ಸಂಪಾದಕೀಯ್:
ಮೆಜಾಮುಳಿಂ ಶಿಂಪ್ಡಾಲ್ಲೆ ಕಾಳ್ಜಾ ಕುಡ್ಕೆ....
ಮನ್ಶಾಪಣಾನ್ ಭರಲ್ಲಿಂ ಭೊಗ್ಣಾಂ ಮನ್ಶಾಂಲಾಗಿಂ ಆಸಲ್ಲಿಂ ತರ್ ಬ್ರೆಡ್ಡ್ ಹಾಡ್ತಾಂ ಮ್ಹಣ್ ಗೆಲ್ಲೊ ಪಾಟಿಂ ಯೆತೊ. ಪುಣ್ ನಾ! ಮನ್ಶಾಭಿತರ್ ಮನ್ಶಾಪಣಾಚೆಂ ಪ್ರಮಾಣ್ ಥಳಾಕ್ ದೆಂವುನ್ ಮನಿಸ್ ಕಠೋರ್ ಜಾಲಾ ಆಸ್ತಾಂ ಬ್ರೆಡ್ಡ್ ಹಾಡ್ತಾಂ ಮ್ಹಣ್ ಗೆಲ್ಲೊ ಪಾಟಿಂ ಯೆತಾ ಮ್ಹಣ್ ಸಾಂಗುಂಕ್ ಜಾಯ್ನಾ. ತ್ಯಾ ಉಪ್ರಾಂತ್ ಆಂಕ್ಡೆ ಸಾಂಕ್ಡೆ ಆನಿ ಭೆಶ್ಟಿ ಭಾಸಾಭಾಸ್. ಭೃಶ್ಟ್ ರಾಜಕೀಯಾಚ್ಯಾ ವೊಸ್ಯಾಂತ್ ಕದ್ವಳೊನ್ ಕುರ್ಡೆ ಜಾಲ್ಲ್ಯಾ ದೊಳ್ಯಾಂಕ್ ನಿರ್ಮಳ್ ಹಾಸೊ ಕಸೊ ದಿಸ್ತಲೊ? "ಖಂಯ್ಚೆಂ ಧೋರಣ್ ತುಜ್ಯೊ ಹಾಸೊ ಮೊಲಾಂವ್ಕ್ ಸಕ್ತೆಂ?" ರಾಜಕೀಯ್ ಹಿಂಸಾಚಾರಾಚೊ ಅಪ್ರಾಧ್ ಸಾದರ್ ಕರ್‍ಚಿ ಗಂಭೀರ್ ಆನಿ ಬಳ್ವಂತ್ ವೋಳ್ ತಾಣೆಂ ದಿಲ್ಯಾ.
ಕವಿ ಕಿಶೂ ಅಪ್ರೂಪ್ ಕವಿತಾಂ ಬರಯ್ತಾ ಪುಣ್ ಬರಯ್ತಾನಾ ತನ್ ಮನ್ ಅಸ್ವಸ್ಥ್ ಕರ್ನ್ ಸೊಡ್ತಾ. ಹ್ಯೆ ಕವಿತೆಂತ್ ದುಕಾಂಚೆಂ ಪ್ರದರ್ಶನ್ ನಾ. ದುಖಿಚೊ ವಿಳಾಪ್ ನಾ. ದುಕಾಚೊ ಬಂಡಾಯ್ ಆಸಾ! "ತುಂವೆಂ ಕಿತ್ಯಾ ಖಾತಿರ್ ಮರಜೆ ಆಸ್ಲೆಂ?" ಮ್ಹಣ್ ವಿಚಾರ್‍ನ್ ದೂಕ್ ವೊಗೆಂ ಸಾಕ್ಸ್ ಜಾವ್ನ್ ಉಬೆಂ ರಾವ್ಲಾಂ. ಬ್ರೆಡ್ಡ್ ಹಾಂಗಾ ಫಕತ್ ಉಂಡೊ ನ್ಹಯ್. ಸಾದ್ಯಾ ಮನ್ಶಾಚೆಂ ವಾಂವ್ಟಿಚೆಂ ಜಿವಿತ್. ತೆಂ ನಶ್ಟ್ ಜಾತಾನಾ ಕಿತೆಂ ಉರ್‍ತಾ ತೆಂ ಕವಿನ್ ಎಕೇಕಾ ಕಡ್ವ್ಯಾಚೆರ್ ಉಜ್ವಾಡ್ ಘಾಲ್ನ್ ದಾಕಯ್ಲಾಂ. ಕವಿ ರಗತ್ ದಾಕಯ್ನಾ, ವಾಚ್ಪ್ಯಾಕ್ ಝುಜಾಥಳಾಕ್ ಆಪೊವ್ನ್ ವ್ಹರಿನಾ, ಬಗರ್ ಘರಾ ಆಪೊವ್ನ್ ವ್ಹರ್‍ತಾ ಆನಿ ದಾಕಯ್ತಾ ರಿತಿಂ ಕದೆಲಾಂ, ಕುಡ್ಸನಾತ್‌ಲ್ಲ್ಯೊ ಖೊಂವ್ಚಿ, ಘಡ್ಸನಾಸ್ಚೆ ಕಾಳ್ಜಾ ಕುಡ್ಕೆ....
