ಸಂಪಾದಕೀಯ್:
ಸಕ್ಕಡ್ ಸಾಂಗಾತಾ ಮೆಳುನ್ ಗಜ್ಡಿ ಜಾಂವ್ಚಿಂ ಫುಲಾಂ
ಫುಲಾಂಚೆ ದಾಲಿಯೆಂತ್ ದರೆಕಾ ಫುಲಾಕ್ ಆಪ್ಲೆಂಚ್ ಸ್ಥಾನ್ ಆಸಾ, ಸುವಾತ್ ಆಸಾ. ಪುಣ್ ತೆ ದಾಲಿಯೆಂತ್ ಹೆರ್ ಫುಲಾಂ ನಾಂತ್ ತರ್ ತೆಂ ಸ್ಥಾನ್ ಭೆಶ್ಟೆಂ ವ್ಯರ್ಥ್ ಜಾತಾ. ದರೆಕಾ ಫುಲಾನ್ ತಾಂಚ್ಯಾ ತಾಂಚ್ಯಾ ಜಾಗ್ಯಾರ್ ಸಜೊವ್ನ್ ರಾವ್ಲ್ಯಾರ್ ದಾಲಿ ಸೊಬ್ತಾ. ಹ್ಯೆ ಸೊಬಾಯೆಚೆ ದಾಲಿಯೆಂತ್ ಜಿಡ್ಡೆ ಫುಲಾಂ ಸಹಜ್ ಜಾವ್ನ್ ಪೊಂದಾ ಆಸ್ತಾತ್. ಸಕಯ್ಲ್ ವಾ ಪೊಂದಾ ರಾಂವ್ಚೆಂ ಮ್ಹಳ್ಳ್ಯಾಫಾರಾ ಸ್ಥಾನ್ಮಾನ್ ಆನಿ ಆದರ್ ನಾತಲ್ಲೆಂ ಮ್ಹಣುನ್ ಅರ್ಥ್ ನ್ಹಯ್. ಮಾತೀಯ್ ಸಕಯ್ಲ್ ಆಸಾ, ಪಾಳಾಂಯ್ ಪೊಂದಾ ಆಸ್ತಾತ್. ಉದ್ಕಾಝರ್ ಬಾಂಯ್ಚ್ಯಾ ಥಳಾಂತ್ ಫುಟ್ತಾ. ಕಣ್ಗಿ ಮಾತ್ಯೆಪೊಂದಾ ಆಸ್ತಾ ತರ್ ನಾರ್ಲ್ ಮಾಡಾತುದಿಯೆರ್ ಆಸ್ತಾ. ಪುಣ್ ಮಾಡಾಚೆಂ ಆನಿ ದರೆಕಾ ಝಾಡಾಚೆಂ ಉಗಮ್ ಪೊಂದ್ಲ್ಯಾನ್ ಜಾತಾ. ಹರ್ಯೆಕೆ ರಚ್ನೆಕ್ ತಾಚೆಂಚ್ ಮ್ಹಳ್ಳೆಂ ಸ್ಥಾನ್ ಆನಿ ಕಾಮ್ ಆಸಾ. ಕೆದ್ನಾಂ ಮನೀಸ್ ಹೆಂ ಸಮ್ಜುನ್ ಘೆತಾ, ತೆದ್ನಾ ಸಂಸಾರಾಂತ್ಲ್ಯಾ ಹರ್ ರಚ್ನೆಕ್ ಆನಿ ತಾಂಚ್ಯಾ ಸ್ಥಾನಾಕ್ ಆನಿ ವಾವ್ರಾಕ್ ಗವ್ರವಾನ್ ಲೆಕ್ತಾ ಆನಿ ಮಾನ್ತಾ. ಪುಣ್ ಮನ್ಶಾಚ್ಯಾ ನಂಜಿ ಸ್ವಭಾವಾನ್ ಸಕಯ್ಲ್ ಆಸಲ್ಲ್ಯಾಂಕ್ ಹಲ್ಕ್ ಕರುನ್ ಲೆಕ್ಚೆಂ ಕವಿಕ್ ಸೊಸುಂಕ್ ಜಾಯ್ನಾ. ಕೋಯ್ರ್ ಉಡೊಂವ್ಚೊ ಮನೀಸ್ ಕೋಯ್ರ್ ವಿಂಚ್ತೆಲ್ಯಾಕ್ ಲ್ಹಾನ್ ಕರುನ್ ಪಳೆತಾ ತರ್ ತೊಚ್ ಲ್ಹಾನ್ ಅಶೀರ್ ಮನಾಚೊ ಮ್ಹಣ್ ಅರ್ಥ್.
