ಪ್ರಕೃತೆ ಸೊಭಾಯೆಂತ್ ಫುಲ್ಲ್ಲೆಂ 20ವೆಂ ಕವಿತಾ ಫೆಸ್ತ್
ಕವಿತಾ ಟ್ರಸ್ಟಾಚ್ಯಾ ಕವಿತಾ ಆನಿ ಕವಿಂಕ್ ಸಂಭ್ರಮ್ಚ್ಯಾ ಕವಿತಾ ಫೆಸ್ತಾಕ್ ವೀಸ್ ವರ್ಸಾಂ ಸೊಂಪ್ಲಿಂ. ಕವಿಗೋಷ್ಟಿ, ಕವಿತಾ ಸಂವಾದ್, ಕೊಂಕ್ಣಿ ಕವಿತೆಕ್ ಲಗ್ತಿ ಜಾಲ್ಲೆ ಸ್ಪರ್ಧೆ, ಇನಾಮಾಂ, ವಾರ್ಷಿಕ್ ಕವಿತಾ ಪುರಸ್ಕಾರ್ ಮೆಳುನ್ ಕವಿತಾ ರಸಿಕಾಂಕ್ ಸಾಂಗಾತಾ ಹಾಡ್ಚೆಂ ಹೆಂ ಫೆಸ್ತ್ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ವಿವಿಧ್ ಕಾರಣಾಂಕ್ ಲಾಗುನ್ ವಿಭಿನ್ನ್ ಆನಿ ವಿಶೇಸ್ ಮ್ಹಣುನ್ ನಾಂವಾಡ್ಲಾಂ.
ಹ್ಯಾ ವರ್ಸಾಚೆಂ ಮ್ಹಣ್ಜೆ 20ವೆಂ ಕವಿತಾ ಫೆಸ್ತ್ ಮಂಗ್ಳುರಾಂತ್ಲ್ಯಾ ಸಾಂ ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯ್ ಆಂಗ್ಣಾಂತ್ಲ್ಯಾ ಮದರ್ ತೆರೆಸಾ ಪೀಸ್ ಪಾರ್ಕಾಂತ್ ಜನೆರ್ 11 ತಾರಿಕೆರ್ ವ್ಹಡಾ ದಬಾಜಾನ್ ಚಲ್ಲೆಂ. ಸಕಾಳಿಂ ಕೊಲೆಜಿಚ್ಯಾ 2 ನಂಬರ್ ಗೆಟಿಥಾವ್ನ್ ಪೀಸ್ ಪಾರ್ಕಾ ಪರ್ಯಾಂತ್ ಬೆಂಡಾ ವ್ಹಾಜ್ಪಾ ಸವೆಂ ಪುರ್ಶಾಂವ್ ಕಾಡ್ಚೆ ಮಾರಿಫಾತ್ ಫೆಸ್ತಾಚಿ ಅಧಿಕೃತ್ ಸುರ್ವಾತ್ ಜಾಲಿ. ಉಪ್ರಾಂತ್ ಮುಖೆಲ್ ಸಯ್ರೆ ಜಾವ್ನ್ ಪಾವ್ಲೆಲ್ಯಾ ಬಾಪ್ ಮೆಲ್ವಿನ್ ಡಿಕುನ್ಹಾ ಜೆಸ, ಪ್ರೊ ವೈಸ್ ಚಾನ್ಸಲರ್, ಸಾಂ ಲುವಿಸ್ ಪರಿಗಣಿತ್ ವಿಶ್ವ್ ವಿದ್ಯಾಲಯ್ ಆನಿ ಪ್ರೊ. ಮರಿಯಾ ಡಿಕೋಸ್ತಾ ಹಾಂಣಿ ಗುಲೊಬಾಂಚ್ಯೊ ಪಾಕ್ಳ್ಯೊ ವಾರ್ಯಾರ್ ಉಬೊಂವ್ಚೆ ಸವೆಂ ಕವಿತಾ ಫೆಸ್ತಾಕ್ ಅಧಿಕೃತ್ ಚಾಲನ್ ದಿಲೆಂ. ಸಾಂಗಾತಾ ಟ್ರಸ್ಟಿಂನಿ , ಪೋಷಕಾಂನಿ, ಹಿತೈಶಿಂನಿ ಉಗ್ತಾವಣ್ ಕಾರ್ಯಾಕ್ ಸಾಂಗಾತ್ ದಿಲೊ.
