ಕವಿತಾ ಸಾದರೀಕರಣ್ ಸರ್ತ್ 2023: ಮಂಗ್ಳುರ್ ಥಾವ್ನ್ 3 ಭುರ್ಗಿಂ, 4 ವ್ಹಡಾಂ ಫೈನಲಾಕ್
ಕವಿತಾ ಟ್ರಸ್ಟಾನ್ ಚಲೊಂವ್ಚ್ಯಾ, ನೆಲ್ಸನ್ ಆನಿ ಲವೀನಾ ರೊಡ್ರಿಕ್ಸ್ - ಚಾಫ್ರಾ ದೆಕೊಸ್ತಾ ಸ್ಮಾರಕ್ ಅಖಿಲ್ ಭಾರತ್ ಕೊಂಕಣಿ ಕವಿತಾ ಸಾದರೀಕರಣ್ ಸರ್ತೆಚೊ ಮಂಗ್ಳುರ್ ಪ್ರಾಥಮಿಕ್ ಪಾಂವ್ಡೊ ಹ್ಯಾಚ್ ನವೆಂಬರ್ 20, 2022 ತಾರಿಕೆರ್ ಎಮ್.ಸಿ.ಸಿ. ಬ್ಯಾಂಕ್ ಹಂಪನ್‌ಕಟ್ಟಾ ಹಾಂಗಾಸರ್ ಆಸ್ಚ್ಯಾ ಎಸ್.ಎಫ್.ಎಕ್ಸ್. ಸಲ್ಢಾನ್ಹಾ ಸಭಾಸಾಲಾಂತ್ ಚಲ್ಲೊ.
ಭುರ್ಗ್ಯಾಂಚಿ ಹಿ ಸರ್ತ್ ನೊವ್ಯಾ ವರ್ಸಾಂತ್ ಆಸುನ್ ಮಂಗ್ಳುರ‍್ಚೊ ಹೊ ಪಾಂವ್ಡೊ ಎಮ್.ಸಿ.ಸಿ. ಬ್ಯಾಂಕ್ ಹಾಂಚ್ಯಾ ಜೋಡ್ ಆಶ್ರಯಾಖಾಲ್ ಮಾಂಡುನ್ ಹಾಡ್‌ಲ್ಲೊ.
ಸುರ‍್ವೆರ್ ಕವಿತಾ ಟ್ರಸ್ಟ್ ಸ್ಥಾಪಕ್ ಮೆಲ್ವಿನ್ ರೊಡ್ರಿಗಸಾನ್ ಯೆವ್ಕಾರ್ ದಿಲೊ ಆನಿ ಸರ್ತೆಚಿಂ ನೆಮಾಂ ಸಾಂಗ್ಲಿಂ. ವೊರಯ್ಣಾರ್ ಜಾವ್ನ್ ಎಂಡ್ರ್ಯೂ ಎಲ್. ಡಿಕುನ್ಹಾ ತಶೆಂಚ್ ಮೆಲ್ವಿನ್ ರೊಡ್ರಿಗಸ್ ಆಸಲ್ಲೆ. ಟ್ರಸ್ಟಿ ವಿತೊರಿ ಕಾರ್ಕಳಾನ್ ಸಹಕಾರ್ ದಿಲ್ಲೊ.
ಭುರ್ಗ್ಯಾಂಚ್ಯಾ ವಿಭಾಗಾಂತ್ 9 ಭುರ್ಗ್ಯಾಂನಿ ವಾಂಟೊ ಘೆತ್‌ಲ್ಲೊ. ಜನೆರ್ 8, 2023 ತಾರಿಕೆರ್ ಕೇರಳ ಕಾಸರ್‌ಗೋಡ್ ಜಿಲ್ಲ್ಯಾಚ್ಯಾ ಬೆಳಾಂತ್ ಚಲ್ಚ್ಯಾ ಕವಿತಾ ಫೆಸ್ತ್ ಸಂದರ್ಭಾರ್ ಹ್ಯೆ ಸರ್ತೆಚೆಂ ಫೈನಲ್ ಜಾತಲೆಂ. ಹ್ಯಾ ಫೈನಲಾಕ್ ಮಂಗ್ಳುರ್ ಥಾವ್ನ್ ವಿಂಚುನ್ ಆಯಿಲ್ಲ್ಯಾಂಚಿಂ ನಾಂವಾಂ ಹ್ಯೆಪರಿಂ ಆಸಾತ್:
ಭುರ್ಗ್ಯಾಂಚೊ ವಿಭಾಗ್:
ನಿನಿಶಾ ಪ್ರಿಶಾ ಮೊಂತೇರೊ; ಚೆಲ್ಸಿಯಾ ಕಾಸ್ತೆಲಿನೊ; ಸಂಜನಾ ರಿವಾ ಮಥಾಯಸ್.
