6 Jul 2025

249. ಮಂಗ್ಳುರಾಂತ್ ಕೊಂಕಣಿ ಕವಿತಾ ಸಾದರೀಕರಣ್ ಸರ್ತ್ 

ಕವಿತಾ ಟ್ರಸ್ಟ್ ಆನಿ ಕೊಂಕಣಿ ನಾಟಕ್ ಸಭಾ ಹಾಂಣಿ ಸಾಂಗಾತಾ ಮೆಳುನ್ ಭುರ್ಗಿಂ, ಯುವಜಣಾಂ ಆನಿ ಜ್ಯೇಷ್ಟಾಂ ಖಾತೀರ್ ಮಂಗ್ಳುರ‍್ಚ್ಯಾ ಡೊನ್ ಬೊಸ್ಕೊ ಹೊಲಾಂತ್ ಕೊಂಕಣಿ ಕವಿತಾ ಸಾದರೀಕರಣ್ ಸರ್ತ್ ಮಾಂಡುನ್ ಹಾಡ್ಲಿ.

ಪ್ರಾರ್ಥನ್ ಆನಿ ಕೊಂಕಣಿ ನಾಟಕ್ ಸಭೆಚ್ಯಾ ಆಶಯ್ ಗೀತಾಸವೆಂ ಸುರು ಜಾಲ್ಲೆ ಕಾರ್ಯಾವಳಿಂತ್ ನಾಟಕ್ ಸಭೆಚೊ ಅಧ್ಯಕ್ಷ್ ಫಾ. ರೊಕಿ ಡಿಕುನ್ಹಾನ್ ಸಗ್ಳ್ಯಾಂಕ್ ಯೆವ್ಕಾರ್ ಮಾಗ್ಲೊ. ಕವಿತಾ ಟ್ರಸ್ಟ್ ಸ್ಥಾಪಕ್ ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಸರ್ತೆಚಿ ನೆಮಾವಳ್ ಸಾಂಗುನ್ ಸಗ್ಳ್ಯಾಂಕ್ ಬರೆಂ ಮಾಗ್ಲೆಂ.

ಪಣ್ಟಿ ಪೆಟೊವ್ನ್ ಸರ್ತೆಚಿ ಉಗ್ತಾವಣ್ ಜಾಲಿ. ಹ್ಯೆ ಉಗ್ತಾವಣೆಂತ್ ಉಪಾಧ್ಯಕ್ಷ್ ಫ್ಲೊಯ್ಡ್ ಡಿಮೆಲ್ಲೊ, ಸಚಿವ್ ಪ್ಯಾಮೆಲಾ ಸಾಂತೊಸ್, ಉಪಸಚಿವ್ ಜೆರೊಮ್ ಮೊರಾಸ್, ಖಜಾನಿ ಐವನ್ ಡಿಸಿಲ್ವಾ ಆನಿ ಸರ್ತೆಚೆ ಸಂಚಾಲಕ್ ಜೋಕಿಮ್ ಪಿಂಟೊ ಆನಿ ವಿನ್ಸೆಂಟ್ ಪಿಂಟೊ ಹಾಜರ್ ಆಸಲ್ಲಿಂ.

ನಾಮ್ಣೆಚೆ ಕವಿ ಟೈಟಸ್ ನೊರೊನ್ಹಾ, ಆಂಡ್ರ್ಯೂ ಎಲ್. ಡಿಕುನ್ಹಾ ಆನಿ ವಿಲಿಯಮ್ ಪಾಯ್ಸ್ ವೊರಯ್ಣಾರ್ ಜಾವ್ನ್ ಬಸಲ್ಲೆ.

ಸರ್ತೆಂತ್ 35 ಜಣಾಂನಿ ವಾಂಟೊ ಘೆತಲ್ಲೊ. ನಾಟಕ್ ಸಭೆಚೊ ಮ್ಯಾನೇಜರ್ ಜೆರಾಲ್ಡ್ ಕೊನ್ಸೆಸೊ, ನಾಟಕ್ ಸಭೆಚ್ಯಾ ಬಜ್ಜೋಡಿ ತಶೆಂ ಆಂಜೆಲೊರ್ ಘಟಕಾಚ್ಯಾ ವಾಂಗ್ಡಿಂನಿ ಸಹಕಾರ್ ದಿಲೊ.

ವಿನ್ಸಿ ಪಿಂಟೊನ್ ಕಾರ್ಯೆಂ ಚಲೊವ್ನ್ ವ್ಹೆಲೆಂ. ಮೆಲ್ವಿನ್ ರೊಡ್ರಿಗಸಾನ್ ವೊರಯ್ಣಾರಾಂಚಿ ವಳಖ್ ಕರುನ್ ದಿಲಿ. ಜೋಕಿಮ್ ಪಿಂಟೊನ್ ಧನ್ಯವಾದ್ ಭೆಟಯ್ಲೆ. ಭಾಗ್ ಘೆತಲ್ಲ್ಯಾ ಸಗ್ಳ್ಯಾಂಕ್ ಕವಿತಾ ಟ್ರಸ್ಟಾನ್ ಆಪ್ಲ್ಯಾ ಪ್ರಕಾಶನಾಚಿಂ ಪುಸ್ತಕಾಂ ದಿಲಿಂ.