-ಆಂಡ್ರ್ಯು ಎಲ್. ಡಿಕುನ್ಹಾ
ಕವಿತಾ:
ಪಾಟಿಂ ಯೇನಾತಲ್ಲ್ಯಾಂಕ್
ಬ್ರೆಡ್ ಹಾಡ್ತಾಂ ಮ್ಹಣ್ ತುಂ ಗೆಲ್ಲೊಯ್
ಹಾಂವೆಂ ಆದೇವ್ಸ್ ಮ್ಹಣುಂಕ್ ನಾತಲ್ಲೆಂ
ಕಿತ್ಯಾಕ್ ತರೀ ಮ್ಹಣಜೆ ಆಸ್ಲೆಂ
ಬ್ರೆಡ್ ಘೆವ್ನ್ ತುಂ ಯೆಂವ್ಚೊ ಆಸಲ್ಲೊ ನ್ಹುಂ?
ಆತಾಂ ತೆ ತುಕಾ ಲೆಕಾಕ್ ಧರ‍್ತಾತ್,
ತಾಂಚ್ಯಾ ಝುಜಾಚೆ ಆಂಕ್ಡೆಸಾಂಕ್ಡೆ.
ತುಜ್ಯೊ ಹಾಸೊ ತಾಣಿಂ ಪಳೆಂವ್ಕಚ್ ನಾತ್ಲ್ಯೊ.
ದಾರಾಚ್ಯಾ ಆವಾಜಾಕ್ ಹಾಂವ್ ಆತಾಂಯ್ ಘುಂವ್ತಾಂ
ಆತಾಂಯ್ ದೊಗಾಂಕ್ ಆದಾನ್ ದವರ‍್ತಾಂ
ಥೊಡ್ಯಾ ಸಕಾಳಿಂಚೆಂ ತುಂ ಮೆಲಾಯ್ ಮ್ಹಳ್ಳೆಂಚ್ ವಿಸರ್‍ತಾಂ.
ವಿಸ್ರುಂಚೆಂ ಏಕ್ ಬೆಸಾಂವ್-
ಉಡಾಸ್ ಮ್ಹಾಕಾ ದೆಸ್ವಾಟ್ತಾತ್
ದರ್ ಏಕ್ ದೀಸ್.
ತಿಂ ಮ್ಹಾಕಾ ರೆಕಾದ್ ಆನಿಂ ಮಾಗ್ಣಿಂ ಧಾಡ್ತಾತ್
ಉತ್ರಾಂಕ್ ದಮ್ಡಿ ಲಾಗನಾ
ವಾರ‍್ಯಾಪ್ರಾಸ್ ಹಳು.
ತುಜೊ ಟೂತ್‍ಬ್ರಷ್ ಆನಿಕೀ ಆಸಾ
ಮ್ಹಾಕಾ ಉಡೊಂವ್ಕ್ ಜಾಯ್ನಾ
ತುಂ ಆಯ್ಲೊಯ್ ತರ್?
ಮ್ಹಾಕಾ ಸಾಂಗ್, ಕಿತ್ಯಾಖಾತಿರ್
ತುಂವೆ ಮರಜೆ ಆಸ್ಲೆಂ?
ತ್ಯಾ ಹೊಟೆಲಾಂತ್, ಥಂಯ್ ಮಾರ್ಗಾರ್-
ಖಂಯ್ಚೆಂ ಧೋರಣ್ ತುಜ್ಯೊ ಹಾಸೊ ಮೊಲಾಂವ್ಕ್ ಸಕ್ತೆಂ?