ಸಗ್ಳ್ಯಾಂಕ್ ನ್ಯಾಯ್ ಆನಿ ಸಮಾನ್ ಹಕ್ಕಾಂ ಆಸ್ಚಿ ಸಮಾಜ್, ಸಗ್ಳ್ಯಾಂಕ್ ಆದರ್ ಆನಿ ಮೊಗಾನ್ ವಾಗ್ಚಿ ಸಮಾಜ್ ಸೊಬಿತ್ ಆನಿ ಜಿವಾಳ್ ಆಸ್ತಾ. ಹಾಂಗಾ, ಜಿಡ್ಡೆ ನಾತಲ್ಲೆ ಪೊಕೊಳ್ ದಾಲಿಯೆಚೆಂ ಪ್ರಭಾವಿಕ್ ಚಿತ್ರಣ್ ದೀವ್ನ್ ಕವಿ ರೋಶುನ್ ಸಾಮಾಜಿಕ್ ಅನ್ಯಾಯ್, ಜುಲೂಮ್ ಆನಿ ಅಸಮಾನತಾಯೆ ವಿರೋಧ್ ಆಪ್ಲೊ ರಾಗ್ ವ್ಯಕ್ತ್ ಕೆಲಾ.
-ಆಂಡ್ರ್ಯೂ ಎಲ್. ಡಿಕುನ್ಹಾ
ಕವಿತಾ
ಜಿಡ್ಡೆ ಫುಲಾಂ
ಆಮಿ ಜಿಡ್ಡೆ ಫುಲಾಂ
ಘನಾಚಿಂ ಆನಿ ಮಾನಾಚಿಂ ಫುಲಾಂ
ತಕ್ಲಿ ಉಕಲ್ನ್ ರಾಂವ್ಚ್ಯಾಕ್
ಆಧಾರ್ ಜಾವ್ನ್
ಆಮ್ಕಾಂ ದಾಲಿಯೆಂತ್
ಚಿಡ್ಡುನ್ ದವರ್ಲಾಂ.
ಆಮಿ ಜಿಡ್ಡೆ ಫುಲಾಂ
ವಿಂಚುನ್ ಕಾಡ್ಲ್ಲ್ಯಾ ಫುಲಾಂಕ್
ಬೊಟಾಂನಿ ಆಲ್ತಾರಿರ್ ಚಡೊಂವ್ಚ್ಯಾಕ್
ಹೊಗ್ಳಿಕೆಚ್ಯಾ ನಿಬಾನ್
ಆಮ್ಕಾಂ ಮುಟಿಂನಿ ಅಂರ್ದುನ್
ಧರ್ಣಿರ್ ಶಿಂಪ್ಡಾಯ್ಲಾಂ.
ಆಮಿ ಜಿಡ್ಡೆ ಫುಲಾಂ
ನಾಂವಾಡ್ದಿಕ್ ಮ್ಹಣ್ ವೊಲಾಯಿಲ್ಲಿಂ ಫುಲಾಂ
ಹೆರಾಂಕ್ ದಿಸ್ಚ್ಯಾಕ್
ತಾಂಚ್ಯಾ ಹಾಜರ್ಪಣಾಕ್
ಆಮ್ಚೆಂ ಅಸ್ತಿತ್ವ್ಚ್
ಲಿಪೊನ್ ಸೊಡ್ಲಾಂ.
ಆಮಿ ಜಿಡ್ಡೆ ಫುಲಾಂ
ಸುಂದರ್ ರಂಗಾಳ್ ಫುಲಾಂ
ವರ್ಸ್ಭರ್ ವೊಡ್ತಾಂತ್ ಸೊಭ್ಚ್ಯಾಕ್
ಕಾರ್ಯೆಂ ಜಾಲ್ಲೆಂಚ್
ಆಮ್ಕಾಂ ಪಾಳಾಂ ಸಮೇತ್ ಹುಮ್ಟುನ್
ಕೊನ್ಶಾಕ್ ಉಡಯ್ಲಾಂ.
