ಕುಡಲ್ ದೇಶಸ್ತ್ ಕೊಂಕಣಿ ಸಮುದಾಯಾ ಖಾತೀರ್ ಕವಿತಾ ಪಾಠ್

ಕುಡಲ್ ದೇಶಸ್ತ್ ಕೊಂಕಣಿ ಸಮುದಾಯಾ ಖಾತೀರ್ ಕವಿತಾ ಪಾಠ್

ಶ್ರೀ ಪೂರ್ಣನಂದಾ ಸೇವಾ ಪ್ರತಿಷ್ಠಾನ್ ಆನಿ ದಕ್ಷಿಣ ಕನ್ನಡ ಜಿಲ್ಲಾ ಕುಡಲ್ ದೇಶಸ್ತ ಆದ್ಯ ಗೌಡ ಬ್ರಾಹ್ಮಣ ಸಂಘ ಹಾಂಣಿ ವಿಶ್ವ ಕೊಂಕಣಿ ಕೇಂದ್ರಾಂತ್ ತಾಂಚ್ಯಾ ಸಮುದಾಯಾಚ್ಯಾ ಯುವಜಣಾಂ ಖಾತೀರ್ ಮಾಂಡುನ್ ಹಾಡಲ್ಲ್ಯಾ ಚ್ಯಾರ್ ದಿಸಾಂಚ್ಯಾ ಸಮಾವೇಶಾ ಮಧೆಂ ಕವಿತಾ ಟ್ರಸ್ಟಾ ತರ್ಫೆನ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಕೊಂಕಣಿ ಕವಿತೆವಿಶಿಂ ಮುಳಾವೆಂ ಗಿನ್ಯಾನ್ ಆಟಾಪ್ಚೆಂ ಸ್ಫೂರ್ತಿದಾಯಕ್ ಉಲೊವ್ಪ್ ಕೆಲೆಂ.

2026 ಜ್ಯೂನ್ ಮ್ಹಯ್ನ್ಯಾಚೆ 26 ತಾರಿಕೆರ್ ಸಾಂಜೆರ್ 6 ತೆಂ 7 ಪರ‍್ಯಾಂತ್ ಚಲಲ್ಲ್ಯಾ ಹ್ಯಾ ಮೆಳಾವ್ಯಾಂತ್ ಮೆಲ್ವಿನ್ ರೊಡ್ರಿಗಸಾನ್ ದರೆಕ್ಲ್ಯಾಂನಿ ತಾಂಚ್ಯಾ ಜಿವಿತಾಚೆಂ ಮಿಸಾಂವ್ ಆನಿ ಶೆವೊಟ್ ಕಿತೆಂ ಮ್ಹಳ್ಳೆಂ ಬೋವ್ ತರ‍್ನೆ ಪ್ರಾಯೆರಚ್ ನಿರ್ಧಾರ್ ಕರುಂಕ್ ಜಾಯ್ ಆನಿ ತಾಕಾ ಜಾಯ್ ತಿ ತಯಾರಾಯ್ ಸುರ‍್ವೆರ್ ಥಾವ್ನ್ ಕರ‍್ಚೆ ದಿಶೆನ್ ಗಿನ್ಯಾನ್ ಆಪ್ಣಾಂವ್ಕ್ ಜಾಯ್ ಮ್ಹಣುನ್ ಸಾಂಗ್ತಾನಾ ಕವಿತಾ ಟ್ರಸ್ಟಾಚೆಂ ಮಿಸಾಂವ್ ಆನಿ ಶೆವೊಟಾಚೊ ವಿವರ್ ದಿಲೊ.

ಮುಕಾರಿಂ ಉಲೊವ್ನ್ ತಾಣೆಂ ಕವಿತಾ ಮ್ಹಳ್ಯಾರ್ ಕಿತೆಂ, ಕವಿ, ಕವಿತಾ ಕಿತ್ಯಾ ಖಾತೀರ್ ಬರಯ್ತಾತ್ ಮ್ಹಣುನ್ ಸಾಂಗ್ಚೆ ಖಾತೀರ್ ಕಾಂಯ್ ಥೊಡೆ ನೀಜ್ ದಾಕ್ಲೆ ದಿಲೆ. ನಿಮಾಣೆಂ ಏಕ್ ಕವಿತಾ ಕಶಿ ಘಡ್ತಾ ಮ್ಹಳ್ಳೆಂ ಸಾಂಗುಂಕ್ ವಚುನ್, ಆಪ್ಲಿ ಸ್ವತಾಚಿ ’ಜುಗು ಜುಗು ಜಗತ್’ ಕವಿತಾ ಕಶಿ ಘಡ್ಲಿ ಮ್ಹಣುನ್ ತಾಣೆ ಸಾಂಗ್ಲೆಂ ಮಾತ್ರ್ ನ್ಹಯ್, ತಿ ಕವಿತಾ ಸಾದರ್ ಕೆಲಿ.