ತಾಂಕಾಂ ತುಜೆಥಾವ್ನ್ ಕಾಂಯಿಂಚ್ ನಾಕಾಸ್ಲೆಂ
ತ್ಯೆ ಘಡ್ಯೆ ತುಂವೆಂ ಥಂಯ್ ಆಸ್ಚೆ ಬಗರ್,
ತಾಂಚೊ ದ್ವೇಶ್ ವೊತ್ತಾನಾ.
ನಾ ಜೊಕ್ತೊ ಜಾಗೊ. ನಾ ಜೊಕ್ತೊ ವೇಳ್.
ಬಾಬಾ ತುಜಿ ಜಾಕೆಟ್ ದೊಡ್ತಾ,
ಮಾಂಯ್ ವಾಡುಂಕ್ ಕರ‍್ತಾ,
ಭಯ್ಣಿಂಕ್ ಸೆಜ್ರಾಜಮ್ಯಾಂನಿ ತುಜೊ ತಾಳೊ ಆಯ್ಕತಾ.
ತುಜ್ಯಾ ಪರ್ನ್ಯಾ ಶರ್ಟಾಂತ್ ಹಾಂವ್ ನಿದ್ತಾಂ
ತುಜೊ ಪರ್ಮಳ್ ಆಸಾಪರ್ಯಾಂತ್,
ಉಪ್ರಾಂತ್ ಮ್ಹಾಕಾ ಕಾಂಯ್ ನಾ ಪೊಟ್ಲೂನ್ ಧರುಂಕ್.
ಥೊಡ್ಯಾರಾತಿಂ ಹಾಂವ್ ಪಾತ್ಯೆತಾಂ ಕಾಂಯ್
ಮ್ಹಣ್ ನಕ್ಖಿ ನಾತ್ಲೆಲ್ಯಾ
ದೆವಾಲಾಗಿಂ ಝಗಡ್ತಾಂ.
ಬದ್ಲೆಕ್ ಮ್ಹಾಕಾ ವ್ಹರಿಜೆ ಆಸ್ಲೆಂ ಮ್ಹಣ್ತಾಂ.
ಚ್ಯಾನೆಲಾಂಚೆರ್ ತಾಂಚಿ ಭಾಸಾಭಾಸ್ ಚಲ್ತಾ,
ತಾಂಚ್ಯೋಚ್ ವೊಳಿ, ತಾಂಚೀಂಚ್ ಸಮರ್ಥನಾಂ,
ಮ್ಹಜ್ಯಾ ಸಪ್ಣಾಂನಿಂ ಹ್ಯೋಚ್ ಸಂಗ್ತಿ ಧೊಸ್ತಾನಾ:
ತುಜೊ ಲೊಟೊ. ತುಜೆಂ ಹಾತ್‍ಬರಪ್.
ತುಂವೆಂ ಮ್ಹಜೆಂ ನಾಂವ್ ಆಪೊಂವ್ಚೆಂ...
ತುಂವೆ ಭರಿಜೆ ಆಸಲ್ಲೊ ಜಾಗೊ.
ಆಮಿ ಸರ‍್ವಾಂ ಸಂಸಾರ್‌ಭರ್
ಶಿಂಪಡ್ನ್ ಆಸಾಂವ್-
ಆವಯೊ, ಬಾಪಯ್, ಭಾವ್ ಭಯ್ಣಿ, ಬಾಯ್ಲೊ-
ಆಮ್ಕಾಂ ಎಕ್ವಟಾಯ್ತಾತ್ ಫಕತ್:
ರಿತಿಂ ಕದೆಲಾಂ.
ಕುಡ್ಸನಾತ್ಲ್ಯೊ ಖೊಂವ್ಚಿ.
ಘಡ್ಸನಾಸ್ಚೆ ಕಾಳ್ಜಾಕುಡ್ಕೆ.
ಆಮಿ ಮರಾಪರ್‌ಯಾಂತ್.
-ಕಿಶೂ, ಬಾರ್ಕುರ್
संपादकीय:
मेजामुळीं शिंपडाल्ले काळजा कुडके....