ಆಪ್ಲ್ಯಾ ಉಗ್ತಾವಣೆಚ್ಯಾ ಉಲೊವ್ಪಾಂತ್ ಮರಿಯಾ ಡಿಕೋಸ್ತಾನ್ ಕವಿತೆವಯ್ರ್ ಆಪ್ಲಿ ಅಭಿಪ್ರಾಯ್ ಉಚಾರುನ್ "ಕವಿತೆನ್ ಮ್ಹಜೆರ್ ವಿಶೇಸ್ ಪರಿಣಾಮ್ ಘಾಲ್ಲೊ ಆಸಾ. ಮ್ಹಜೆರ್ ಮಾತ್ರ್ ನ್ಹಯ್ ಸಗ್ಳ್ಯಾ ಸಂಸಾರಾನ್ ಕವಿತೆಚೊ ಭರ್ಮ್ ದೆಕ್ಲಲೊ ಆಸಾ, ತಿಚೊ ಪರಿಣಾಮ್ ಅನ್ಭೋಗ್ ಕೆಲ್ಲೊ ಆಸಾ. ಕವಿತಾ ಬರೊಂವ್ಚೆಂ ಆನಿ ವಾಚ್ಚೆಂಚ್ ಎಕೆ ರಿತಿಚೆಂ ಫೆಸ್ತ್ ತಶೆಂ ಜಾವ್ನ್ ಆಸಾ ಮ್ಹಣ್ ಸಾಂಗುಂಕ್ ಆಶೆತಾಂ. ಕವಿತಾ ಟ್ರಸ್ಟಾನ್ ಕವಿತಾ ಫೆಸ್ತಾ ಮುಖಾಂತ್ರ್ ಕವಿತೆಂಕ್, ಕವಿಂಕ್ ಆನಿ ಕವಿತಾ ಆಸ್ವಾದಕಾಂಕ್ ಎಕಾ ಪಾಕ್ಯಾ ಪೊಂದಾ ಹಾಡ್ಲಾಂ, ದೆಕುನ್ ಹೆಂ ಫೆಸ್ತ್ ಯಾದ್ಗಾರ್ ಆನಿ ಇತಿಹಾಸಾಚ್ಯಾ ಪಾನಾಂನಿ ಶಾಶ್ವತ್ ಉರ್ಚೆಂ ತಸಲೆಂ ಮ್ಹಣುಂಕ್ ಚಡ್ ಸಂತೊಸ್ ಪಾವ್ತಾಂ." ಮ್ಹಳ್ಳಿ ಅಭಿಪ್ರಾಯ್ ದಿಲಿ.
ಕವಿತಾ ಫೆಸ್ತಾಚ್ಯಾ ಮಹತ್ವಾವಿಶಿಂ ಉಲೊವ್ನ್ ಬಾಪ್ ಮೆಲ್ವಿನ್ ಡಿ ಕುನ್ಹಾನ್ "ಕವಿತಾ ಫೆಸ್ತಾಕ್ ಅವ್ಕಾಸ್ ಕರ್ನ್ ದಿಂವ್ಚೆ ಮಾರಿಫಾತ್ ಸಾಂ ಲುವಿಸ್ ಕೊಲೆಜಿಚ್ಯಾ ಹೆ ಶಾಂತೆ ಭಾಗೆಕ್ ವಿಶೇಸ್ ಅರ್ಥ್ ಆಯ್ಲಾ. ಪ್ರಕೃತೆಚೆ ಸೊಭಿತ್ ಪಾಸ್ಳೆರ್ ಹೆಂ ಫೆಸ್ತ್ ಚಲ್ತಾ ದೆಕುನ್ ಪರಿಸರಾಚೆಂ ರಕ್ಷಣ್ ಉಕಲ್ನ್ ಧರ್ಚ್ಯಾ ಕವಿತೆಂಕ್ ಆನಿ ಕವಿಂಕ್ ವಿಶೇಸ್ ಗೌರವ್ ಲಾಭ್ಲಾ. ಪರಿಸರ್, ರಾನ್ ಮ್ಹಣ್ತಾನಾ ಥಂಯ್ಸರ್ ಸರೊಪ್, ದಿವೊಡ್, ಅಗ್ಗ್ಯೊ ಆಸ್ಚೆಂ ಸಹಜ್. ಪುಣ್ ಎಕಾಮೆಕಾ ವಾಂದೆ ಜಾಯ್ನಾಸ್ತಾಂ ಜಿಯೆಂವ್ಚಿ ತಾಂಚಿ ಕಾಲೆತ್ ಆಮ್ಕಾಂ ಆದರ್ಶ್" ಮ್ಹಳ್ಳೊ ಸಂದೇಶ್ ದಿಲೊ.