ಫಳಿತಾಂಶ್:

ಭುರ್ಗಿಂ - 15 ವರ್ಸಾಂ ಸಕಯ್ಲಿಂ
ಪಯ್ಲೆಂ: ನಿನಿಶಾ ಪ್ರಿಶಾ ಮೊಂತೇರೊ, ಬೊಂದೆಲ್
ದುಸ್ರೆಂ: ನಿಶೆಲ್ ಪರ್ಲ್ ಮೊಂತೇರೊ, ಬೊಂದೆಲ್
ತಿಸ್ರೆಂ: ಇವಾ ಲಿಸಾ ಲೋಬೊ, ಇಜಯ್

ಯುವಜಣಾಂ: 15 ಥಾವ್ನ್ 30 ವರ್ಸಾಂ ಭಿತರ‍್ಲಿಂ
ಪಯ್ಲೆಂ: ಅನ್ವಿಲಾ ನಿಯೋರಾ ಡಿಸೋಜಾ, ಬೊಂದೆಲ್
ದುಸ್ರೆಂ: ಎಲ್ವಿನ್ ಡೆಸಾ, ಶಿರ್ತಾಡಿ
ತಿಸ್ರೆಂ: ಜೆನ್ವಿನ್ ಒಲಿವಿಯಾ ಕ್ರಾಸ್ತಾ, ಬೆಳಾ

ಜ್ಯೇಷ್ಟಾಂ: 30 ವರ್ಸಾಂ ವಯ್ಲಿಂ
ಪಯ್ಲೆಂ: ಪ್ರೀತನ್ ರೆನಿಟಾ ಪಿರೇರಾ, ದೆರೆಬೈಲ್
ದುಸ್ರೆಂ: ವನಿತಾ ವಾಣಿ ಕ್ರಾಸ್ತಾ, ಬೆಳಾ
ತಿಸ್ರೆಂ: ಐರಿನ್ ಮೆಂಡೊನ್ಸಾ, ಕಾಸ್ಸಿಯಾ

6 Apr 2025

248. ಮನೋಹರ್ ಸರ್ದೇಸಾಯಿಚ್ಯಾ ಜನ್ಮಾಶತಾಬ್ದಿಚ್ಯಾ ಉಡಾಸಾಕ್ ’ಮನೋಹರ್ ಸಾಂಜ್’

ಭಾರತಾಚೊ ಉಂಚ್ಲೊ ಕೊಂಕಣಿ ಕವಿ ಮನೋಹರ್ ರಾಯ್ ಸರ್ದೇಸಾಯಿಚ್ಯಾ ಮಾನಾಕ್ ಮಂಗ್ಳುರ್ ಆಂಜೆಲೊರ್ ಲಾಗ್ಸಾರ‍್ಚ್ಯಾ ಜವಾಹರ್-ಜ್ಯೋತಿ ಘರಾಂತ್ ’ಮನೋಹರ್ ಸಾಂಜ್’ ಕಾರ್ಯಾವಳ್ ಮಾಂಡುನ್ ಹಾಡ್‌ಲ್ಲಿ.

ಮೆಲ್ವಿನ್ ರೊಡ್ರಿಗಸ್ ಹಾಣೆ ಸುರ‍್ವಾತಿರ್ ಆಪ್ಲ್ಯಾ ಪ್ರಾಸ್ತಾವಿಕ್ ಉಲೊವ್ಪಾಂತ್ ಮನೋಹರ್ ಸರ್ದೇಸಾಯಿಚೆಂ ಜಿವಿತ್ ಆನಿ ಸಾಹಿತ್ಯಾವಿಶಿಂ ಉಜ್ವಾಡ್ ಫಾಂಕ್ಲೊ.

ನಾಮ್ಣೆಚೊ ಉಲೊವ್ಪಿ ಎಚ್ಚೆಮ್ ಪೆರ್ನಾಳ್ ಹಾಣೆ ಸರ್ದೇಸಾಯಿ ಕಸೊ 1950-1990 ವರ್ಸಾಂಚ್ಯಾ ಕಾಳಾಚೊ ಪ್ರಮುಖ್ ಕವಿ ಜಾವ್ನಾಸಲ್ಲೊ ಮ್ಹಳ್ಳೆಂ ಸಾಂಗ್ಲೆಂ.

