ಬಾರ್ಕೂರ್ ಕವಿಗೋಶ್ಟಿಂತ್ ಕೊಂಕಣಿ ಕವಿತೆಚಿ ಅಮೃತ್ ಝರ್ ವ್ಹಾಳ್ಳಿ
ಕವಿತಾ ಟ್ರಸ್ಟಾನ್ ಪಿಯುಸ್ ಜೇಮ್ಸ್ ಆನಿ ಆಲಿಸ್ ಡಿಸೋಜಾ ಹಾಂಚ್ಯಾ ಬಾರ್ಕೂರ್ಚ್ಯಾ ಘರ್ಚ್ಯಾ ಆಂಗ್ಣಾಂತ್ ಮಾಂಡುನ್ ಹಾಡಲ್ಲಿ, ’ಕವಿತಾ ಝರೊ' ಕಾರ್ಯಾವಳ್ ನವೆಂಬರ್ 15, 2025 ತಾರಿಕೆರ್ ಸಾಂಜೆಚ್ಯಾ ಚ್ಯಾರ್ ವೊರಾರ್ ಚಲ್ಲಿ. ಫ್ರಾಂಕ್ಲಿನ್ ಫೆರ್ನಾಂಡಿಸಾನ್ ಕಾರ್ಯಾಚೆ ಸುರ್ವೆರ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ ಆನಿ ಬಾರ್ಕೂರ್ ತಶೆಂ ಕವಿತಾ ಟ್ರಸ್ಟ್ ಹಾಂಚೆ ಮದ್ಲೊ ಬಾಂದ್ ಆದಿಂ ಥಾವ್ನ್ ಬಳ್ವಂತ್ ಉರ‍್ಲಾ ಮ್ಹಣುನ್ ಸಾಂಗ್ಲೆಂ.
ಆಪ್ಲ್ಯಾ ಪ್ರಾಸ್ತಾವಿಕ್ ಭಾಶಣಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಟ್ರಸ್ಟಾಚೆಂ ಮಿಸಾಂವ್ ತಶೆಂ ಯೆದೊಳ್ ಕೆಲ್ಲ್ಯಾ ಸಾಧನಾವಿಶಿಂ ವಿವರ್ ದಿಲೊ. ಸಗ್ಳ್ಯಾಂಲಾಗಿಂ ಸಾಂಗುಂಕ್ ಆಸ್ಚ್ಯೊ ಕಥಾ ಆಸ್ತಾತ್, ಕಾಂಯ್ ಥೊಡ್ಯೊ ಕಥಾ ಸಾಂಗುಂಕ್ ಉತ್ರಾಂ ಉಣಿಂ ಪಡ್ತಾತ್. ತಸಲ್ಯಾ ಸಂದರ್ಭಾರ್ ಅಪ್ರೂಪಾಚಿಂ ರೂಪಕಾಂ ವಾಪರುನ್ ಕವಿ ಕಾಳ್ಜಾಂಮೆರೆನ್ ಪಾವೊಂಕ್ ಸಕ್ತಾ. ಹಿ ಆಸಾ ತಾಚಿ ಸಕತ್ - ಮ್ಹಣುನ್ ತಾಣೆ ದಾಕ್ಲೆ ದೀವ್ನ್ ಸಾಂಗ್ಲೆಂ.