ಉಗ್ತಾವಣ್ ಸುವಾಳ್ಯಾ ಉಪ್ರಾಂತ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಜೊಡ್ಲೆಲ್ಯಾ ಮ್ಹಾಲ್ಘಡೊ ಸಾಹಿತಿ ವಲ್ಲಿ ವಗ್ಗಾಲಾಗಿಂ ’ಮ್ಹಜೆಂ ಜಿವಿತ್, ಮ್ಹಜಿ ಕವಿತಾ’ ಮ್ಹಳ್ಳ್ಯಾ ವಿಶಯಾಚೆರ್ ಕವಿ ಆಂಡ್ರ್ಯೂ ಎಲ್ ಡಿ ಕುನ್ಹಾನ್ ಸಂವಾದ್ ಚಲಯ್ಲೊ. ಸಂವಾದಾಂತ್ ವಲ್ಲಿ ವಗ್ಗಾನ್ ಆಪ್ಣೆಂ ಲ್ಹಾನ್ ವ್ಹಡ್ ಜಾಲ್ಲ್ಯಾ ವಗ್ಗ ಮ್ಹಳ್ಳ್ಯಾ ಗಾಂವಾವಿಶಿಂ, ಆಪ್ಲ್ಯಾ ಸಾಹಿತ್ಯಾಂತ್ ದಾಖಲ್ ಜಾಲ್ಲ್ಯಾ ವಗ್ಗಾಚ್ಯಾ ಪರಿಸರಾವಿಶಿಂ, ರಾನ್ ಆನಿ ರಾನ್ವಟ್ ಮೊನ್ಜಾತಿಂವಿಶಿಂ ಉಲೊವ್ಪ್ ಸಾದರ್ ಕೆಲೆಂ. ಆಪ್ಲೆ ಸಾಹಿತಿಕ್ ಜಿಣ್ಯೆಂತ್ ಖಾಸ್ಗಿ ಜಿಣ್ಯೆಚ್ಯೊ ಗಜಾಲಿ ಮಿಸ್ಳೊನ್ ಗೆಲ್ಲೆವಿಶಿಂ ತಾಂಣಿ ಸುಡಾಳ್ ಮಾಹೆತ್ ದಿಲಿ.
ಉಪ್ರಾಂತ್ ಸಾಹಿತ್ಯ್ ಅಕಾಡೆಮಿ, ಡೆಲ್ಲಿಚ್ಯಾ ಸಹಯೋಗಾಖಾಲ್ ಚಲಲ್ಲ್ಯಾ ಕವಿಸಂಧಿ ಕಾರ್ಯಾಂತ್ ಗೊಂಯ್ಚೊ ಕವಿ ಪರೇಶ್ ಎನ್ ಕಾಮತಾನ್ ಆಪ್ಲ್ಯಾ ಕವಿತಾಂವಯ್ಲೆ ವಿಚಾರ್ ಸಾದರ್ ಕೆಲೆ ಆನಿ ಕವಿತಾ ಪೇಶ್ ಕೆಲ್ಯೊ. ಫೆಸ್ತಾಚೆ ವೆದಿರ್ ಬಿರಿಬಿರಿ ಪಾವ್ಸ್ ಟಿವಿ ರಿಯಾಲಿಟಿ ಶೋ-ಚ್ಯಾ ಫೈನಲ್ ಹಂತಾಕ್ ಪಾವ್ಲೆಲ್ಯಾ ಯುವ ಆನಿ ಭುರ್ಗ್ಯಾಂಚ್ಯಾ ವಿಭಾಗಾಂತ್ಲ್ಯಾ ಸ್ಪರ್ಧಿಕಾಂಚಿ ವಿಶೇಸ್ ಕವಿಗೋಷ್ಟಿ ಹಾಜರ್ ಆಸ್ಲೆಲ್ಯಾಂಚಿ ಮನಾಂ ಪಿಸ್ವೊಂವ್ಕ್ ಲಾಗ್ಲಿ.