ಹ್ಯಾ ಸಾಹಿತೀಕ್ ಸಂಬ್ರಮಾ ವೆಳಾರ್ ಮನೋಹರ್ ರಾಯ್ ಸರ್ದೇಸಾಯಿಚ್ಯೊ ವೆವೆಗ್ಳ್ಯೊ ಕವಿತಾ ಫೆಲ್ಸಿ ಲೋಬೊ, ಜೊಯ್ಸ್ ಪಿಂಟೊ, ಮನೋಜ್ ಫೆರ್ನಾಂಡಿಸ್, ಸಲೋಮಿ ಮಿಯಾಪದವ್, ಗ್ರೀಶ್ಮಾ ಸಲ್ಡಾನ್ಹಾ, ಜೇಸನ್ ಲೋಬೊ ಆನಿ ಫ್ಲಾವಿಯಾ ಆಲ್ಬುಕೆರ್ಕ್ ಹಾಂಣಿ ವಾಚುನ್ ಸಾಂಗ್ಲ್ಯೊ. ಹಾಜರ್ ಆಸಲ್ಲ್ಯಾ ಜಾಯ್ತ್ಯಾ ಸಭಿಕಾಂನಿ ಸರ್ದೇಸಾಯಿಚ್ಯಾ ’ಜಾಯೊ-ಜುಯೊ’ ಆನಿ ’ಪಿಸೊಳಿಂ’ ಪುಸ್ತಕಾಂತ್ಲ್ಯೊ ಕವಿತಾ ಸಾದರ್ ಕೆಲ್ಯೊ.

ಕಾರ್ಯಾವಳಿಚ್ಯಾ ಮುಕ್ಲ್ಯಾ ಭಾಗಾಂತ್ ಆಂಜೆಲೊರ‍್ಚ್ಯಾ ರಾಸ್ಕಿಞ್ ಕುಟ್ಮಾಥಾವ್ನ್ ಮ್ಹಾಲ್ಗಡ್ಯಾಂ ಥಾವ್ನ್ ದೆಂವೊನ್ ಆಯಿಲ್ಲ್ಯಾ ಆದ್ಲ್ಯಾ ಪದಾಂಚೆಂ ವಾಚಪ್ ತಶೆಂ ಸಾದರೀಕರಣ್ ಚಲ್ಲೆಂ. ದಿವಂಗತ್ ಭಾವ್ ಸೈಮನ್ ರಾಸ್ಕಿಞ್ ಆನಿ ಜೆ. ಬಿ. ರಾಸ್ಕಿಞ್ ಹಾಂಚೆ ಸುಪುತ್ರ್ ಆರ್ಥರ್ ರಾಸ್ಕಿಞ್ ಆನಿ ಉಲ್ಲಾಸ್ ರಾಸ್ಕಿಞ್ ಹಾಂಣಿ ವೇದಿ ಸಜಯಿಲ್ಲಿ. ಕುಟ್ಮಾಚ್ಯಾಂನಿ ಹ್ಯಾ ಸಂದರ್ಭಾರ್ ನೊವೊದ್ ವರ್ಸಾಂ ಆದಿಂ ಜೆ.ಜೆ. ರೇಗೊನ್ ಸಂಕಲನ್ ಕೆಲ್ಲ್ಯಾ ’ಚಾಲ್ತಿಂ ಪದಾಂ’ ಪುಸ್ತಕಾಂತ್ಲಿಂ ಗಿತಾಂ ಗಾಯ್ಲಿಂ ತಶೆಂ ವಾಚುನ್ ಸಾಂಗ್ಲಿಂ. ಪಾರಂಪಾರಿಕ್ ಕವಿತಾಂಚಿ ರೀತ್ ಆನಿ ಆಧುನಿಕ್ ಕವಿತಾಂಚಿ ರಿತಿಂ ಮಧ್ಲ್ಯಾ ಫರಕಾವಿಶಿಂ ಹ್ಯಾ ಸಂದರ್ಭಾರ್ ಆರ್ಥರ್ ರಾಸ್ಕಿಞ್ ಉಲಯ್ಲೊ.

ಶ್ರೀನಿವಾಸ್ ಮ್ಹಾವಿದ್ಯಾಲಯಾ ಥಾವ್ನ್ ಕೊಂಕಣಿ ಭಾಶೆಂತ್ ಡೊಕ್ಟರೇಟ್ ಸನದ್ ಆಪ್ಣಾಯಿಲ್ಲ್ಯಾ ಡೊ. ಪ್ರೇಮ್ ಮೊರಾಸಾಕ್ ಕವಿತಾ ಟ್ರಸ್ಟಾ ತರ್ಫೆನ್ ಘರ‍್ಚಿ ಯೆಜ್ಮಾನ್ ಜೋಸೆಫಿನ್ ಡಿಸೋಜಾ ಹಿಣೆ ಶೊಲ್ ಪಾಂಗ್ರುನ್ ಮಾನ್ ಕೆಲೊ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಫುಲಾಂ ದಿಲಿಂ. ಎಚ್ಚೆಮ್ ಪೆರ್ನಾಳಾನ್ ಟ್ರಸ್ಟಾಚಿಂ ಪುಸ್ತಕಾಂ ದಿಲಿಂ. ಹ್ಯಾಚ್ ಸಂದರ್ಭಾರ್ ಕವಿತಾ ಟ್ರಸ್ಟಾನ್ ಪರ್ಗಟ್ ಕೆಲ್ಲ್ಯಾ ಪುಸ್ತಕಾಂ ಖಾತೀರ್ ಗೊಂಯ್ ಕೊಂಕಣಿ ಅಕಾಡೆಮಿ ಆನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಪುರಸ್ಕಾರ್ ಜೊಡಲ್ಲ್ಯಾ ಎಚ್ಚೆಮ್ ಪೆರ್ನಾಳ್ ಆನಿ ಫೆಲ್ಸಿ ಲೋಬೊ ಹಾಂಕಾಂ ಫುಲಾಂ ತುರೆ ದೀವ್ನ್ ಮಾನ್ ಕೆಲೊ.