ಕುಡಲ್ ದೇಶಸ್ತ್ ಆದ್ಯ ಗೌಡ ಬ್ರಾಹ್ಮಣ್ ಸಮಾಜಾಚಿ ಮಾಂಯ್‍ಭಾಸ್ ಕೊಂಕಣಿ ಆನಿ ಹಾಜರ್ ಆಸಲ್ಲ್ಯಾ ಯುವಜಣಾಂಕ್ ಕೊಂಕಣಿ ಉಲೊಂವ್ಕ್ ಯೆತಾ ತರೀ, ತಿ ಬರೊಂವ್ಕ್, ವಾಚುಂಕ್ ಕಳಿತ್ ನಾ ಮ್ಹಳ್ಳೆಂ ಜಾಣಾ ಜಾವ್ನ್ ಮೆಲ್ವಿನಾಕ್ ಆಜ್ಯಾಪ್ ಜಾಲೆಂ. ಆಪ್ಲೆಂ ಹೆಂ ಉಲೊವ್ಪ್ ತಾಂಕಾಂ ಥೊಡ್ಯಾ ಮಾಪಾನ್ ತರೀ ಸ್ಫೂರ್ತಿ ದಿತಲೆಂ, ಕೊಂಕಣಿ ಮಾಂಯ್ ಭಾಶೆಚಿ ವೋಡ್ ಹಾಡಯ್ತಲೆಂ ಮ್ಹಳ್ಳೊ ಭರ್ವಸೊ ತಾಣೆಂ ವ್ಯಕ್ತ್ ಕೆಲೊ.

ಹ್ಯಾ ಸಂದರ್ಭಾರ್ ಶ್ರೀ ಪೂರ್ಣನಂದಾ ಸೇವಾ ಪ್ರತಿಷ್ಠಾನಾಚೊ ಅಧ್ಯಕ್ಷ್ ರಮೇಶ್ ನಾಯ್ಕ್, ಕಾರ್ಯದರ್ಶಿ ಡೊ. ವಿಜಯಲಕ್ಷ್ಮಿ ನಾಯ್ಕ್ ಹಾಜರ್ ಆಸಲ್ಲಿಂ.

कुडल देशस्त कोंकणी समुदाया खातीर कविता पाठ

श्री पूर्णनंदा सेवा प्रतिष्ठान आनी दक्षीण कन्नड जिल्ला कुडल देशस्त आद्य गौड ब्राह्मण संघ हांणी विश्व कोंकणी केंद्रांत तांच्या समुदायाच्या युवजणां खातीर मांडून हाडल्ल्या च्यार दिसांच्या समावेशा मधें कविता ट्रस्टा तर्फेन अध्यक्ष मेल्विन रोड्रीगसान कोंकणी कवितेविशीं मुळावें गिन्यान आटापचें स्फूर्तिदायक उलोवप केलें.

2026 ज्यून म्हयन्याचे 26 तारकेर सांजेर 6 तें 7 परयांत चलल्ल्या ह्या मेळाव्यांत मेल्विन रोड्रीगसान दरेकल्यांनी तांच्या जिविताचें मिसांव आनी शेवोट कितें म्हळ्ळें बोव तरने प्रायेरच निर्धार करुंक जाय आनी ताका जाय ती तयाराय सुरवेर थावन करचे दिशेन गिन्यान आपणावंक जाय म्हणून सांगताना कविता ट्रस्टाचें मिसांव आनी शेवोटाचो विवर दिलो.

मुकारीं उलोवन ताणें कविता म्हळ्यार कितें, कवी, कविता कित्या खातीर बरयतात म्हणून सांगचे खातीर कांय थोडे नीज दाकले दिले. निमाणें एक कविता कशी घडता म्हळ्ळें सांगुंक वचून, आपली स्वताची ’जुगू जुगू जगत’ कविता कशी घडली म्हणून ताणे सांगलें मात्र न्हय, ती कविता सादर केली.

कुडल देशस्त आद्य गौड ब्राह्मण समाजाची मांय‍भास कोंकणी आनी हाजर आसल्ल्या युवजणांक कोंकणी उलोवंक येता तरी, ती बरोवंक, वाचुंक कळीत ना म्हळ्ळें जाणा जावन मेल्विनाक आज्याप जालें. आपलें हें उलोवप तांकां थोड्या मापान तरी स्फूर्ती दितलें, कोंकणी मांय भाशेची वोड हाडयतलें म्हळ्ळो भर्वसो ताणें व्यक्त केलो.

ह्या संदर्भार श्री पूर्णनंदा सेवा प्रतिष्ठानाचो अध्यक्ष रमेश नायक, कार्यदर्शी डॉ. विजयलक्ष्मी नायक हाजर आसल्लीं.