ದೊನ್ಪಾರಾಂ ಜೆವ್ಣಾ ಉಪ್ರಾಂತ್ ಅಸ್ತಿತ್ವ (ರಿ) ಆನಿ ರಂಗ್ ಅಧ್ಯಯನ್ ಕೇಂದ್ರ್ ಸಾಂ ಲುವಿಸ್ ಪರಿಗಣಿತ್ ವಿಶ್ವ್ ವಿದ್ಯಾನಿಲಯಾಚ್ಯಾ ವಿದ್ಯಾರ್ಥಿಂ ಥಾವ್ನ್ ಕಾವ್ಯರಂಗ್ ಮ್ಹಳ್ಳೆಂ ಕಾರ್ಯೆಂ ಸಾದರ್ ಜಾಲೆಂ. ’ಆಬೊಲ್ಯಾ ತುಜೊ ರಂಗ್ ಉಜೊಗೊ’ ಮ್ಹಳ್ಳೆ ಕವಿತೆಥಾವ್ನ್ ಆರಂಭ್ ಜಾಲ್ಲ್ಯಾ ಕಾವ್ಯರಂಗಾಕ್ ಕ್ರಿಸ್ಟೋಫರ್ ನಿನಾಸಮ್ ಹಾಂಣಿ ನಿರ್ದೇಶನ್ ದಿಲ್ಲೆಂ.
ಸಾಂಜೆರ್ ಚಲ್ಲೆಲ್ಯಾ ಸೊಂಪ್ಣೆ ಕಾರ್ಯಾಕ್ ಜ್ಞಾನ್ಪೀಠ್ ಪುರಸ್ಕೃತ್ ದಾಮೋದರ್ ಮೌಜೊ, ನಾಮ್ನೆಚಿ ತರ್ಜಣ್ದಾರ್ ಶೈಲಾ ಮೌಜೊ, ಕೊಂಕ್ಣಿ ಬರವ್ಪಿ ಆನಿ ಪ್ರಾಧ್ಯಾಪಕ್ ಫ್ರಾನ್ಸಿಸ್ ಡಿಕುನ್ಹಾ, ಮುಖೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾಂನಿ ಕವಿತಾ ಟ್ರಸ್ಟಾವೊ ದಿಶ್ಟಾವೊ, ಮಿಸಾಂವ್ ಸಭೆ ಮುಕಾರ್ ದವರ್ಲೆಂ.
ಹ್ಯಾಚ್ ವೆಳಾರ್ ಫೆಲ್ಸಿ ಲೋಬೊ ಹಿಚ್ಯಾ ’ಪಾಲ್ವಾಪೊಂತ್’ ಕವಿತಾ ಸಂಗ್ರಹಾಕ್ ಡೆನಿಸ್ ಆನಿ ಮೇರಿ ಡಿ ಕುನ್ಹಾ ಸ್ಮಾರಕ್ ಇನಾಮ್ ದಿಲೆಂ ತರ್ ವಲ್ಲಿ ವಗ್ಗ ಹಾಂಕಾಂ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ದೀವ್ನ್ ಮಾನ್ ಕೆಲೊ.
ಹ್ಯಾ ವೆಳಾರ್ ಉಲೊವ್ನ್ ಶೈಲಾ ಮೌಜೊ ಮ್ಹಣಾಲಿಕೀ " ಕವಿತಾ ಟ್ರಸ್ಟಾನ್ ಬಿರಿಬಿರಿ ಪಾವ್ಸ್ ತಸಲಿಂ ಕಾರ್ಯಿಂ ಮಾಂಡುನ್ ಹಾಡುನ್ ಕವಿತೆಕ್ ಡಿಜಿಟಲ್ ಮಾಜ್ಯಾಂನಿ ಕ್ರಿಯಾಳ್ ಕೆಲಾಂ. ಪುಸ್ತಕ್ ವಾಚುಂಕ್ ಉಬ್ಗೊಣ್ ಭೊಗ್ಚ್ಯಾ ಹ್ಯಾ ಕಾಳಾರ್ ಕವಿತಾ, ಟಿವಿ ಆನಿ ಮೊಬೈಲ್ ಫೊನಾಂನಿ ಮೆಳ್ಚೆಪರಿಂ ಕರ್ನ್ ತಾಚಿ ನಿರಂತರತಾ ರಾಕೊನ್ ವ್ಹರ್ಚೆಂ ಕಾಮ್ ಕೆಲಾಂ. ಸ್ಪರ್ಧ್ಯಾಂನಿ ಭಾಗ್ ಘೆತ್ಲೆಲ್ಯಾನ್ ಭುರ್ಗ್ಯಾಂಕ್ ಇನಾಮಾಂ ಮೆಳ್ತಾತ್ ಖರೆಂ ಪುಣ್ ತಾಚ್ಯಾಕೀ ವ್ಹರ್ತ್ಯಾನ್ ತಿಂ ಜಾಯ್ತ್ಯಾ ಕವಿಂಕ್ ಜಾಣಾ ಜಾತಾತ್, ಕವಿತೆಂಚೊ ಮಹತ್ವ್ ಸಮ್ಜತಾತ್. ಹಾಚಿ ಕೀರ್ತ್ ಕವಿತಾ ಟ್ರಸ್ಟಾಕ್ ಫಾವೊ " .