ಸುರ್ವೆರ್ ಯೆಜ್ಮಾನ್ ಜೋಸೆಫಿನ್ ಡಿಸೋಜಾನ್ ಸಗ್ಳ್ಯಾಂಕ್ ಯೆವ್ಕಾರ್ ದಿಲೊ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಸಗ್ಳ್ಯಾಂಚೆ ಉಪ್ಕಾರ್ ಆಟಯ್ಲೆ.

20 Jan 2025

247. ’ಪಾವ್ಲಾಬ್ - ಏಕ್ ಜಿವಿತ್ ಸಾಸ್ಣಾಚೆಂ’ ಕಾರ್ಯಾವಳ್

ಜನೆರ್ 5, 2025 ತಾರಿಕೆರ್ ಮರಣ್ ಪಾವಲ್ಲೊ ಕೊಂಕಣಿ ಕವಿ ತಶೆಂ ಕವಿತಾ ಟ್ರಸ್ಟಾಚೊ ಹಿತಚಿಂತಕ್ ಎಮ್. ಪಿ. ರೊಡ್ರಿಗಸ್ (ಮೇರಿಯನ್ ಪಾವ್ಲ್ ರೊಡ್ರಿಗಸ್) ಹಾಚೊ ಉಡಾಸ್ ಕಾಡುನ್ ತಾಕಾ ಅರ್ಗಾಂ ವೊಂಪ್ಚಿ ಕಾರ್ಯಾವಳ್ ಡೊನ್ ಬೊಸ್ಕೊ ಮಿನಿ ಹೊಲಾಂತ್ ಮಾಂಡುನ್ ಹಾಡ್ಲಿ. ’ಪಾವ್ಲಾಬ್ - ಏಕ್ ಜಿವಿತ್ ಸಾಸ್ಣಾಚೆಂ’ ನಾಂವಾಖಾಲ್ ಮಾಂಡುನ್ ಹಾಡಲ್ಲೆ ಕಾರ್ಯಾವಳಿಂತ್ ಕವಿ ಆಂಡ್ರ್ಯೂ ಎಲ್. ಡಿಕುನ್ಹಾ ಆನಿ ಮೆಲ್ವಿನ್ ರೊಡ್ರಿಗಸಾನ್ ಪ್ರಮುಖ್ ಉಲೊವ್ಪಾಂ ಕೆಲಿಂ..

ಕವಿತಾ ಟ್ರಸ್ಟಾಚೊ ಸಾಂಗಾತಿ ಸ್ಟೇನಿ ಬೆಳಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. ಅಧ್ಯಕ್ಷ್ ಕಿಶೂ ಬಾರ್ಕೂರಾನ್ ಹ್ಯೆ ಕಾರ್ಯಾವಳಿಚಿ ಗರ್ಜ್ ಆನಿ ಕಾರಣಾಂ ಸಾಂಗ್ಲಿಂ. ವಿಶನ್ ಕೊಂಕಣಿ ಪ್ರಾಯೋಜಕ್ ಮೈಕಲ್ ಡಿಸೊಜಾ, ಪಾವ್ಲಾಬಾಚಿ ಪತಿಣ್ ಜೆಸಿಂತಾ ರೊಡ್ರಿಗಸ್, ಪೂತ್ ಜೊನಾಥನ್ ರೊಡ್ರಿಗಸ್, ಕಿಶೂ ಬಾರ್ಕೂರ್, ಆಂಡ್ರ್ಯೂ ಎಲ್. ಡಿಕುನ್ಹಾ, ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಪಾವ್ಲಾಬಾಚೆ ತಸ್ವಿರೆಕ್ ಫುಲಾಂ ಭೆಟೊವ್ನ್ ಅರ್ಗಾಂ ವೊಂಪ್ಲಿಂ.

ಹ್ಯಾ ಸಂದರ್ಭಾರ್ ಕವಿ ಆಂಡ್ರ್ಯೂ ಡಿಕುನ್ಹಾ ’ಪಾವ್ಲಾಬಾಚೆಂ ಜಿವಿತ್ ಸಾಸ್ಣಾಚೆಂ’ ಹ್ಯಾ ವಿಶಯಾಚೆರ್ ಉಲಯ್ಲೊ ಜಾಲ್ಯಾರ್ ಮೆಲ್ವಿನ್ ರೊಡ್ರಿಗಸ್ ’ಪಾವ್ಲಾಬಾಚೆಂ ಕವಿತ್ ಸಾಸ್ಣಾಚೆಂ’ ವಿಶಯಾಚೆರ್ ಉಲಯ್ಲೊ.

ಡ್ಯಾನಿಕಾ ಡಿಸೋಜಾ, ನಿನಿಶಾ ಮೊಂತೇರೊ, ಚೆಲ್ಸಿಯಾ ಕ್ಯಾಸ್ತೆಲಿನೊ ಆನಿ ವಿಶ್ವಾಸ್ ರೆಬಿಂಬಸ್ ಹಾಂಣಿ ಪಾವ್ಲಾಬಾಚ್ಯೊ ಕವಿತಾ ಸಾದರ್ ಕೆಲ್ಯೊ.