ಕವಿಗೋಶ್ಟಿಚೆಂ ಅಧ್ಯಕ್ಷ್‌ಪಣ್, ಕವಿ ತಶೆಂ ವಿಮರ್ಶಕ್ ಎಚ್ಚೆಮ್ ಪೆರ್ನಾಳಾನ್ ಘೆತಲ್ಲೆಂ. ಆಪ್ಲ್ಯಾ ಅಧ್ಯಕ್ಷೀಯ್ ಭಾಶಣಾಂತ್ ಕವಿತಾ ರಚ್ತಲ್ಯಾಕ್ ಅನ್ಭೋಗ್ ಆಸಜಾಯ್ ಪಡ್ತಾ, ಮಾಗಿರ್ ತಸಲ್ಯಾಚ್ ಅನ್ಭೋಗಾಚ್ಯಾ ಸಂದರ್ಭಾಂತ್ ಪಾಶಾರ್ ಜಾತಾನಾ, ತಾಚ್ಯಾ ಸಂವೇದನಾಕ್ ಲಾಗುನ್ ಕವಿತಾ ಮ್ಹಳ್ಳಿ ಸಂರಚನಾ ಭುಂಯ್ ಪಡ್ತಾ ಮ್ಹಣುನ್ ಸೊಬೀತ್ ರಿತಿನ್ ತಾಣೆಂ ಸಾಂಗ್ಲೆಂ. ಮುಕಾರಿಂ ಉಲೊವ್ನ್ ಆಯ್ಚ್ಯಾ ಕಾಳಾರ್ ಪ್ರಜಾಸತ್ತಾ ಜಿವಿ ದವರ‍್ಲ್ಯಾ ಜಾಲ್ಯಾರ್ ತಿ ಕೊಮೆಡಿಯನ್ಸಾಂನಿ. ಪುಣ್ ಆಯ್ಲೆವಾರ್ ತಾಂಚೆಂ ಬಳ್ ಲೆಗುನ್ ಮೊಡ್ಚೆಂ ಪ್ರೇತನ್ ಚಲುನ್ ಆಸಾ. ಕವಿಂನಿ ಸಗ್ಳ್ಯಾಂನಿ ಸಾಂಗಾತಾ ಮೆಳುನ್ ಅನೀತೆವಿರೋಧ್ ಎಕ್ಟಾಂಯ್ ಜಾವ್ನ್ ತಾಳೊ ಉಬಾರಿಜಾಯ್ ಮ್ಹಣುನ್ ತಾಣೆಂ ಆಗ್ರೊ ಕೆಲೊ.
ಜಿತಾ ಗೊನ್ಸಾಲ್ವಿಸಾನ್ ದರ್ಯಾಕ್ ಪಾಗುಂಕ್ ಗೆಲ್ಲ್ಯಾ ದಾದ್ಲ್ಯಾಕ್ ಘರಾಭಿತರ್ ರಾಕೊನ್ ಆಸ್ಚೆ ಬಾಯ್ಲೆಚೆಂ ಕಾಳೀಜ್ ದಾಕೊಂವ್ಚಿ ’ದಿಸಾಪೋಡ್’ ಕವಿತಾ ತಶೆಂಚ್ ಮೊನೆಪಣಾಚೊ ಸಾಂಗಾತ್ ಸೊದುನ್ ಆಸ್ಚ್ಯಾ ಮನ್ಶಾಚಿ 'ಹಾಂವ್ ಆನಿ ತೆಂ' ಕವಿತಾ ಸಾದರ್ ಕೆಲಿ.
ಹೆನ್ರಿ ಲುವಿಸಾನ್ ಆಪ್ಲ್ಯಾ ಗಾಂವಾಚೊ ವಿವರ್ ದಿಂವ್ಚಿ ’ಗಾಂವ್' ಆನಿ ಏಕ್ ಹಾಸ್ಯ್ ಕವಿತಾ ವಾಚುನ್ ದಾಕಯ್ಲಿ. ವನಿತಾ ಗೊನ್ಸಾಲ್ವಿಸಾನ್ ಪರಿಸರ್, ರಾನ್, ಪ್ರಕೃತಿ ನಾಸ್ ಕರುನ್ ಆಯಿಲ್ಲ್ಯಾ ಮನ್ಶಾಂಕ್ ದಾಕೊಂವ್ಚಿ ’ತಾಂಣಿ ಖಾವ್ನ್ ಮುಗ್ದಿಲಾಂ’ ಆನಿ ಧಾರುಣ್ ಲೆಖಲ್ಲ್ಯಾ ಮನ್ಶಾಚೆಂ ಮೊವಾಳ್ ಕಾಳೀಜ್ ದಾಕೊಂವ್ಚಿ ’ಗುಜ್ರಿ ಆಂಗ್ಡಿಚೊ ಧನಿ’ ಕವಿತಾ ವಾಚುನ್ ಸಾಂಗ್ಲಿ.
