ಎಚ್ಚೆಮ್ ಪೆರ್ನಾಳಾಚ್ಯಾ ಸಮೀಕ್ಶೆಚ್ಯಾ ಬುಕಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪುರಸ್ಕಾರ್

ಎಚ್ಚೆಮ್ ಪೆರ್ನಾಳಾಚ್ಯಾ ಸಮೀಕ್ಶೆಚ್ಯಾ ಬುಕಾಕ್ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪುರಸ್ಕಾರ್

2025ವ್ಯಾ ವರ್ಸಾಚೊ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಪುರಸ್ಕಾರ್ ಎಚ್ಚೆಮ್ ಪೆರ್ನಾಳಾಚ್ಯಾ 'ಕೊಂಕಣಿ ಕಾವ್ಯೆಂ: ರುಪಾಂ ಆನಿ ರೂಪಕಾಂ' ಪುಸ್ತಕಾಕ್ ಫಾವೊ ಜಾಲಾ. ಕೊಂಕಣಿಂತ್ ಎಕಾ ಸಮೀಕ್ಶೆಚ್ಯಾ ಪುಸ್ತಕಾಕ್ ಸಾಹಿತ್ಯ್ ಅಕಾಡೆಮಿಚಿ ಪ್ರಶಸ್ತಿ ಲಾಬ್ಚಿ ಹೆಂಚ್ ಪಯ್ಲೆ ಪಾವ್ಟಿಂ. ಕವಿತಾ ಪಬ್ಲಿಕೇಶನಾನ್ ಹೆಂ ಪುಸ್ತಕ್ ದೇವನಾಗರಿ ಆನಿ ಕನ್ನಡ ಲಿಪಿಯಾಂನಿ ಪರ್ಗಟ್ ಕೆಲ್ಲೆಂ ಆಸುನ್ ಜ್ಞಾನಪೀಠ್ ಪುರಸ್ಕಾರ್ ಜೊಡ್ಪಿ ಲೇಖಕ್ ದಾಮೋದರ್ ಮಾವ್ಜೊ ಹಾಂಣಿ ಹ್ಯಾ ಪುಸ್ತಕಾಕ್ ಆಪುರ್ಬಾಯೆಚೆಂ ಪ್ರಸ್ತಾವನ್ ಬರಯ್ಲಾಂ.

ಹ್ಯಾ ಆದಿಂ ಕರ್ನಾಟಕಾಚ್ಯಾ ಚಾಫ್ರಾ ದೆಕೊಸ್ತಾ, ಗೋಕುಲದಾಸ್ ಪ್ರಭು, ಮೆಲ್ವಿನ್ ರೊಡ್ರಿಗಸ್, ಎಡ್ವಿನ್ ಜೆ.ಎಫ್.ಡಿಸೋಜಾಕ್ ಹಿ ಪ್ರಶಸ್ತಿ ಲಾಭಲ್ಲಿ. ತ್ಯಾ ಭಾಯ್ರ್ ಮಹಾರಾಷ್ಟ್ರಾಂತ್ ವಸ್ತಿ ಕರುನ್ ಆಸಲ್ಲ್ಯಾ ಜೆಬಿ ಮೊರಾಯಸ್ ಆನಿ ಜೆಬಿ ಸಿಕ್ವೇರಾಕೀ ಹಿ ಪ್ರಶಸ್ತಿ ಮೆಳ್ಳ್ಯಾ. ಆತಾಂ ಆಟ್ ವರ್ಸಾಂ ಉಪ್ರಾಂತ್ ಹೊ ಪುರಸ್ಕಾರ್ ಕರ್ನಾಟಕಾಕ್ ಮೆಳ್ಳಾ.

