧಿ ಹೆ ಧರ್ತೆರ್ ಜಿಯೆಲ್ಲೊ. ಆನ್ಯೇಕ್ಲೊ ಗಾಂಧಿ ನೊಟಾಂ ವಯ್ಲೊ. ಗಾಂಧಿ ಆನಿ ಗಾಂಧಿ - ಪಾಟೀಕ್ ಪಾಟ್ ಕರ್‍ನ್ ರಾವ್ಲ್ಯಾತ್.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

ಗಾಂಧಿ VS ಗಾಂಧಿ

ಗೋಡ್ಸೆಚೊ ದ್ವೇಶಾಚೊ ಗುಳೊ
ಅಹಿಂಸಾವಾದಿಚಿಂ ಮಾಸಾಂ
ಚಿರುನ್ ಘುಸ್ತಾನಾ
ಹೇ ರಾಮ್ ಉಬುನ್ ಗೆಲೊ ಪ್ರಾಣ್
ಮನ್ಶಾ ತುಲನ್ ಕಾಗ್ದಾ ಧನ್
ಮಹಾತ್ಮಾ ವಿರೋಧ್ ಮನ್ಶಾನ್ ರಚ್ಲೊ
ಕಾಗ್ದಾ ಮೂಲ್ಯ್ ಗಾಂಧಿ
ಉಗಡ್ನ್ ತೋಂಡ್
ದೊಳೆ ಆನಿ ಕಾನ್ ...

ತಾಂಬ್ಡೆ ಗಲ್ಲೆಂತ್ ನಿಳ್ಶೆ ನರ್ಕಾತಾ
ರಾಂಡುಳ್ ಎಕ್ಲೆಂ ಹರ್ಧೆಂ ಫುಲೊವ್ನ್ 
ನಾಗ್ಡೆ ಕುಡಿರ್ ನಶಾ ಗಳಯ್ತಾ
ವೊಂಟಾ ಖಾಂಚಿಯೆಂತ್ ವೋಂಟ್ ಮೆಳೊವ್ನ್ 
ಬಾಜ್ವೆ ಭಿತರ್‍ಲೆ ಉಬೆಂತ್ ಫುಗಲ್ಲೊ
ಪಾಂಯ್ಶಾಂಚೊ ನಿಳ್ಸೊ ಗಾಂಧಿ
ಪೊಜ್ಡೆಪಣ್ ಕಾಗ್ದಾ ಕರ್ನೆಚಿ
ದೊಳೆ ಆಬ್ಳೆವ್ನ್ ಪಳೆತಾ.

ಮೊಟ್ಯಾ ಬಟ್ವ್ಯಾಂತ್ಲ್ಯಾನ್ ಗತ್ತಾನ್ ಸುಟಲ್ಲೊ
ಪನ್ನಾಸಾಂಚೊ ಬಾಪು
ಭಿಕಾರ್‍ಯಾಚ್ಯಾ ರಿತ್ಯಾ ಕೊಪಾಂತ್
ಬೊಣಿಯೇನ್ ಬಸ್ಲೊ
ಕಾನಾಕ್  ಬಾವ್ಡ್ಯಾಚ್ಯಾ  ಝಣ್-ಝಣುಂಕ್ ಜಾಯ್
ಚಿಲ್ಲರ್ ಪಾವ್ಲ್ಯೊ ಕೊಪಾಂತ್ ನಾಚಯ್
ಲಾಕ್ ಜಮಯ್ಲೊ ಉಲ್ಲಾಸ್ ತೊಂಡಾರ್
ಕಾಗ್ದಾ-ಬಾಪುಚ್ಯಾ ಮಾತ್ಯಾರ್
ಲಕವ್ನ್ ಲಕವ್ನ್ ನಾಚ್ತಾ
ಆಣ್ಯಾಚಿ ಜಡಾಯ್.