ಪಿಜೆ ಕರುಗಳ್ನಡೆನ್ ರಗ್ತಾಪಾತಾಚ್ಯಾ, ಅತ್ತ್ಯಾಚಾರಾಚ್ಯಾ ಕಾಳಾಕ್ ಬೋಟ್ ದಾಕೊವ್ನ್ ಹೆಂ ಆಡಾಯ್ನಾಸ್ಚೊ ದೇವ್ ಆಪ್ಣಾಕ್ ನಾಕಾ ಸಾಂಗ್ಚಿ ’ರಗತ್ ವ್ಹಾಳೊಂವ್ಚೊ ದೇವ್’ ಕವಿತಾ ಆನಿ ’ನಿರಾಸ್' ನಾಂವಾಚಿ ಕವಿತಾ ಪೇಶ್ ಕೆಲಿ. ಫೆಲ್ಸಿ ಲೋಬೊನ್ ಗಾಜಾಚ್ಯಾ ಹತ್ತ್ಯಾಕಾಂಡಾಚೆರ್ ನದರ್ ಘಾಲ್ಚಿ ’ಭುಕೆಚಿ ಗಾಜ್’ ಕವಿತಾ ವಾಚ್ತಚ್, ಎರಿಕ್ ಸೋನ್ಸಾನ್ ’ಎಕಾ ಪಾಯ್ನೆಲಾಚಿ ಕಥಾ ಆನಿ ಇಮಾಜಿಚೊ ಫ್ರೇಮ್’ ಕವಿತಾ ಸಾದರ್ ಕೆಲಿ.
ಕಿಶೂ ಬಾರ್ಕೂರಾನ್ ’ಆಸಲ್ಲೆಂ ಆಸಲ್ಲೆಬರಿ’ ಆನಿ ಮಹಮ್ಮೂದ್ ಡಾರ್ವಿಶಾಚಿ ’ಹಾಂವ್ ಜುಜೆ, ಬಾಪಾ' ನಾಂವಾಚಿ ಅನುವಾದಿತ್ ಕವಿತಾ ವಾಚ್ಲಿ.
ಮೆಲ್ವಿನ್ ರೊಡ್ರಿಗಸಾನ್ ಸಗ್ಳ್ಯಾ ಕವಿಂಚೊ ಉಪ್ಕಾರ್ ಭಾವುಡ್ಲೊ. ಟಸ್ಟಿ ಆನಿ ಖಜಾನಿ, ಕಿಶೂ ಬಾರ್ಕೂರಾನ್ ಕವಿಗೋಷ್ಟಿಂತ್ ಭಾಗ್ ಘೆತಲ್ಲ್ಯಾ ಕವಿಂಕ್ ಕವಿತಾ ಟ್ರಸ್ಟಾಚಿಂ ಪುಸ್ತಕಾಂ ಭೆಟ್‍ವಸ್ತ್ ಜಾವ್ನ್ ದಿಲಿಂ. ಬಾರ್ಕುರ್, ಬ್ರಹ್ಮಾವರ್ ಆನಿ ಆಸ್ಪಾಸ್ಚೊ ಲೋಕ್ ಹ್ಯಾ ಕಾರ್ಯಾಕ್ ಹಾಜರ್ ಆಸಲ್ಲೊ.
-ತಸ್ವಿರ‍್ಯೊ: ಆಲ್ಫೋನ್ಸ್ ಪಾಂಗ್ಳಾ
बारकूर कवीगोश्टींत कोंकणी कवितेची अमृत झर व्हाळ्ळी
कविता ट्रस्टान पियूस जेम्स आनी आलीस डिसोजा हांच्या बारकूरच्या घरच्या आंगणांत मांडून हाडल्ली, ’कविता झरो' कार्यावळ न्होवेंबर 15, 2025 तारकेर सांजेच्या च्यार वरार चल्ली. फ्रांक्लीन फॅर्नांडिसान कार्याचे सुरवेर सगळ्यांक येवकार मागलो आनी बारकूर तशें कविता ट्रस्ट हांचे मदलो बांद आदीं थावन बळवंत उरला म्हणून सांगलें.