मनशापणान भरल्लीं भोगणां मनशांलागीं आसल्लीं तर ब्रेड्ड हाडतां म्हण गेल्लो फाटीं येतो. पूण ना! मनशाभितर मनशापणाचें प्रमाण थळाक देंवून मनीस कठोर जाला आसतां ब्रेड्ड हाडतां म्हण गेल्लो फाटीं येता म्हण सांगुंक जायना. त्या उपरांत आंकडे सांकडे आनी भेश्टी भासाभास. भृश्ट राजकीयाच्या वोस्यांत कद्वळोन कुर्डे जाल्ल्या दोळ्यांक निर्मळ हासो कसो दिसतलो? "खंयचें धोरण तुज्यो हासो मोलावंक सकतें?" राजकीय हिंसाचाराचो अप्राध सादर करची गंभीर आनी बळवंत वोळ ताणें दिल्या.
कवी किशू अपरूप कवितां बरयता पूण बरयताना तन मन अस्वस्थ करन सोडता. ह्ये कवितेंत दुकांचें प्रदर्शन ना. दुखिचो विळाप ना. दुकाचो बंडाय आसा! "तुंवें कित्या खातीर मरजे आसलें?" म्हण विचारन दूक वोगें साक्स जावन उबें रावलां. ब्रेड्ड हांगा फकत उंडो न्हय. साद्या मनशाचें वांवटीचें जिवीत. तें नश्ट जाताना कितें उरता तें कवीन एकेका कडव्याचेर उजवाड घालन दाकयलां. कवी रगत दाकयना, वाचप्याक झुजाथळाक आपोवन व्हरीना, बगर घरा आपोवन व्हरता आनी दाकयता रितीं कदेलां, कुडसनातल्ल्यो खोंवची, घडसनासचे काळजा कुडके....
-आंड्र्यू एल. डिकुन्हा
कविता:
फाटीं येनातल्ल्यांक
ब्रेड हाडतां म्हण तूं गेल्लोय
हांवें आदेवस म्हणुंक नातल्लें
कित्याक तरी म्हणजे आसलें
ब्रेड घेवन तूं येंवचो आसल्लो न्हूं?
आतां ते तुका लेकाक धरतात,
तांच्या झुजाचे आंकडे सांकडे.
तुज्यो हासो ताणीं पळेंवकच नातल्यो.
दाराच्या आवाजाक हांव आतांय घुंवतां
आतांय दोगांक आदान दवरतां
थोड्या सकाळींचें तूं मेलाय म्हळ्ळेंच विसरतां.
विसरुंचें एक बेसांव-
उडास म्हाका देस्वाटतात
दर एक दीस.
तीं म्हाका रेकाद आनीं मागणीं धाडतात
उतरांक दमडी लागना
वार्या प्रास हळू.
तुजो टूतब्रष आनिकी आसा
म्हाका उडोवंक जायना
तूं आयलोय तर?
म्हाका सांग, कित्याखातीर
तुंवे मरजे आसलें?
त्या होटेलांत, थंय मार्गार-
खंयचें धोरण तुज्यो हासो मोलावंक सकतें?
तांकां तुजेथावन कांयींच नाकासलें
त्ये घड्ये तुंवें थंय आसचे बगर,
तांचो द्वेश वोत्ताना.
ना जोकतो जागो. ना जोकतो वेळ.
बाबा तुजी जाकेट दोडता,
मांय वाडुंक करता,
भयणींक सेज्राजम्यांनी तुजो ताळो आयकता.
तुज्या पोरन्या शर्टांत हांव निदतां
तुजो पर्मळ आसा पर्यांत,
उपरांत म्हाका कांय ना पोटलून धरुंक.
थोड्यो रातीं हांव पात्येतां कांय
म्हण नख्खी नातलेल्या
देवालागीं झगडतां.
बदलेक म्हाका व्हरिजे आसलें म्हणतां.
चॅनेलांचेर तांची भासाभास चलता,
तांच्योच वोळी, तांचींच समर्थनां,
म्हज्या सपणांनीं ह्योच संगती धोसताना:
तुजो लोटो. तुजें हातबरप.
तुंवें म्हजें नांव आपोंवचें...
तुंवे भरिजे आसल्लो जागो.
आमी सरवां संसारभर
शिंपडन आसांव-
आवयो, बापय, भाव भयणी, बायलो-
आमकां एकवटायतात फकत:
रितीं कदेलां.
कुडसनातल्यो खोंवची.
घडसनासचे काळजाकुडके.
आमी मरापरयांत.
-किशू, बार्कूर