ಅನಾಥ್ ಘರಾ, ದುಬ್ಳ್ಯಾಂಚಿಂ ದಾರಾಂ ಸೊಡ್ನ್
ದೈವಿಕ್ ರಾವ್ಳೆರಾ ತೆವ್ಶಿನ್ ಧಾಂವ್ಲ್ಯಾತ್
ದಾಟ್ ಆಟ್ಟ್ಯಾಂನಿ ಲಿಪುನ್ ಗಾಂಧಿ ಕರ್ಕರಿತ್
ತೆಂಪ್ಲಾಂತ್ಲ್ಯಾ ದೆವಾಕ್ ಧಾಂವ್ಡಾವ್ನ್
ಆಲ್ತಾರಿರ್  ಚಡ್ತಾತ್
ವ್ಹಾಳೊವ್ನ್ ಧನ್ ಮೊಲಾವ್ನ್ ಮಾನ್

ಹಿಂಸೆಚ್ಯಾ ಹಲ್ಲ್ಯಾಕ್ ಹಾಸುನ್ ಹಾಸುನ್ 
ವಿಕುನ್ ವೆತಾ
ಅಹಿಂಸೆಚೊ ವಾದಿ
ಅನ್ ಉದಕ್ ಸೊಡ್ನ್ ಹರ್‍ತಾಳ್ ಧರಲ್ಲೊ
ದುಬ್ಳ್ಯಾಚ್ಯಾ ಗ್ರಾಸಾಕ್ ಘಾಸ್ ಮಾರ್‍ತಾ
ಗಾಂಧಿ VS  ಗಾಂಧಿ

-ಅನಿಲ್ ಬೈಂದೂರ್

संपादकीय:

फाटीक फाट करन रावल्ले गांधी

काळजाक हल्कदांवन सोडची गजाल एक हे कवितेद्वारीं अनील बैंदूरान आमच्या मुखार दवरल्या. गांधी अहिंसेचो संकेत मात्र न्हय, अहिंसेन काळजां जिकल्लो म्हान व्यक्ती. आसल्ले तर ताचे मुखार मार्क्स, जेजू आनी बुद्ध सैत खालतिमान घालते. आमचे धरतेर आमच्याच काळार असलो एकलो रगता मासाचो मनीस चलून गेला तें चिंतूंक जायना म्हणून गांधिविशीं ऐनस्टैन उद्गारल्लो.

गांधिच्या मरणानंतर तो नोटांनी घुसलो. पुण हे नोट कित्या खातीर वापर जातात? हिंसे खातीर, आकांतवादाखातीर, व्यभिचारा खातीर, एक फावटीं आमी आमचें ध्यान सगळें ह्या विषयाचेर दीवन चिंतूंक लागल्यांव तर, आमकां थरथरे सुटतले.

एकलो गांधी हे धरतेर जियेल्लो. आन्येकलो गांधी नोटां वयलो. गांधी आनी गांधी - फाटीक फाट करन रावल्यात.

-मेल्विन रोड्रीगस

कविता:

गांधी vs गांधी

गोडसेचो द्वेशाचो गुळो
अहिंसावादिचीं मासां
चिरून घुसताना
हे राम उबून गेलो प्राण
मनशा तुलन कागदा धन
महात्मा विरोध मनशान रचलो
कागदा मूल्य गांधी
उगडन तोंड
दोळे आनी कान ...

तांबडे गल्लेंत निळशे नरकाता
रांडूळ एकलें हर्धें फुलोवन
नागडे कुडीर नशा गळयता
वोंटा खांचियेंत वोंट मेळोवन
बाजवे भितरले उबेंत फुगल्लो
पांयशांचो निळसो गांधी
पोजडेपण कागदा करनेची
दोळे आबळेवन पळेता.

मोट्या बटव्यांतल्यान गत्तान सुटल्लो
पन्नासांचो बापू
भिकाऱ्याच्या रित्या कोपांत
बोणियेन बसलो
कानाक बावड्याच्या झण-झणूंक जाय
चिल्लर पावल्यो कोपांत नाचय
लाक जमयलो उल्लास तोंडार
कागदा-बापुच्या मात्यार
लकवन लकवन नाचता
आण्याची जडाय.

अनाथ घरा, दुबळ्यांचीं दारां सोडन
दैवीक रावळेरा तेवशीन धांवल्यात
दाट आट्ट्यांनी लिपून गांधी करकरीत
तेंपलांतल्या देवाक धांवडावन
आलतारीर चडतात
व्हाळोवन धन मोलावन मान

हिंसेच्या हल्ल्याक हासून हासून
विकून वेता
अहिंसेचो वादी
अन उदक सोडन हरताळ धरल्लो
दुबळ्याच्या ग्रासाक घास मारता
गांधी vs गांधी

-अनील बैंदूर