ಕೊಂಕಣಿ ಕವಿತಾ ಸಾದರೀಕರಣ್ ಸರ್ತ್: ಪಣಜಿ ಥಾವ್ನ್ 5 ಭುರ್ಗಿಂ ಫೈನಲಾಕ್
ಕವಿತಾ ಟ್ರಸ್ಟಾನ್ ಚಲೊಂವ್ಚ್ಯಾ, ನೆಲ್ಸನ್ ಆನಿ ಲವೀನಾ ರೊಡ್ರಿಕ್ಸ್ - ಚಾಫ್ರಾ ದೆಕೊಸ್ತಾ ಸ್ಮಾರಕ್ ಅಖಿಲ್ ಭಾರತ್ ಕೊಂಕಣಿ ಕವಿತಾ ಸಾದರೀಕರಣ್ ಸರ್ತೆಚೊ ಪಣಜಿ ಪ್ರಾಥಮಿಕ್ ಪಾಂವ್ಡೊ ಹ್ಯಾಚ್ ನವೆಂಬರ್ 14, 2022 ತಾರಿಕೆರ್ ಪಣ್ಜೆಚ್ಯಾ ಇನ್‌ಸ್ಟಿಟ್ಯೂಟ್ ಮಿನೇಜಸ್ ಬ್ರಗಾಂಜಾ ಸಭಾಸಾಲಾಂತ್ ಚಲ್ಲೊ.
ಭುರ್ಗ್ಯಾಂಚಿ ಹಿ ಸರ್ತ್ ನೊವ್ಯಾ ವರ್ಸಾಂತ್ ಆಸುನ್ ಪಣಜಿಚೊ ಹೊ ಪಾಂವ್ಡೊ ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಹಾಂಚ್ಯಾ ಜೋಡ್ ಆಶ್ರಯಾಖಾಲ್ ಮಾಂಡುನ್ ಹಾಡ್‌ಲ್ಲೊ.
ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಹಾಚೊ ಆದ್ಲೊ ಅಧ್ಯಕ್ಷ್ ಚೇತನ್ ಆಚಾರ್ಯನ್ ಸುರ‍್ವೆರ್ ಯೆವ್ಕಾರ್ ದಿತಚ್, ಕವಿತಾ ಟ್ರಸ್ಟ್ ಸ್ಥಾಪಕ್ ಮೆಲ್ವಿನ್ ರೊಡ್ರಿಗಸಾನ್ ಸರ್ತೆಚಿಂ ನೆಮಾಂ ಸಾಂಗ್ಲಿಂ. ವೊರಯ್ಣಾರ್ ಜಾವ್ನ್ ವಿಲಿಯಮ್ ಪಾಯ್ಸ್ ತಶೆಂಚ್ ಕಿಶೂ ಬಾರ್ಕೂರ್ ಆಸಲ್ಲೆ, ಟ್ರಸ್ಟಿ ವಿತೊರಿ ಕಾರ್ಕಳಾನ್ ವೆದಿವಯ್ಲಿ ಜವಾಬ್ದಾರಿ ಸಾಂಬಾಳ್‌‍ಲ್ಲಿ.