’ಕವಿತಾ ಮ್ಹಳ್ಯಾರ್ ಅಂತಸ್ಕರ್ನಾಚೊ ಆರ್ಸೊ' ಮ್ಹಣುನ್ ಸಾಂಗಲ್ಲ್ಯಾ ಫ್ರಾನ್ಸಿಸ್ ಡಿ ಕುನ್ಹಾನ್ ಆಪ್ಲ್ಯಾ ಉಲೊವ್ಪಾಂತ್ ಆಪ್ಣಾಕ್ ಜಾಯ್ತ್ಯಾ ವರ್ಸಾಂ ಪಯ್ಲೆಂ ಕವಿತಾ ಫೆಸ್ತಾಕ್ ಆಪೊವ್ಣೆಂ ಲಾಭ್ಲೆಲ್ಯಾ ವಿಶಿಂ ಉಗ್ಡಾಸ್ ಕೆಲೊ. ತೆ ದೀಸ್ ಆಪ್ಣಾಕ್ ಫೆಸ್ತಾಕ್ ಯೇಂವ್ಕ್ ಜಾವ್ನಾ ತರೀ ಆಪುಣ್ ಕವಿತಾ ಟ್ರಸ್ಟಾಚಿ ಸರ್ವ್ ಕಾರ್ಯಿಂ ಸುಕ್ಷಿಮಾಯೆನ್ ದೆಕ್ತೆ ಆಸ್ತಾಂ ಮ್ಹಣ್ ತಾಣೆಂ ಕಳಯ್ಲೆಂ. ಆಪ್ಲೊ ಭಾವ್ ಆಂಡ್ರ್ಯೂ ಎಲ್ ಡಿ ಕುನ್ಹಾ ಸಾಂಗಾತಾ ಆಪ್ಲ್ಯಾ ಅವಯ್ ಬಾಪಾಯ್ಚ್ಯಾ ನಾಂವಾರ್ ಕವಿತಾ ಪುಸ್ತಕಾಕ್ ಸ್ಮಾರಕ್ ಇನಾಮ್ ಆಯೋಜನ್ ಕೆಲ್ಲ್ಯಾವಿಶಿಂ ಮಾಹೆತ್ ದಿಲ್ಲ್ಯಾ ತಾಂಣಿ ಮುಕ್ಲ್ಯಾ ವರ್ಸಾಂನಿ ಹೆಂ ಇನಾಮ್ ಮುಕಾರುನ್ ವೆತಲೆಂ ಮ್ಹಣ್ ಭಾಸಾಯ್ಲೆಂ.