आपल्या प्रास्तावीक भाशणांत कविता ट्रस्ट अध्यक्ष मेल्विन रोड्रीगसान ट्रस्टाचें मिसांव तशें येदोळ केल्ल्या साधनाविशीं विवर दिलो. सगळ्यांलागीं सांगूंक आसच्यो कथा आसतात, कांय थोड्यो कथा सांगूंक उतरां उणीं पडतात. तसल्या संदर्भार अपरूपाचीं रूपकां वापरून कवी काळजांमेरेन पावोंक सकता. ही आसा ताची सकत - म्हणून ताणे दाकले दीवन सांगलें.
कवीगोश्टीचें अध्यक्षपण, कवी तशें विमर्शक एच्चेम पेर्नाळान घेतल्लें. आपल्या अध्यक्षीय भाशणांत कविता रचतल्याक अनभोग आसजाय पडता, मागीर तसल्याच अनभोगाच्या संदर्भांत पाशार जाताना, ताच्या संवेदनाक लागून कविता म्हळ्ळी संरचना भुंय पडता म्हणून सोबीत रितीन ताणें सांगलें. मुकारीं उलोवन आयच्या काळार प्रजासत्ता जिवी दवरल्या जाल्यार ती कॉमेडियन्सांनी. पूण आयलेवार तांचें बळ लेगून मोडचें प्रेतन चलून आसा. कविंनी सगळ्यांनी सांगाता मेळून अनीतेविरोध एकटांय जावन ताळो उबारीजाय म्हणून ताणें आग्रो केलो.
जिता गोन्साल्विसान दर्याक पागूंक गेल्ल्या दादल्याक घराभितर राकोन आसचे बायलेचें काळीज दाकोंवची ’दिसापोड’ कविता तशेंच मोनेपणाचो सांगात सोदून आसच्या मनशाची 'हांव आनी तें' कविता सादर केली.
हेन्री लुविसान आपल्या गांवाचो विवर दिंवची ’गांव' आनी एक हास्य कविता वाचून दाकयली. वनिता गोन्साल्विसान परीसर, रान, प्रकृती नास करून आयल्ल्या मनशांक दाकोंवची ’तांणी खावन मुगदिलां’ आनी धारूण लेखल्ल्या मनशाचें मोवाळ काळीज दाकोंवची ’गुज्री आंगडीचो धनी’ कविता वाचून सांगली.
पि.जे. करुगळनडेन रगतापाताच्या, अत्त्याचाराच्या काळाक बोट दाकोवन हें आडायनासचो देव आपणाक नाका सांगची ’रगत व्हाळोंवचो देव’ कविता आनी ’निरास' नांवाची कविता पेश केली. फेल्सी लोबोन गाजाच्या हत्त्याकांडाचेर नदर घालची ’भुकेची गाज’ कविता वाचतच, एरीक सोन्सान ’एका पायनेलाची कथा आनी इमाजीचो फ्रेम’ कविता सादर केली.
किशू बारकूरान ’आसल्लें आसल्लेबरी’ आनी महम्मूद डार्विशाची ’हांव जुजे, बापा' नांवाची अनुवादीत कविता वाचली.
मेल्विन रोड्रीगसान सगळ्या कविंचो उपकार भावुडलो. टस्टी आनी खजानी, किशू बारकूरान कवीगोश्टींत भाग घेतल्ल्या कवींक कविता ट्रस्टाचीं पुस्तकां भेटवस्त जावन दिलीं. बारकूर, ब्रह्मावर आनी आसपासचो लोक ह्या कार्याक हाजर आसल्लो.
-तस्वीर्यो: आल्फोन्स पांगळा