ಅಧ್ಯಕ್ಷ್ ಕಿಶೂ ಬಾರ್ಕೂರಾನ್ ಜೆಸಿಂತಾ ಆನಿ ಜೊನಾಥಾನಾಕ್ ಭೆಟ್ ವಸ್ತ್ ದೀವ್ನ್ ಉಪ್ಕಾರ್ ಆಟಯ್ಲೊ.

ಜನೆರ್ 5, 2025 ತಾರಿಕೆರ್ ಆಮೇರಿಕಾಂತ್ ಸಂಸಾರಾಕ್ ಆದೇವ್ಸ್ ಮಾಗಲ್ಲ್ಯಾ ಪಾವ್ಲಾಬಾಚ್ಯಾ ಮರ್ಣಾಚಿ ನಿಮಾಣಿ ವಿಧಿ ಜನೆರ್ 13, 2025 ತಾರಿಕೆರ್ ಮಂಗ್ಳುರ್ ಮಿಲಾಗ್ರಿಸ್ ಇಗರ್ಜೆಂತ್ ಚಲಲ್ಲಿ.

12 Jan 2025

246. ಸಾಸ್ತಾನಾಂತ್ ಎಕುಣ್ವಿಸಾವ್ಯಾ ಕವಿತಾ ಫೆಸ್ತಾಚೊ ದಬಾಜೊ

19-ವೆಂ ಕವಿತಾ ಫೆಸ್ತ್ 12-01-2025 ವೆರ್ ಉಡುಪಿ ಜಿಲ್ಲ್ಯಾಚ್ಯಾ ಸಾಸ್ತಾನ್ ಪಾಂಡೇಶ್ವರ್ ಆಸ್ಚ್ಯಾ ಸುಜಾತಾ–ಆಲ್ವಿನ್ ಆಂದ್ರಾದೆ ಜೊಡ್ಯಾಚ್ಯಾ ಆಶಿಯಾನಾ ಘರ‍್ಚ್ಯಾ ಆಂಗ್ಣಾಂತ್, ’ದಿ ಎಕ್ಸ್’ಪ್ರೆಶನ್ಸ್’ ಪಂಗ್ಡಾಚ್ಯಾ ಸಹಕಾರಾನ್ ದೀಸ್‌ಭರ್ ವ್ಹಡಾ ಸಂಭ್ರಮಾನ್ ಮನಾಯ್ಲೆಂ.

ಸಂಭ್ರಮಿಕ್ ಉಗ್ತಾವ್ಣಿ:

ಮಂಗ್ಳುರ್, ಉಡುಪಿ, ಗೊಂಯ್, ಕೇರಳ ಅಶೆಂ ಕೊಂಕಣಾಚ್ಯಾ ವಿವಿಧ್ ವಠಾರಾಂ ಥಾವ್ನ್ ಆಯಿಲ್ಲ್ಯಾ ಕಾವ್ಯರಸಿಕಾಂನಿ ಇಡ್ಲ್ಯೊ ಆನಿ ಮಣ್ಣಿಚೊ ರುಚಿಕ್ ಫಳಾರ್ ಘೆತಚ್, ಬೆಂಡಾ-ತೊಂಬೊರಾಚ್ಯಾ ನಾದಾನ್ ಕವಿತಾ ಫೆಸ್ತಾಚೊ ಪುರ್ಶಾಂವ್ ಸುರ್ವಾತ್ಲೊ. ಬಳ್ಳಾರಿಚೊ ಬಿಸ್ಪ್ ಅ.ಮಾ.ದೊ. ಹೆನ್ರಿ ಸೊಜ್ ಹಾಣಿಂ ಬ್ಯಾಂಡ್ ಬಡೊವ್ನ್ ಪುರ್ಶಾಂವಾಕ್ ಚಾಲನ್ ದಿಲೆಂ.

ಉಪ್ರಾಂತ್ ವೆದಿವ್ಹಯ್ಲ್ಯಾ ಸಯ್ರ್ಯಾಂನಿ ಗುಲೊಬಾಂಚ್ಯೊ ಪಾಕ್ಳ್ಯೊ ವಾರ‍್ಯಾರ್ ಉಬೊವ್ನ್, ಕವಿತಾ ಫೆಸ್ತ್ 2025 ಉಗ್ತಾಯ್ಲೆಂ. ಹ್ಯಾಚ್ ಸಂದರ್ಭಾರ್ ಪಾಟ್ಲ್ಯಾ ವರ್ಸಾ ಸಂಸಾರಾಕ್ ಆದೇವ್ಸ್ ಮಾಗಲ್ಲೆ ಕವಿ ಎಮ್. ಪಿ. ರೊಡ್ರಿಗಸ್, ಪಂಚು ಬಂಟ್ವಾಳ್, ಅನಂತ್ ಭಟ್ ಕೊಚ್ಚಿ ಆನಿ ಸಿಕೆರಾಮ್ ಸುರತ್ಕಲ್ ಹಾಂಚ್ಯಾ ಆತ್ಮ್ಯಾಕ್ ಶಾಂತಿ ಲಾಭ್ಚ್ಯಾಕ್ ಜಮಲ್ಲ್ಯಾಂನಿ ಎಕಾ ಮಿನುಟಾಂಚೆಂ ಮಾಗ್ಣೆಂ ಭೆಟಯ್ಲೆಂ.