ಹ್ಯಾ ವೆಳಾರ್ ಉಲಯಿಲ್ಲ್ಯಾ ದಾಮೋದರ್ ಮೌಜೊನ್ ಸಾಟ್-ಸತ್ತರಾವ್ಯಾ ದಶಕಾಂನಿ ಮಂಗ್ಳುರ್ ಆನಿ ಗೊಂಯ್ಚ್ಯಾ ಕೊಂಕ್ಣಿ ಕವಿಂಚೊ ಸಂಬಂಧ್ ಆನಿ ತಾಂಚೆಂ ಚಿಂತಪ್ ಕಶೆಂ ಆಸಲ್ಲೆಂ ಮ್ಹಣ್ ವಿವರಣ್ ದಿಂವ್ಚೆ ಸವೆಂ "ಕವಿತಾ ಟ್ರಸ್ಟಾನ್ ಮಂಗ್ಳುರ್ ಆನಿ ಕೊಂಕ್ಣಿ ಕವಿಂ ಮಧೆಂ ಸಾಂಕೊವ್ ಭಾಂದ್ಚೆಂ ಪ್ರೇತನ್ ಕೆಲಾಂ. ಹ್ಯಾ ಕಾರಣಾಕ್ ಲಾಗೊನ್ ಹರ್ ಕವಿತಾ ಫೆಸ್ತಾಂನಿ ಗೊಂಯ್-ಮಂಗ್ಳುರ್ ಮ್ಹಳ್ಳೊ ಬೇಧ್ ನಾಸ್ತಾಂ ವ್ಹಡಾ ಸಂಖ್ಯಾನ್ ಭುರ್ಗಿಂ, ವ್ಹಡಿಲಾಂ, ಕಾವ್ಯ್ ರಸಿಕ್ ಹಾಜರ್ ಜಾತಾತ್. ಸಾಹಿತ್ಯ್ ರಚನ್ ಕರ್ಚೆ ಸವೆಂ ತೆಂ ಲೊಕಾಮೆರೆನ್ ಪಾವೊಂವ್ಚೆಂ ಕಾಮ್ ಜಾಂವ್ಕ್ ಜಾಯ್ ಮ್ಹಣುನ್ ಆಮಿ ಆದಿಂಥಾವ್ನ್ ಸಾಂಗ್ತೆ ಆಯ್ಲ್ಯಾಂವ್. ಅಸಲ್ಯಾ ಫೆಸ್ತಾಂ ಮುಖಾಂತ್ರ್ ಕವಿತಾ ಟ್ರಸ್ಟ್ ಹೊ ವಾವ್ರ್ ಕರ್ತೆ ಆಸಾ. ಸಾಹಿತ್ಯ್ ಮನ್ಶಾಂಚಿ ಜಿಣಿ ಆಟಾಪ್ತಾ. ದೆಕುನ್ ಸಾಹಿತ್ಯಾಂತ್ ಮನಿಸ್ ಝಳ್ಕತಾ, ತಾಣೆಂ ಜಿಯೆಂವ್ಚೆಂ ಪರಿಸರ್ ಝಳ್ಕತಾ. ಆಜ್ ಹೆಂ ಫೆಸ್ತ್ ಹ್ಯಾ ಸೊಭಿತ್ ಪ್ರಕೃತೆಂತ್ ಚಲ್ತಾನಾ ಸಾಹಿತ್ಯಾಚೊ ನೀಜ್ ಸ್ವಾದ್ ಭೊಗುಂಕ್ ಸಂತೊಸ್ ಜಾತಾ" ಮ್ಹಣ್ ಉಚಾರ್ಲೆಂ.
ವಿಲಿಯಮ್ ಪಾಯ್ಸಾನ್ ಪುರಸ್ಕಾರ್ ವಿಜೇತ್ ವಲ್ಲಿ ವಗ್ಗಾಚಿ ವಳಕ್ ಕರ್ನ್ ದಿಲಿ. ವಿನ್ಸೆಂಟ್ ಪಿಂಟೊನ್ ಮಾನ್-ಪತ್ರ್ ವಾಚ್ಲೆಂ. ಮನೋಜ್ ಫೆರ್ನಾಂಡಿಸಾನ್ ಬಿರಿಬಿರಿ ಪಾವ್ಸ್ ಕಾರ್ಯಕ್ರಮಾಚೆಂ ಇನಾಮಾಂ ವಿತರಣ್ ಕಾರ್ಯೆಂ ಚಲೊವ್ನ್ ವ್ಹೆಲೆಂ. ಆಂಡ್ರ್ಯೂ ಎಲ್ ಡಿಕುನ್ಹಾನ್ ಉಪ್ಕಾರ್ ಭಾವುಡ್ಲೊ. ವಿತೊರಿ ಕಾರ್ಕಳಾನ್ ಕಾರ್ಯೆಂ ಚಲೊವ್ನ್ ವ್ಹೆಲೆಂ.
प्रकृते सोभायेंत फुलल्लें 20वें कविता फेस्त
कविता ट्रस्टाच्या कविता आनी कवींक संभ्रमच्या कविता फेस्ताक वीस वर्सां सोंपलीं. कवीगोष्टी, कविता संवाद, कोंकणी कवितेक लगती जाल्ल्यो सर्ती, इनामां, वरसाचो कविता पुरस्कार मेळून कविता रसिकांक सांगाता हाडचें हें फेस्त कोंकणी साहित्य संवसारांत विवीध कारणांक लागून विभिन्न आनी विशेस म्हणून नांवाडलां.