ಭುರ್ಗ್ಯಾಂಚೊ ರಿಜರ್ವ್ ವಿಭಾಗ್:
ನಿಶೆಲ್ ಪರ್ಲ್ ಮೊಂತೇರೊ; ಸೃಜನಾ ವಿವಾ ಮಥಾಯಸ್ ಆನಿ ಒರೆಲ್ ಇವಾ ಲೋಬೊ.
ವ್ಹಡಾಂಚೊ ವಿಭಾಗ್:
ಐರಿನ್ ಮೆಂಡೊನ್ಸಾ; ಡೊ. ದೀಪಾ ರೆಬೆಲ್ಲೊ; ಪ್ರೀತನ್ ರೆನಿಟಾ ಪಿರೇರಾ ಆನಿ ಡಯಾನಾ ಮೊಂತೇರೊ.
ಮೆಲ್ವಿನ್ ರೊಡ್ರಿಗಸಾನ್ ಭಾಗ್ ಘೆತಲ್ಲ್ಯಾ ಸರ್ವಾಂಕ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ.
कविता सादरीकरण सर्त 2023: मंगळूर थावन 3 भुर्गीं, 4 व्हडां फैनलाक
कविता ट्रस्टान चलोंवच्या, नेल्सन आनी लवीना रोड्रिक्स - चाफ्रा देकोस्ता स्मारक अखील भारत कोंकणी कविता सादरीकरण सर्तेचो मंगळूर प्राथमीक पांवडो ह्याच नोवेंबर 20, 2022 तारकेर एम.सी.सी. बॅंक हंपनकट्टा हांगासर आसच्या एस.एफ.एक्स. सल्डान्हा सभासालांत चल्लो.
भुरग्यांची ही सर्त नोव्या वरसांत आसून मंगळूरचो हो पांवडो एम.सी.सी. बॅंक हांच्या जोड आश्रयाखाल मांडून हाडल्लो.
सुरवेर कविता ट्रस्ट स्थापक मेल्विन रोड्रीगसान येवकार दिलो आनी सर्तेचीं नेमां सांगलीं. वोरयणार जावन ऍंड्र्यू एल. डिकुन्हा तशेंच मेल्विन रोड्रीगस आसल्ले. ट्रस्टी वितोरी कार्कळान सहकार दिल्लो.
भुरग्यांच्या विभागांत 9 भुरग्यांनी वांटो घेतल्लो. जानेर 8, 2023 तारकेर केरळ कासरगोड जिल्ल्याच्या बेळांत चलच्या कविता फेस्त संदर्भार ह्ये सर्तेचें फैनल जातलें. ह्या फैनलाक मंगळूर थावन विंचून आयिल्ल्यांचीं नांवां ह्येपरीं आसात:
भुरग्यांचो विभाग:
निनिशा प्रिशा मोंतेरो; चेल्सिया कास्तेलिनो; संजना रिवा मथायस.
भुरग्यांचो रिजर्व विभाग:
निशेल पर्ल मोंतेरो; सृजना विवा मथायस आनी ऑरेल इवा लोबो.
व्हडांचो विभाग:
आयरीन मेंडोन्सा; डॉ. दीपा रेबेल्लो; प्रीतन रेनिटा पिरेरा आनी डयाना मोंतेरो.
मेल्विन रोड्रीगसान भाग घेतल्ल्या सर्वांक प्रमाण पत्रां वांटलीं.