ಆಮಿ
ಹೆರಾಂಕ್ ವಾಡೊಂವ್ಕ್ ಜಾಗೊ ಸಾಂಡ್ಲ್ಲಿಂ
ಆಲ್ತಾರಿರ್ ಚಡೊಂವ್ಕ್ ಧರ್ಣಿರ್ ಶೆವ್ಟಾಲ್ಲಿಂ
ಮಾನಾನ್ ಚಲ್ಚ್ಯಾಕ್ ಪೊಂದಾ ಪಡ್ಲ್ಲಿಂ
ಹೆರಾಂಕ್ ಸೊಭ್ಚ್ಯಾಕ್ ಲಿಪೊನ್ ಗೆಲ್ಲಿಂ
ಜಿಡ್ಡೆ ಫುಲಾಂ.
ಆಮಿ ನಾತ್ಲ್ಲ್ಯಾನ್ಚ್ ಜಾಯ್ಜೆ
ದಾಲಿಯಾಂನಿ ಕುಸ್ಚೆಂ
ತುಮ್ಚೆಂ ಅಶೀರ್ ಮನ್ ಆನಿ ಪೊಕೊಳ್ಪಣ್
ಆಜ್ ಉಗ್ತ್ಯಾನ್ ದಿಸ್ಲಾಂ.
-ರೋಶು ಬಜ್ಪೆ
संपादकीय:
सक्कड सांगाता मेळून गजडी जांवचीं फुलां
फुलांचे दालयेंत दरेका फुलाक आपलेंच स्थान आसा, सुवात आसा. पूण ते दालयेंत हेर फुलां नांत तर तें स्थान भेश्टें व्यर्थ जाता. दरेका फुलान तांच्या तांच्या जाग्यार सजोवन रावल्यार दाली सोबता. ह्ये सोबायेचे दालयेंत जिड्डे फुलां सहज जावन पोंदा आसतात. सकयल वा पोंदा रांवचें म्हळ्ळ्याफारा स्थानमान आनी आदर नातल्लें म्हणून अर्थ न्हय. मातीय सकयल आसा, पाळांय पोंदा आसतात. उदका झर बांयच्या थळांत फुटता. कणगी मातयेपोंदा आसता तर नार्ल माडातुदयेर आसता. पूण माडाचें आनी दरेका झाडाचें उगम पोंदल्यान जाता. हरयेके रचनेक ताचेंच म्हळ्ळें स्थान आनी काम आसा. केदनां मनीस हें समजून घेता, तेदना संसारांतल्या हर रचनेक आनी तांच्या स्थानाक आनी वावराक गवरावान लेकता आनी मानता. पूण मनशाच्या नंजी स्वभावान सकयल आसल्ल्यांक हल्क करून लेकचें कवीक सोसुंक जायना. कोयर उडोंवचो मनीस कोयर विंचतेल्याक ल्हान करून पळेता तर तोच ल्हान अशीर मनाचो म्हण अर्थ.
सगळ्यांक न्याय आनी समान हक्कां आसची समाज, सगळ्यांक आदर आनी मोगान वागची समाज सोबीत आनी जिवाळ आसता. हांगा, जिड्डे नातल्ले पोकोळ दालयेचें प्रभावीक चित्रण दीवन कवी रोशून सामाजीक अन्याय, जुलूम आनी असमानताये विरोध आपलो राग व्यक्त केला.
-आंड्र्यू एल. डिकुन्हा
कविता
जिड्डे फुलां
आमी जिड्डे फुलां
घनाचीं आनी मानाचीं फुलां
तकली उकलन रांवच्याक
आधार जावन
आमकां दालियेंत
चिड्डून दवर्लां.
आमी जिड्डे फुलां
विंचून काडल्ल्या फुलांक
बोटांनी आल्तारीर चडोंवच्याक
होगळिकेच्या निबान
आमकां मुटिंनी अंर्दून
धर्णीर शिंपडायलां.
आमी जिड्डे फुलां
नांवाडदीक म्हण वोलायिल्लीं फुलां
हेरांक दिसच्याक
तांच्या हाजर्पणाक
आमचें असतित्वच
लिपोन सोडलां.
आमी जिड्डे फुलां
सुंदर रंगाळ फुलां
वर्सभर वोडतांत सोभच्याक
काऱ्यें जाल्लेंच
आमकां पाळां समेत हुमटून
कोनशाक उडयलां.
आमी
हेरांक वाडोवंक जागो सांडल्लीं
आल्तारीर चडोवंक धर्णीर शेवटाल्लीं
मानान चल्च्याक पोंदा पडल्लीं
हेरांक सोभच्याक लिपोन गेल्लीं
जिड्डे फुलां.
आमी नातल्ल्यानच जायजे
दालियांनी कुसचें
तुमचें अशीर मन आनी पोकोळपण
आज उग्त्यान दिसलां.
-रोशू बजपे