ಎಚ್ಚೆಮ್ ಪೆರ್ನಾಳ್ ಲಿಖ್ಣೆ ನಾಂವಾನ್ ಪಾಟ್ಲ್ಯಾ 35 ವರ್ಸಾಂ ಥಾವ್ನ್ ಬರೊಂವ್ಚೊ ಹೆನ್ರಿ ಇಗ್ನೇಶಿಯಸ್ ಮೆಂಡೊನ್ಸಾ, ಗಾಂವಾನ್ ಉಡುಪಿ ಜಿಲ್ಲ್ಯಾಂತ್ಲ್ಯಾ ಪೆರ್ನಾಳ್ಚೊ. 'ಚಲ್ಯಾಂಕ್ ಚತ್ರಾಯ್' (1999), 'ಕಯ್ದ್ಯಾಚ್ಯೊ ಕವಿತಾ' (2004), 'ಬಾಮುಣಾಂಚೆಂ ಚೆಡುಂ' (2006), 'ಜನೆಲ್' (2025) - ತಾಚೆ ಪ್ರಕಟಿತ್ ಕವಿತಾ ಸಂಗ್ರಹ್. 'ದೆವಾಕ್ ಸೊಡಲ್ಲೊ ಪಾಡೊ' (2002), 'ಬೀಗ್ ಆನಿ ಬಿಗಾತ್' (2016) ತಾಚೆ ಕಥಾ ಸಂಗ್ರಹ್. 'ಬೀಗ್ ಆನಿ ಬಿಗಾತ್' ಕಾಣಿಯಾಂ ಬುಕಾಕ್ ವಿಶ್ವ ಕೊಂಕಣಿ ಕೇಂದ್ರಾಚಿ ವಿಮಲ ವಿ. ಪೈ ಉತ್ತೀಮ್ ಪುಸ್ತಕ್ ಪ್ರಶಸ್ತಿ ತಾಕಾ ಫಾವೊ ಜಾಲ್ಯಾ. ಕವಿತಾ ಟ್ರಸ್ಟಾನ್ ದಿಂವ್ಚೊ 2019ವ್ಯಾ ವರ್ಸಾಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ತಾಕಾ ಲಾಭ್ಲಾ. 'ಕೊಂಕಣಿ ಕಾವ್ಯೆಂ: ರುಪಾಂ ಆನಿ ರೂಪಕಾಂ' ಪುಸ್ತಕಾಕ್ ಹ್ಯಾ ಆದಿಂ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, ಗೋವಾ ಕೊಂಕಣಿ ಅಕಾಡೆಮಿ ಪ್ರಶಸ್ತಿ ತಾಕಾ ಲಾಭ್ಲ್ಯಾ. ಕೊಂಕಣಿ ಶಿವಾಯ್ ಕನ್ನಡ, ಇಂಗ್ಲಿಶ್ ಭಾಸಾಂನೀಂಯ್ ತೊ ಬರಯ್ತಾ. ಪ್ರಸ್ತುತ್ ಕೊಂಕಣಿ ಸಾಹಿತೀಕ್ ಜಾಳಿಸುವಾತ್ 'ಕಿಟಾಳ್' (kittall.com) ಹಾಚೊ ಸಂಪಾದಕ್ ತಶೆಂ 'ಆರ್ಸೊ' ಮ್ಹಯ್ನ್ಯಾಳ್ಯಾ ಪತ್ರಾಚೊ ಪ್ರಕಾಶಕ್. ಕಿಟಾಳ್ ಪ್ರಕಾಶನ್ ನಾಂವಾಖಾಲ್ ಪ್ರಕಾಶನ್ ಸಂಸ್ಥೊ ತೊ ಚಲಯ್ತಾ.