ಫೆಸ್ತಾಚೊ ಉಗ್ತಾವ್ಪಿ ಜಾವ್ನ್ ಡೆಲ್ಲಿಚ್ಯಾ ಫೊರ್ಚೂನ್ ಲೈಫ್ ವೆಲ್ತ್ ಪ್ರೈ.ಲಿ. ಕಂಪ್ಣೆಚೊ ದಿರೆಕ್ತೊರ್ ಆನಿ ದಾನಿ ಜೋಸೆಫ್ ಎಲಿಯಾಸ್ ಮಿನೇಜಸ್ ಹಾಜರ್ ಆಸಲ್ಲೊ. ಮುಖೆಲ್ ಸಯ್ರೊ ಜಾವ್ನ್ ಆಯಿಲ್ಲ್ಯಾ ಬಳ್ಳಾರಿಚೊ ಬಿಸ್ಪ್ ಹೆನ್ರಿ ಡಿಸೋಜಾನ್ ಕವಿತಾ ಟ್ರಸ್ಟಾಚಿ ತೊಕ್ಣಾಯ್ ಕರ‍್ನ್ ಬರೆಂ ಮಾಗ್ಲೆಂ. ದಿ ಎಕ್ಸ್‌ಪ್ರೆಶನ್ಸ್ ಅಧ್ಯಕ್ಷ್ ಪ್ರವೀಣ್ ಕಾರ್ವಾಲ್ಲೊ, ಕವಿತಾ ಟ್ರಸ್ಟ್ ಅಧ್ಯಕ್ಷ್ ಕಿಶೂ ಬಾರ್ಕೂರ್, ಕಾರ್ಯದರ್ಶಿ ಎವ್ರೆಲ್ ರೊಡ್ರಿಗಸ್, ಘರ‍್ಚಿಂ ಯೆಜ್ಮಾನ್-ಯೆಜ್ಮಾನಿ ಸುಜಾತಾ ಆನಿ ಆಲ್ವಿನ್ ಆಂದ್ರಾದೆ ವೆದಿಚೆರ್ ಹಾಜರ್ ಆಸ್‌ಲ್ಲಿಂ.

ದೀಸ್ ಭರ್ ಕಾವ್ಯಾಳ್ ಸಜೊವ್ಣಿ:

ಉಪ್ರಾಂತ್ ಡೊಲ್ಪಿ ಮಸ್ಕರೇನ್ಹಸ್ ಆನಿ ಪಂಗ್ಡಾ ಥಾವ್ನ್ ಪಾಳ್ಣ್ಯಾ ಗಿತಾಂ ಆನಿ ವೊವಿಯೊ ವೆರ್ಸಾಂಚೆಂ ಸಾದರ್ಪಣ್ ಚಲ್ಲೆಂ.

’ಮ್ಹಜಿ ಜೀಣ್, ಮ್ಹಜಿ ಕವಿತಾ’ ಕಾರ್ಯಾಂತ್ ಪುರಸ್ಕೃತ್ ಸಮೀವುಲ್ಲಾ ಬರ್ಮಾವರ್ ಹಾಚೆಸವೆಂ ಡೊ. ರಾಜಯ್ ಪವಾರ್ ಹಾಣೆಂ ಕೆಲ್ಲಿ ಭಾಸಾಭಾಸ್ ಚಲಯ್ಲಿ. ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಮಾನೆಸ್ತಾಂಚಿ ವಳಖ್ ಕರುನ್ ದಿಲಿ.

ಮಾಗಿರ್ ವಾಚ್ಪಿ ಅನ್ವೇಶಾ ಸಿಂಗ್‌ಬಾಳ್ ಹಿಣೆಂ ಕವಿ ಸ್ಮಿತಾ ಶೆಣೈ ಹಿಚೆಲಾಗಿಂ ಸಂವಾದ್ ಚಲಯ್ಲೊ.

ದೊನ್ಪಾರಾಂ ಜೆವ್ಣಾಪಯ್ಲೆಂ ಚಲಲ್ಲೆ ಉಗ್ತೆ ಕವಿತಾ ಮಾಂಚಿಯೆಂತ್ 14 ಕವಿಂನಿ ಭಾಗ್ ಘೆತ್ಲೊ. ಪಿಯುಸ್ ಜೇಮ್ಸ್ ಕರುಗಳ್ನಡೆ, ಫ್ಲಾವಿಯಾ ಆಲ್ಬುಕರ್ಕ್, ಜುಲಿಯೆಟ್ ಮೊರಾಸ್, ಮರಿಯಾ ಪಿಂಟೊ, ನವೀನ್ ಕುಲ್ಶೇಕರ್, ಸಲೊಮಿ ಮಿಯಾಪದವ್, ವನಿತಾ ಮಾರ್ಟಿಸ್, ಜೊಯ್ಸ್ ಪಿಂಟೊ, ಜಿತಾ ಗೊನ್ಸಾಲ್ವಿಸ್, ಶಬ್ಬೀರ್ ಆಜಾಯ್ವ್, ಸಾದಿಕ್ ಅಸರ್ಮಠ್, ನೌಫಿಲ್ ದಾಮುದಿ, ಪ್ರಮಿಳಾ ರೆಂಜಾಲ್, ಕ್ಲೊಡಿ ಬ್ರಹ್ಮಾವರ್ ಹಾಂಣಿ ಸಗ್ಳ್ಯಾಂಚಿಂ ಮನಾಂ ವೊಡ್ಲಿಂ.

