ವಿಸಾವ್ಯಾ ವರ್ಸಾಚ್ಯಾ ಸಂಭ್ರಮಾಂತ್ ಕವಿತಾ ಫೆಸ್ತ್

ಕೊಂಕಣಿ ಕವಿತೆಕ್ ಸಾಹಿತೀಕ್ ಉಂಚಾಯ್ ಜೊಡುನ್ ದಿಲ್ಲ್ಯಾ ಕವಿತಾ ಟ್ರಸ್ಟಾಚೆಂ ’ಕವಿತಾ ಫೆಸ್ತ್' ಹ್ಯಾ ವರ್ಸಾ ವಿಸಾಂಚ್ಯಾ ಹುಂಬ್ರಾರ್ ಉಬೆಂ ರಾವ್ಲಾಂ. ಜನೆರ್ 11, 2026 ತಾರಿಕೆರ್ ಸಾಂ. ಲುವಿಸ್ (ಪರಿಗಣಿತ್ ವಿಶ್ವವಿದ್ಯಾಲಯ್) ಹಾಂಗಾಚ್ಯಾ ಮದರ್ ತೆರೆಸಾ ಪೀಸ್ ಪಾರ್ಕಾಂತ್ ಸಕಾಳಿಂ ಸಾಡೆ-ನೋವ್ ಥಾವ್ನ್ ಸಾಂಜೆರ್ ಸಾಡೆ-ಚ್ಯಾರ್ ಪರ್ಯಾಂತ್ ಕೊಂಕಣಿ ಕವಿತೆಚೊ ಹೊ ಉತ್ಸವ್ ಚಲ್ತಲೊ. ಕವಿ, ಕಾವ್ಯರಸಿಕ್ ನ್ಹಯ್ ಆಸ್ತಾಂ ಕೊಂಕಣಿ ಭಾಶೆಚೊ ಮೋಗ್ ಆಸ್ಚ್ಯಾ ಕೊಣೇಂಯ್ ಹ್ಯಾ ಉತ್ಸವಾಂತ್ ಭಾಗ್ ಘೆವ್ಯೆತಾ.

ಸಕಾಳಿಂ ಬ್ಯಾಂಡಾಚ್ಯಾ ಪುರ್ಶಾಂವಾರ್ ಟಾಗೋರ್ ಪಾರ್ಕಾಥಾವ್ನ್ ಮದರ್ ತೆರೆಸಾ ಪೀಸ್ ಪಾರ್ಕಾಕ್ ಪುರ್ಶಾಂವ್ ಆಸುನ್, ಸಾಂ. ಲುವಿಸ್ (ಪರಿಗಣಿತ್ ವಿಶ್ವವಿದ್ಯಾಲಯ್) ಉಪಕುಲಪತಿ ಫಾ. ಪ್ರವೀಣ್ ಮಾರ್ಟಿಸ್, ಪ್ರೊಫೆಸರ್ ಮರಿಯಾ ಡಿಕೊಸ್ತಾ ಹಾಂಚ್ಯಾ ಹಾಜರ‍್ಪಣಾಖಾಲ್ ಉಗ್ತಾವಣ್ ಸುವಾಳೊ ಚಲ್ತಲೊ.

ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಜೊಡ್ಪಿ ಕವಿ ವಲ್ಲಿ ವಗ್ಗ ಹಾಂಚೆಲಾಗಿಂ ಸಂವಾದ್, ಬಿರಿ ಬಿರಿ ಪಾವ್ಸ್ ಭುರ್ಗ್ಯಾಂಚ್ಯಾ ಆನಿ ಯುವಜಣಾಂಚ್ಯಾ ವಿಭಾಗಾಂತ್ ಫೈನಲಾಕ್ ಪಾವಲ್ಲ್ಯಾಂಚಿ ಕವಿಗೋಷ್ಟಿ, ರಂಗ ಅಧ್ಯಯನ ಕೇಂದ್ರಾ ಥಾವ್ನ್ ಕವಿತೆಚೆರ್ ಆಧಾರಲ್ಲೊ ನಾಟ್ಕುಳೊ, ಕೇಂದ್ರ್ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಜೊಡ್ಪಿ ಕವಿ ಪರೇಶ್ ಕಾಮತ್ ಹಾಚೆಲಾಗಿಂ ಕವಿಸಂಧಿ, ಉಗ್ತಿ ಕವಿಗೋಷ್ಟಿ - ಅಶೆಂ ಅಖ್ಖೊ ದೀಸ್ ಕವಿತೆಚೊ ಪಾವ್ಸ್ ಶಿಂವರ‍್ತಲೊ.