ह्या वर्साचें म्हणजे 20वें कविता फेस्त मंगळुरांतल्या सां. लुवीस परिगणीत विश्वविद्यालय आंगणांतल्या मदर तेरेसा पीस पार्कांत जानेर 11, 2026 तारकेर व्हडा दबाजान चल्लें. सकाळीं कॉलेजीच्या 1 नंबर गेटी थावन पीस पार्का पर्यांत बँडा व्हाजपा सवें पुर्शांव काडचे मारीफात फेस्ताची अधिकृत सुर्वात जाली. उपरांत मुखेल सोयरे जावन पावलेल्या बाप मेल्विन डीकून्हा जे.स., प्रो वैस चान्सलर, सां. लुवीस परिगणीत विश्वविद्यालय आनी प्रो. मरिया डीकोस्ता हांणी गुलोबांच्यो पाकळ्यो वार्यार उबोंवचे सवें कविता फेस्ताक अधिकृत चालन दिलें. सांगाता ट्रस्टिंनी, पोषकांनी, हितैशिंनी उगतावण कार्याक सांगात दिलो.
आपल्या उगतावणेच्या उलोवपांत मरिया डीकोस्तान कवितेवयर आपली अभिप्राय उचारून "कवितेन म्हजेर विशेस परिणाम घाल्लो आसा. म्हजेर मात्र न्हय सगळ्या संवसारान कवितेचो भर्म देकललो आसा, तिचो परिणाम अनभोग केल्लो आसा. कविता बरोंवचें आनी वाच्चेंच एके रितीचें फेस्त तशें जावन आसा म्हण सांगुंक आशेतां. कविता ट्रस्टान कविता फेस्ता मुखांत्र कवितेंक, कवींक आनी कविता आस्वादकांक एका पाक्या पोंदा हाडलां, देकून हें फेस्त यादगार आनी इतीहासाच्या पानांनी शाश्वत उरचे तसलें म्हणूक चड संतोस पावतां." म्हळ्ळी अभिप्राय दिली.
कविता फेस्ताच्या महत्वाविशीं उलोवन बाप मेल्विन डीकून्हान "कविता फेस्ताक अवकास करन दिंवचे मारीफात सां. लुवीस कॉलेजीच्या हे शांते भागेक विशेस अर्थ आयला. प्रकृतेचे सोभीत पासळेर हें फेस्त चलता देकून परिसराचें रक्षण उकलन धरच्या कवितेंक आनी कवींक विशेस गौरव लाभला. परिसर, रान म्हणताना थंयसर सरोप, दिवोड, अग्ग्यो आसचें सहज. पूण एकामेका वांदे जायनासतां जियेंवची तांची कालेत आमकां आदर्श" म्हळ्ळो संदेश दिलो.
उगतावण सुवाळ्या उपरांत मथायस कुटम कविता पुरस्कार जोडलेल्या म्हालघडो साहिती वल्ली वग्गालागीं ’म्हजें जिवीत, म्हजी कविता’ म्हळ्ळ्या विशयाचेर कवी आंड्र्यू एल डीकून्हान संवाद चलयलो. संवादांत वल्ली वग्गान आपणें ल्हान व्हड जाल्ल्या वग्गा म्हळ्ळ्या गांवाविशीं, आपल्या साहित्यांत दाखल जाल्ल्या वग्गाच्या परिसराविशीं, रान आनी रानवट मोनजातींविशीं उलोवप सादर केलें. आपले साहितीक जिणयेंत खासगी जिणयेच्यो गजाली मिसळोन गेल्लेविशीं तांणी सुडाळ माहेत दिली.
उपरांत साहित्य अकाडेमी, डेल्लिच्या सहयोगाखाल चलल्ल्या कविसंधी कार्यांत गोंयचो कवी परेश एन कामतान आपल्या कवितांवयले विचार सादर केले आनी कविता पेश केल्यो. फेस्ताचे वेदीर 'बिरिबिरी पावस टिवी रियालिटी शो’-च्या फैनल हंताक पावलेल्या युव आनी भुरग्यांच्या विभागांतल्या स्पर्धिकांची विशेस कविगोष्टी हाजर आसलेल्यांची मनां पिस्वोवंक लागली.
दोनपारां जेवणा उपरांत अस्तित्व (री) आनी रंग अध्ययन केंद्र सां लुवीस परिगणीत विश्वविद्यानिलयाच्या विद्यार्थीं थावन काव्यरंग म्हळ्ळें कार्यें सादर जालें. ’आबोल्या तुजो रंग उजोगो’ म्हळ्ळे कवितेथावन आरंभ जाल्ल्या काव्यरंगाक क्रिस्टोफर निनासम हांणी निर्देशन दिल्लें.