ಜ್ಞಾನಪೀಠ್ ಪುರಸ್ಕಾರ್ ಜೊಡ್ಪಿ ಲೇಖಕ್ ದಾಮೋದರ್ ಮಾವ್ಜೊ "ಆಮಿ ಕೊಂಕ್ಣಿ ಸಾಹಿತ್ಯ್ ಮ್ಹಣ್ಟಾಂವ್, ತೆನ್ನಾ ವಿಂಗಡ್ ವಿಂಗಡ್ ವಠಾರಾಂನಿ ಆನಿ ಲಿಪ್ಯಾಂನಿ ಬರಯಿಲ್ಲೆಂ ವಟ್ಟ್ ಸಾಹಿತ್ಯ್ ಅಭಿಪ್ರೇತ್ ಆಸಾ. ದುರ್ದೈವಾನ್ ಎಕಾ ಪರಸ್ ಚಡ್ ಲಿಪ್ಯಾಂಚಿ ವಳಖ್ ಆಶಿಲ್ಲೆ ವಾಚಕ್ ಖೂಬ್ ಥೊಡೆ. ದೆಖೂನ್ ಹ್ಯಾ ವಟ್ಟ್ ಸಾಹಿತ್ಯಾಚಿ ಜಾಣ್ ಆಶಿಲ್ಲೊ ವಿಮರ್ಶಕ್ ಮೆಳಪ್ ಕಠೀಣ್. ಲಿಪ್ಯೊ ವೆಗ್ಳ್ಯೊ ಆಸ್ಲ್ಯೊ ತರಿ ಸಮಗ್ರ್ ಕೊಂಕ್ಣಿ ಸಾಹಿತ್ಯ್ ಏಕ್ ಅಶೆಂ ಮಾನ್ಲೆಂ ತರ್ ಹ್ಯಾ ಸಾಹಿತ್ಯಾಚೊ ‘ಏಕ್ ಸಾಹಿತ್ಯ್’ ಮ್ಹಣ್ ವಿಚಾರ್ ಆನಿ ಆಲೊಚನ್ ಜಾವಪ್ ಗರ್ಜೆಚೆಂ. ಎಚ್ಚೆಮಾಚೆಂ ಹೆಂ ಪುಸ್ತಕ್ ತೆ ದಿಕೆನ್ ಘಾಲ್ಲೆಂ ಏಕ್ ಜಬರದಸ್ತ್ ಪಾವ್ಲ್ ಜಾವ್ನ್ ಆಸಾ. ಕವಿ ಮನೋಹರರಾಯ್ ಸರ್ದೆಸಾಯ್, ರ. ವಿ. ಪಂಡಿತ್, ಚಾಫ್ರಾ ದೆಕೊಸ್ತಾ, ವಿಲ್ಫಿ ರೆಬಿಂಬಸ್, ಅರುಣ್ ಸಾಖರದಾಂಡೆ, ಮೆಲ್ವಿನ್ ರೊಡ್ರಿಗಸ್, ವಿಲ್ಸನ್ ಕಟೀಲ್, ಎಂಟನಿ ಬಾರ್ಕೂರ್, ಆಂಡ್ರ್ಯು ಎಲ್. ಡಿಕುನ್ಹಾ, ನೂತನ್ ಸಾಖರದಾಂಡೆ, ರಾಜಯ್ ಪವಾರ್, ಫ್ರೆಡ್ ಕುಮಾರ್, ಶಕುಂತಲಾ ಆರ್. ಕಿಣಿ, ಸ್ಮಿತಾ ಶೆಣೈ, ಅಶ್ಯಾ ಸಬಾರ್ ಕವಿಂಚೊ ಹಾತೂಂತ್ ಆಸ್ಪಾವ್ ಆಸಾ. ತಾಣೆಂ ಕೆನರಾ ಕೊಂಕ್ಣಿ ಆನಿ ಗೊಂಯ್ಚಿ ವಾ ಇತರ್ ಕೊಂಕ್ಣಿ ಅಸೊ ಭೆದಾಭೇದ್ ಮಾನಿನಾಸ್ತಾನಾ ವಿಶಯಾಪ್ರಮಾಣ್ ನಿಯಾಳ್ ಕೆಲಾ. ತಾತುಂತ್ಲ್ಯಾನ್, ಆಯ್ಜವೆರ್ ಕೆನ್ನಾಚ್ ಜಾಂವ್ಕ್ ನಾಸ್ಲೊ ಅಸೊ, ತುಲನಾತ್ಮಕ್ ಅಭ್ಯಾಸ್ ಜಾಲಾ ಹೆಂ ಭೊವ್ ಮ್ಹತ್ವಾಚೆಂ" ಅಶೆಂ ಆಪ್ಲ್ಯಾ ಪ್ರಸ್ತಾವನಾಂತ್ ಬರಯ್ತಾತ್.