ಭುರ್ಗ್ಯಾಂಚ್ಯಾ ವಿಭಾಗಾಂತ್ 26 ಭುರ್ಗ್ಯಾಂನಿ ವಾಂಟೊ ಘೆತ್‌ಲ್ಲೊ ತರ್, ತೀಸ್ ವರ್ಸಾಂ ವಯ್ಲ್ಯಾಂಚ್ಯಾ ವಿಭಾಗಾಂತ್ 4 ಜಣಾಂನಿ ಕವಿತಾ ಸಾದರ್ ಕೆಲಿ. ಜನೆರ್ 8, 2023 ತಾರಿಕೆರ್ ಕೇರಳ ಕಾಸರ್‌ಗೋಡ್ ಜಿಲ್ಲ್ಯಾಚ್ಯಾ ಬೆಳಾಂತ್ ಚಲ್ಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಹ್ಯೆ ಸರ್ತೆಚೆಂ ಫೈನಲ್ ಜಾತಲೆಂ. ಹ್ಯಾ ಫೈನಲಾಕ್ ಪಣಜಿ ಥಾವ್ನ್ ವಿಂಚುನ್ ಆಯಿಲ್ಲ್ಯಾಂಚಿಂ ನಾಂವಾಂ ಹ್ಯೆಪರಿಂ ಆಸಾತ್:
ಭುರ್ಗ್ಯಾಂಚೊ ವಿಭಾಗ್:
ಪಾರ್ಥ್ ಕಾಮತ್ ಸಾತೊಸ್ಕಾರ್; ಸನಾ ಸಾತೇಲ್ಕಾರ್; ವರ್ದಾನ್ ಚೋಪ್ಡೆಕಾರ್; ಶಾರ್ವಿ ಗವ್ಣೆಕಾರ್; ಊರ್ವಿ ನಾಯ್ಕ್.
ವ್ಹಡಾಂಚೊ ವಿಭಾಗ್:
ನೀತಾ ಪರಬ್.
ಹ್ಯಾ ಸಂದರ್ಭಾರ್ ಕೊಂಕಣಿ ಕವಿ ಉದಯ್ ಮ್ಹಾಂಬ್ರೊ ಹಾಜರ್ ಆಸ್‌ಲ್ಲೊ ಆಸುನ್, ಸರ್ತೆಂತ್ ಭಾಗ್ ಘೆತಲ್ಲ್ಯಾ ಸರ್ವಾಂಕ್ ತಾಣೆಂ ಪ್ರಮಾಣ್ ಪತ್ರಾಂ ವಾಂಟ್ಲಿಂ.
कोंकणी कविता सादरीकरण सर्त: पणजी थावन 4 भुरगीं फैनलाक
कविता ट्रस्टान चलोंवच्या, नेल्सन आनी लवीना रोड्रिक्स - चाफ्रा देकोस्ता स्मारक अखिल भारत कोंकणी कविता सादरीकरण सर्तेचो पणजी प्राथमीक पांवडो ह्याच नोवेंबर 14, 2022 तारकेर पणजेच्या ईनस्टिट्यूट मिनेजस ब्रगांजा सभासालांत चल्लो.
भुरग्यांची ही सर्त नोव्या वरसांत आसून पणजीचो हो पांवडो कोंकणी भाषा मंडळ, गोंय हांच्या जोड आश्रयाखाल मांडून हाडल्लो.
कोंकणी भाषा मंडळ, गोंय हाचो आदलो अध्यक्ष चेतन आचार्यान सुरवेर येवकार दितच, कविता ट्रस्ट स्थापक मेल्विन रोड्रीगसान सर्तेचीं नेमां सांगलीं. वोरयणार जावन विलियम पायस तशेंच किशू बार्कूर आसल्ले, ट्रस्टी वितोरी कार्कळान वेदीवयली जवाबदारई सांबाळल्ली.
भुरग्यांच्या विभागांत 26 भुरग्यांनी वांटो घेतल्लो तर, तीस वरसां वयल्यांच्या विभागांत 4 जाणांनी कविता सादर केली. जानेर 8, 2023 तारकेर केरळ कासरगोड जिल्ल्याच्या बेळांत चलच्या कविता फेस्त संदर्भार हे सर्तेचें फैनल जातलें. ह्या फैनलाक पणजी थावन विंचून आयिल्ल्यांचीं नांवां ह्येपरीं आसात:
भुरग्यांचो विभाग:
पार्थ कामत सातोस्कार; सना सातेल्कार; वर्दान चोपडेकार; शार्वी गवणेकार; ऊर्वी नायक.
व्हडांचो विभाग:
नीता परब.
ह्या संदर्भार कोंकणी कवी उदय म्हांबरो हाजर आसल्लो आसून, सर्तेंत भाग घेतल्ल्यांक प्रमाण पत्रां वांटलीं.