सांजेर चल्लेल्या सोंपणे कार्याक ज्ञानपीठ पुरस्कृत दामोदर मावजो, नामनेची तर्जणदार शैला मावजो, कोंकणी बरोवपी आनी प्राध्यापक फ्रान्सीस डिकुन्हा, मुखेल सोयरे जावन हाजर आसले. कविता ट्रस्ट अध्यक्ष मेल्विन रोड्रिगसांनी कविता ट्रस्टाचो दिश्टावो, मिसांव सभे मुकार दवरलें.
ह्याच वेळार फेल्सी लोबो हिच्या ’पालवा पोंत’ कविता संग्रहाक डेनीस आनी मेरी डीकून्हा स्मारक इनाम दिलें तर वल्ली वग्गा हांकां मथायस कुटम कविता पुरस्कार दीवन मान केलो.
ह्या वेळार उलोवन शैला मावजो म्हणालिकी "कविता ट्रस्टान बिरिबिरी पावस तसलीं कार्यीं मांडून हाडून कवितेक डिजिटल माज्यांनी क्रियाळ केलां. पुस्तक वाचूंक उबगोण भोगच्या ह्या काळार कविता, टिवी आनी मोबैल फोनांनी मेळचेपरीं करन ताची निरंतरता राकून व्हरचें काम केलां. स्पर्ध्यांनी भाग घेतलेल्यान भुरग्यांक इनामां मेळतात खरें पूण ताच्याकी व्हर्त्यान तीं जायत्या कवींक जाणा जातात, कवितेंचो महत्व समजतात. हाची कीर्त कविता ट्रस्टाक फावो".
’कविता म्हळ्यार अंतस्कर्नाचो आर्सो' म्हणून सांगल्ल्या फ्रान्सीस डी कुन्हान आपल्या उलोवपांत आपणाक जायत्या वर्सां पयलें कविता फेस्ताक आपोवणें लाभलेल्या विशीं उगडास केलो. ते दीस आपणाक फेस्ताक येवंक जावना तरी आपूण कविता ट्रस्टाची सर्व कार्यीं सुक्षिमायेन देखते आसतां म्हण ताणें कळयलें. आपलो भाव आंड्र्यू एल डीकुन्हा सांगाता आपल्या अवय बापायच्या नांवार कविता पुस्तकाक स्मारक इनाम आयोजन केल्ल्याविशीं माहेत दिल्ल्या तांणी मुकल्या वर्सांनी हें इनाम मुकारून वेतलें म्हण भासायलें.
ह्या वेळार उलयिल्ल्या दामोदर मावजोन साट-सत्तराव्या दशकांनी मंगळूर आनी गोंयच्या कोंकणी कवींचो संबंध आनी तांचें चिंतप कशें आसल्लें म्हण विवरण दिंवचे सवें "कविता ट्रस्टान मंगळूर आनी कोंकणी कवीं मधें सांकोव बांदचें प्रेतन केलां. ह्या कारणाक लागोन हर कविता फेस्तांनी गोंय-मंगळूर म्हळ्ळो बेध नासतां व्हडा संख्यान भुरगीं, व्हडिलां, काव्य रसीक हाजर जातात. साहित्य रचन करचे सवें तें लोकांमेरेन पावोंवचें काम जावंक जाय म्हणून आमी आदीं थावन सांगते आयल्यांव. असल्या फेस्तां मुखांत्र कविता ट्रस्ट हो वावर करते आसा. साहित्य मनशांची जिणी आटापता. देकून साहित्यांत मनीस झळकता, ताणें जियेंवचें परिसर झळकता. आज हें फेस्त ह्या सोभीत प्रकृतेंत चलताना साहित्याचो नीज स्वाद भोगूंक संतोस जाता" म्हण उचारलें.
विलियम पायसान पुरस्कार विजेत वल्ली वग्गाची वळख करन दिली. विन्सेंट पिंटोन मान-पत्र वाचलें. मनोज फेर्नांडिसान बिरिबिरी पावस कार्यक्रमाचें इनामां वितरण कार्यें चलोवन व्हेलें. आंड्र्यू एल डिकुन्हान उपकार भावुडलो. वितोरी कार्कळान कार्यें चलोवन व्हेलें.