"ಎಚ್ಚೆಮ್ ಹೊ ಸ್ವತಾ ಏಕ್ ಪ್ರಗಲ್ಭ್ ಆನಿ ಪ್ರಸ್ಥಾಪೀತ್ ಲೇಖಕ್. ಕವಿ ಮ್ಹಣ್ ಖೂಬ್ ಶ್ರೇಷ್ಠ್. ತಾಚೆಂ ವಾಚನ್ ಆಕಾಂತ್ ವ್ಹಡ್. ತೆಯ್ ಪರಸ್ ಸಾಹಿತ್ಯಾಚಿ ಜಾಣ್ ಚಡ್. ಕೊಂಕ್ಣಿ ಕಾವ್ಯಾಚೊ ತಾಣೆಂ ಕೆಲ್ಲೊ ಅಭ್ಯಾಸ್ ಖೊಲ್ ಆಶಿಲ್ಲ್ಯಾನ್ ತೊ ಅಧಿಕಾರವಾಣಿಯೆನ್ ಕಾವ್ಯಾಚೆರ್ ಬರೊಂವ್ಕ್ ಶಕ್ತಾ. ಕೊಂಕ್ಣಿ ಕಾವ್ಯಾಚಿ ಸುವಾತ್, ದಿಕಾ ಆನಿ ವಾಡಾವಳ್ ಹಾಚೆರ್ ಮೆಕ್ಳೆಪಣಾನ್ ಭಾಸಾಭಾಸ್ ಕರ್ಪಿ ಎಚ್ಚೆಮಾಚೆಂ ಹೆಂ ಪುಸ್ತಕ್ ಮ್ಹಟ್ಲ್ಯಾರ್ ಕೊಂಕ್ಣಿ ಕಾವ್ಯಾಚ್ಯಾ ಅಭ್ಯಾಸಕಾಂಕ್ ಏಕ್ ಅಪ್ರೂಪ್ ಭೆಟ್ ಅಶೆಂಚ್ ಮ್ಹಣೂಂಕ್ ಜಾಯ್. ಕಾರಣ್ ತಾಂಚೆ ಥಂಯ್ ಸಮಿಕ್ಷಕಾಕ್ ಆವಶ್ಯಕ್ ತೆ ಚಡ್ಶೆ ಗೂಣ್ ಆಸಾತ್." ಅಶೆಂ ತೆ ಮುಕಾರ್ ಸಾಂಗ್ತಾತ್.

ಎಚ್ಚೆಮ್ಮಾಕ್ ಮೆಳಲ್ಲಿ ಹಿ ಪ್ರಶಸ್ತಿ ಕೊಂಕಣಿ ಸಮೀಕ್ಶೆಚ್ಯಾ ಪ್ರಕಾರಾಕ್ ವೆಗ್ಳಿ ದಿಶಾ ದಿತಲಿ ಆನಿ ಕರ್ನಾಟಕಾಚ್ಯಾ ಕೊಂಕಣಿ ಕವಿತೆಕ್ ಚಡಿತ್ ಬಳ್ ದಿತಲೆಂ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ನಾಂತ್.

To read H.M. Pernal's Poems - CLICK HERE

एच्चेम पेर्नाळाच्या समीक्षेच्या बुकाक केंद्र साहित्य अकादेमी पुरस्कार

2025व्या वर्साचो केंद्र साहित्य अकादेमी पुरस्कार एच्चेम पेर्नाळाच्या 'कोंकणी काव्यें: रुपां आनी रूपकां' पुस्तकाक फावो जाला. कोंकणींत एका समीक्षेच्या पुस्तकाक साहित्य अकादेमीची प्रशस्ती लाबची हेंच पयले पावटीं. कविता पब्लीकेशनान हें पुस्तक देवनागरी आनी कन्नड लिपयांनी पर्गट केल्लें आसून ज्ञानपीठ पुरस्कार जोडपी लेखक दामोदर मावजो हांणी ह्या पुस्तकाक आपुरबायेचें प्रस्तावन बरयलां.

ह्या आदीं कर्नाटकाच्या चाफ्रा देकोस्ता, गोकुलदास प्रभू, मेल्विन रोड्रीगस, एडवीन जे.एफ. डिसोजाक ही प्रशस्ती लाभल्ली. त्या भायर महाराष्ट्रांत वस्ती करून आसल्ल्या जे.बी. मोरायस आनी जे.बी. सिकवेराकी ही प्रशस्ती मेळ्ळ्या. आतां आट वर्सां उपरांत हो पुरस्कार कर्नाटकाक मेळ्ळा.