ವಿಶೇಸ್ ಜಾವ್ನ್ ಕೆಲ್ಲೆ ಪತ್ರಾಡೆ, ಕುಂಕಡ್ ಸುಕೆಂ, ವೋರ್ನ್ ಆನಿ ಪುರಣ್-ಪೊಳಿ ಮ್ಹಣ್ತಾನಾ ದೊನ್ಪಾರಾಂಚೆಂ ರುಚಿಕ್, ಫೆಸ್ತಾ ಶೈಲೆಚೆಂ ಜೆವಣ್ ಗಡ್ದ್ ಆಸಲ್ಲೆಂ.

ದೊನ್ಪಾರಾಂ ಉಪ್ರಾಂತ್ ಸಾಹಿತ್ಯ್ ಅಕಾಡೆಮಿಚ್ಯಾ ಜೋಡ್ ಪಾಲ್ವಾನ್ ಯುವ ಕವಿಂ ಥಾವ್ನ್ ಕವಿತಾ ಸಾದರೀಕರಣ್ ಚಲ್ಲೆಂ. ಆಂಡ್ರ್ಯೂ ಎಲ್ ಡಿಕುನ್ಹಾಚ್ಯಾ ಅಧ್ಯಕ್ಷ್‌ಪಣಾರ್ ಚಲ್ಲೆಲ್ಯಾ ಹ್ಯಾ ಸಾದರೀಕರಣಾಂತ್ ಅಂತರಾ ಭಿಡೆ, ವೆಂಕಟೇಶ್ ನಾಯಕ್, ಸುಪ್ರಿಯಾ ಕಾಣ್‌ಕೋಣ್‌ಕಾರ್ ಆನಿ ಅಮೇಯ್ ನಾಯ್ಕ್ ಹಾಂಣಿ ಕವಿತಾ ಸಾದರ್ ಕೆಲ್ಯೊ. ಕೊಂಕ್ಣಿ ಭಾಶಾ ಸಲ್ಲಾಗಾರ್ ಮಂಡಳಾಚೊ ನಿಮಂತ್ರಕ್ ಮೆಲ್ವಿನ್ ರೊಡ್ರಿಗಸಾನ್ ಕಾರ್ಯಾವಿಶಿಂ ಮಾಹೆತ್ ದಿಲಿ ತರ್, ಸಾಂದೊ ಸ್ಟ್ಯಾನಿ ಬೇಳಾನ್ ಆಭಾರ್ ಮಾಂದ್ಲೊ. ಫೆಲ್ಸಿ ಲೋಬೊನ್ ಕವಿಂಚಿ ವಳಖ್ ಕರುನ್ ದಿಲಿ.

ಫ್ರಾಂಕ್ಲಿನ್ ಫೆರ್ನಾಂಡಿಸ್ ಆನಿ ಪಂಗ್ಡಾಚ್ಯಾ ಯುವ ಗಾವ್ಪ್ಯಾಂ ಥಾವ್ನ್ ಮನಾಂ ಖುಶಾಲಾಂವ್ಚಿಂ ಪದಾಂ ಸಾದರ್ ಜಾಲಿಂ.

ಜೈತೆವಂತ್ ಸೊಂಪ್ಣಿ:

ಸಮಾರೋಪ್ ಸುವಾಳ್ಯಾಕ್ ಮುಖೆಲ್ ಸಯ್ರೊ ಸಾಹಿತ್ಯ್ ಅಕಾಡೆಮಿಚ್ಯಾ ಸಾಭಾರ್ ಮಂಡಳಾಚೊ ವಾಂಗ್ಡಿ ಡೊ ಪೂರ್ಣಾನಂದಾ ಚಾರಿ, ಕಾಣಕೊಣಾಂತ್ಲ್ಯಾ ಶ್ರೀ ಮಲ್ಲಿಕಾರ್ಜುನ್ ಆನಿ ಶ್ರೀ ಚೇತನ್ ಮಂಜು ದೇಸಾಯಿ ಕೊಲೆಜಿಚ್ಯಾ ಹಿಂದಿ ವಿಭಾಗಾಚಿ ಮುಖೆಲಿ, ಡೊ ರೂಪಾ ಚಾರಿ, ಸಾಸ್ತಾನ್ ಸಾಂತ್ ಆಂತೊನಿ ಫಿರ್ಗಜೆಚೊ ವಿಗಾರ್ ಮಾ.ಬಾ. ಸುನೀಲ್ ಡಿಸಿಲ್ವಾ, ಪುರಸ್ಕೃತ್ ಸಯ್ಯದ್ ಸಮೀವುಲ್ಲಾ ಬರ್ಮಾವರ್, ಲೇಖಕಿ ಸ್ಮಿತಾ ಶೆಣೈ ಹಾಂಣಿ ಅಧ್ಯಕ್ಷ್ ಕಿಶೂ ಬಾರ್ಕೂರ್ ಆನಿ ಕಾರ್ಯದರ್ಶಿ ಎವ್ರೆಲ್ ರೊಡ್ರಿಗಸ್ ಹಾಜರ್ ಆಸ್ಲಿಂ.