ಸಮಾರೋಪ್ ಸುವಾಳ್ಯಾಕ್ ಜ್ಞಾನಪೀಠ್ ಪುರಸ್ಕಾರ್ ಜೊಡ್ಪಿ ಕೊಂಕಣಿ ಲೇಖಕ್ ದಾಮೋದರ್ ಮಾವ್ಜೊ, ತಾಚಿ ಪತಿಣ್ ತಶೆಂ ಅನುವಾದ್‍ಕಾರ್ ಶೈಲಾ ಮಾವ್ಜೊ, ಕೊಂಕಣಿ ಲೇಖಕ್ ತಶೆಂ ಶಿಕ್ಷಕ್ ಫ್ರಾನ್ಸಿಸ್ ಡಿಕುನ್ಹಾ ಹಾಜರ್ ಆಸ್ತಲೆ. ಹ್ಯಾ ಸಂದರ್ಭಾರ್ ಫೆಲ್ಸಿ ಲೋಬೊಕ್ ಡೆನಿಸ್ ಆನಿ ಮೇರಿ ಡಿಕುನ್ಹಾ ಸ್ಮಾರಕ್ 2024ವ್ಯಾ ವರ್ಸಾಚೆಂ ಅತ್ಯುತ್ತಮ್ ಕವಿತಾ ಪುಸ್ತಕ್ ಇನಾಮ್, ವಲ್ಲಿ ವಗ್ಗಾಕ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್, ಬಿರಿ ಬಿರಿ ಪಾವ್ಸ್ ಕವಿತಾ ಸಾದರೀಕರಣ್ ಸರ್ತೆಂತ್ ಜಿಕ್ಲಲ್ಯಾಂಕ್ ಇನಾಮಾಂ ದಿತಲೆ.

ಹಾಜರ್ ಆಸ್ಚ್ಯಾ ಸಗ್ಳ್ಯಾಂಕ್ ಸಕಾಳಿಂ ನಾಸ್ಟೊ, ದೊನ್ಪಾರಾಂ ಜೆವ್ಣಾಚಿ ವಿಲೆವಾರಿ ಆಸ್ತಲಿ. ಪಯ್ಶಿಲ್ಯಾ ರಾಜ್ಯಾಂ ಥಾವ್ನ್ ಯೆತಲ್ಯಾಂಕ್ ರಾವ್ಪಾಚಿ ವೆವಸ್ಥಾಯ್ ಕೆಲ್ಯಾ.

विसाव्या वर्साच्या संभ्रमांत कविता फेस्त

कोंकणी कवितेक साहितीक उंचाय जोडून दिल्ल्या कविता ट्रस्टाचें ’कविता फेस्त' ह्या वर्सा विसांच्या हुंब्रार उबें रावलां. जानेर 11, 2026 तारकेर सां. लुवीस (परिगणीत विश्वविद्यालय) हांगाच्या मदर तेरेसा पीस पार्कांत सकाळीं साडे-नोव थावन सांजेर साडे-च्यार पर्‍यांत कोंकणी कवितेचो हो उत्सव चलतलो. कवी, काव्यरसीक न्हय आसतां कोंकणी भाशेचो मोग आसच्या कोणेंय ह्या उत्सवांत भाग घेव्येता.

सकाळीं बँडाच्या पुर्शांवार टागोर पार्कां थावन मदर तेरेसा पीस पार्काक पुर्शांव आसून, सां. लुवीस (परिगणीत विश्वविद्यालय) उपकुलपती फा. प्रवीण मार्टीस, प्रोफेसर मरिया डिकोस्ता हांच्या हाजरणाखाल उगतावण सुवाळो चलतलो.

मथायस कुटम कविता पुरस्कार जोडपी कवी वल्ली वग्गा हांचेलागीं संवाद, बिरी बिरी पावस भुरग्यांच्या आनी युवजाणांच्या विभागांत फैनलाक पावल्ल्यांची कविगोष्टी, रंग अध्ययन केंद्रा थावन कवितेचेर आधारल्लो नाटकुळो, केंद्र साहित्य अकादेमी पुरस्कार जोडपी कवी परेश कामत हाचेलागिं कविसंधी, उगती कविगोष्टी - अशें अख्खो दीस कवितेचो पावस शिंवरतलो.

समारोप सुवाळ्याक ज्ञानपीठ पुरस्कार जोडपी कोंकणी लेखक दामोदर मावजो, ताची पतीण तशें अनुवाद‍कार शैला मावजो, कोंकणी लेखक तशें शिक्षक फ्रान्सीस डिकुन्हा हाजर आसतले. ह्या संदर्भार फेल्सी लोबोक डेनीस आनी मेरी डिकुन्हा स्मारक 2024व्या वर्साचें अत्युत्तम कविता पुस्तक इनाम, वल्ली वग्गाक मथायस कुटम कविता पुरस्कार, बिरी बिरी पावस कविता सादरीकरण सर्तेंत जिकलल्यांक इनामां दितले.

हाजर आसच्या सगळ्यांक सकाळीं नास्तो, दोनपारां जेवणाची विलेवारी आसतली. पयशिल्या राज्यां थावन येतल्यांक रावपाची वेवस्थाय केल्या.