एच्चेम पेर्नाळ लिखणे नांवान फाटल्या ३५ वर्सां थावन बरोंवचो हेनरी इग्नेशियस मेंडोन्सा, गांवान उडुपी जिल्ल्यांतल्या पेर्नाळचो. 'चल्यांक चत्राय' (1999), 'कयद्याच्यो कविता' (2004), 'बामुणांचें चेडूं' (2006), 'जनेल' (2025) - ताचे प्रकटीत कविता संग्रह. 'देवाक सोडल्लो पाडो' (2002), 'बीग आनी बिगात' (2016) ताचे कथा संग्रह. 'बीग आनी बिगात' काणयां बुकाक विश्व कोंकणी केंद्राची विमल वी. पै उत्तीम पुस्तक प्रशस्ती ताका फावो जाल्या. कविता ट्रस्टान दिंवचो 2019व्या वर्साचो मथायस कुटम कविता पुरस्कार ताका लाभला. 'कोंकणी काव्यें: रुपां आनी रूपकां' पुस्तकाक ह्या आदीं कर्नाटक कोंकणी साहित्य अकादेमी प्रशस्ती, , गोवा कोंकणी अकादेमी प्रशस्ती ताका लाभल्या. कोंकणी शिवाय कन्नड, इंगलीश भासांनींय तो बरयता. प्रस्तूत कोंकणी साहितीक जाळीसुवात 'किटाळ' (kittall.com) हाचो संपादक तशें 'आर्सो' म्हयन्याळ्या पत्राचो प्रकाशक. किटाळ प्रकाशन नांवाखाल प्रकाशन संस्थो तो चलयता.

ज्ञानपीठ पुरस्कार जोडपी लेखक दामोदर मावजो "आमी कोंकणी साहित्य म्हणटांव तेन्ना विंगड विंगड वठारांनी आनी लिप्यांनी बरयिल्लें वट्ट साहित्य अभिप्रेत आसा. दुर्दैवान एका परस चड लिप्यांची वळख आशिल्ले वाचक खूब थोडे. देखून ह्या वट्ट साहित्याची जाण आशिल्लो विमर्शक मेळप कठीण. लिप्यो वेगळ्यो आसल्यो तरी समग्र कोंकणी साहित्य एक अशें मानलें तर ह्या साहित्याचो ‘एक साहित्य’ म्हण विचार आनी आलोचन जावप गर्जेचें. एच्चेमाचें हें पुस्तक ते दिकेन घाल्लें एक जबरदस्त पावल जावन आसा. कवी मनोहरराय सर्देसाय, र. वी. पंडीत, चाफ्रा देकोस्ता, विल्फी रेबींबस, अरूण साखरदांडे, मेल्विन रोड्रीगस, विल्सन कटील, एँटनी बार्कूर, आंड्र्यू एल. डिकुन्हा, नूतन साखरदांडे, राजय पवार, फ्रेड कुमार, शकुंतला आर. किणी, स्मिता शेणै, अश्या साबार कवींचो हातूंत आसपाव आसा. ताणें केनरा कोंकणी आनी गोंयची वा इतर कोंकणी असो भेदाभेद मानीनासताना विशया प्रमाण नियाळ केला. तातुंतल्यान, आयजवेर केन्नाच जावंक नासलो असो, तुलानात्मक अभ्यास जाला हें भोव म्हत्वाचें" अशें आपल्या प्रस्तावनांत बरयतात.

"एच्चेम हो स्वता एक प्रगल्भ आनी प्रस्थापीत लेखक. कवी म्हण खूब श्रेष्ठ. ताचें वाचन आकांत व्हड. तेय परस साहित्याची जाण चड. कोंकणी काव्याचो ताणें केल्लो अभ्यास खोल आशिल्ल्यान तो अधिकारवाणयेन काव्याचेर बरोवंक शकता. कोंकणी काव्याची सुवात, दिका आनी वाडावळ हाचेर मेकळेपणान भासाभास करपी एच्चेमाचें हें पुस्तक म्हटल्यार कोंकणी काव्याच्या अभ्यासकांक एक अपरूप भेट अशेंच म्हणूंक जाय. कारण तांचे थंय समिक्षकाक आवश्यक ते चडशे गूण आसा" अशें ते मुकार सांगतात.

एच्चेम्माक मेळल्ली ही प्रशस्ती कोंकणी समीक्षेच्या प्रकाराक वेगळी दिशा दितली आनी कर्नाटकाच्या कोंकणी कवितेक चडीत बळ दितलें म्हणच्यांत दोन उत्रां नांत.

To read H.M. Pernal's Poems - CLICK HERE