ಪಯ್ಲೆಂ ಸ್ಮಿತಪ್ರಜ್ಞ ಹಿಣೆಂ ಲಿಖುನ್ ಕವಿತಾ ಟ್ರಸ್ಟಾನ್ ಪರ್ಗಟ್ಲಲೊ ’ಸ್ವರ್ಗಾಚಿ ಪಕ್ಷಿ’ ಕವಿತಾ ಪುಂಜೊ ಲೊಕಾರ್ಪಣ್ ಜಾಲೊ. ಟ್ರಸ್ಟಿ ವಿತೊರಿ ಕಾರ್ಕಳಾನ್ ಬುಕಾಚಿ ವಳಖ್ ಕರುನ್ ದಿಲಿ. ಕವಯಿತ್ರಿ ಸ್ಮಿತಾ ಶೆಣೈನ್ ಆಪ್ಲ್ಯಾ ಪ್ರೇರಣಾಂಚೊ ಕವಿತಾ ಟ್ರಸ್ಟಾಚೊ ಪಾಟಿಂಬೊ ಉಲ್ಲೇಕ್ ಕರುನ್, ಆವ್ಕಾಸಾ ಖಾತಿರ್ ಆಭಾರ್ ಮಾಂದ್ಲೊ.

ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ನವಾಯತಿ ಕವಿ ಸಯ್ಯದ್ ಸಮಿವುಲ್ಲಾ ಬರ್ಮಾವರ್ ಹಾಕಾ ವೆದಿ ವಯ್ಲ್ಯಾ ಸಯ್ರ್ಯಾಂನಿ ಹಾತಾಂತರ್ ಕೆಲೊ. ಸ್ಟ್ಯಾನಿ ಬೇಳಾನ್ ಪುರಸ್ಕಾರಾವಿಶಿಂ ಮಾಹೆತ್ ದಿಲಿ ತರ್, ಟ್ರಸ್ಟಿ ಆಂಡ್ರ್ಯೂ ಎಲ್ ಡಿಕುನ್ಹಾನ್ ಮಾನ್ ಪತ್ರ್ ವಾಚ್ಲೆಂ. ಶ್ಹೆಲೊ, ಮೊಗ್ರ್ಯಾಂ ಝೆಲೊ, ಮಾನ್-ಪತ್ರ್, ಯಾದಿಸ್ತಿಕಾ ಆನಿ ರು 25,000/- ಆಟಾಪ್ಚೊ ಹೊ ಪುರಸ್ಕಾರ್ ಕುಪ್ಪೆಪದವುಚ್ಯಾ ಜೊಸೆಫ್ ಮಥಾಯಸ್ ಆನಿ ಕುಟ್ಮಾಚ್ಯಾ ನಾಂವಾನ್ ದಿಂವ್ಚೊ. ಪ್ರಶಸ್ತಿ ಸ್ವೀಕಾರ್ ಕರ‍್ನ್ ಸಮೀವುಲ್ಲಾನ್ ಆಪ್ಲಿಂ ಭೊಗ್ಣಾಂ ಉಚಾರ‍್ಲಿಂ.

ಫಾದರ್ ಸುನೀಲ್ ಡಿಸಿಲ್ವಾ ಆನಿ ಡೊ ರೂಪಾ ಚಾರಿ ಹಾಣಿಂ ಆಪ್ಲೊ ಸಂದೇಶ್ ದೀವ್ನ್ ಕವಿತಾ ಫೆಸ್ತಾಕ್ ಆನಿ ಟ್ರಸ್ಟಾಕ್ ಬರೆಂ ಮಾಗ್ಲೆಂ. ದಿ ಎಕ್ಸ್‌ಪ್ರೆಶನ್ಸ್ ಉಪಾಧ್ಯಕ್ಷ್ ಶ್ವೇತಾ ಪಿಂಟೊ ಹಿಣೆಂ ಕವಿತಾ ಫೆಸ್ತ್ ಗದ್ದಾಳಾಯೆನ್ ಆಚರುಂಕ್ ಕಾರಣ್ ಜಾಲ್ಲ್ಯಾ ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ.

ಸಗ್ಳ್ಯಾ ದಿಸಾಚೆಂ ಕಾರ್ಯೆಂ ಸೊಭಿತ್ ರಿತಿನ್ ಸ್ಟೀವನ್ ಲುವಿಸ್ ಮಟ್ಪಾಡಿ ಹಾಣೆಂ ಚಲೊವ್ನ್ ವೆಲೆಂ.