ಕವಿತಾ ಟ್ರಸ್ಟಾಥಾವ್ನ್ ಕವಿ ಕಿರಣ್ ನಿರ್ಕಾಣ್ ಹಾಚ್ಯಾ ಘರಾ ಭೆಟ್
ಉದೆತೊ ಕೊಂಕಣಿ ಕವಿ ಕಿರಣ್ ನಿರ್ಕಾಣ್ ಹಾಣೆ ವಸ್ತಿ ಕರ‍್ಚ್ಯಾ ಬಂಟ್ವೊಳ್ ವಗ್ಗಾಂತ್ ಆಸ್ಚ್ಯಾ ತಾಚ್ಯಾ ಘರಾ ಕವಿತಾ ಟ್ರಸ್ಟಾನ್ ಫೆಬ್ರೆರ್ 16, 2023 ತಾರಿಕೆರ್
ಭೆಟ್ ದಿಲಿ. 2022 ದಶೆಂಬ್ರಾಂತ್ ರಸ್ತ್ಯಾ ಅವ್ಘಡಾಂತ್ ಘಾಯೆವ್ನ್ ಆತಾಂಯ್ ಚಿಕಿತ್ಸೆರ್ ಆಸ್ಚ್ಯಾ ಕಿರಣಾಚ್ಯೆ ಭಲಾಯ್ಕೆವಿಶಿಂ ಸಮ್ಜುನ್ ಘೆತ್ಲೆಂ ಆನಿ ತಾಣೆ ವೆಗಿಂಚ್ ಪಾಟಿಂ ಭಲಾಯ್ಕೆಕ್ ಪರ್ತುಂಚೆ ಖಾತೀರ್ ಬರೆಂ ಮಾಗ್ಲೆಂ.
ಕಿರಣಾಚ್ಯಾ ಘರಾ ತಾಚಿ ಪತಿಣ್, ಧುವ್, ಆವಯ್-ಬಾಪಯ್ ಹಾಜರ್ ಆಸಲ್ಲಿಂ. ಟ್ರಸ್ಟಾ ತರ್ಫೆನ್ ಅಧ್ಯಕ್ಷ್ ಕಿಶೂ ಬಾರ್ಕೂರ್, ಕಾರ್ಯದರ್ಶಿ ಎವ್ರೆಲ್ ರೊಡ್ರಿಗಸ್ ತಶೆಂಚ್ ಟ್ರಸ್ಟಿ ಮೆಲ್ವಿನ್ ರೊಡ್ರಿಗಸ್ ಆನಿ ವಿಲಿಯಮ್ ಪಾಯ್ಸಾನ್ ಕಿರಣಾ ಸಾಂಗಾತಾ ಕವಿತಾ ಶೆತಾಚ್ಯೊ ಗಜಾಲಿ ಕೆಲ್ಯೊ.
ಕವಿತಾ ಫೆಸ್ತಾಚ್ಯಾ ಕವಿತಾ ಸಾದರೀಕರಣ್ ಸರ್ತೆಂತ್ ಭಾಗ್ ಘೆವ್ನ್, ಆಪ್ಣಾಚ್ಯೊ ಕವಿತಾ ವಾಚುನ್, ಪಯ್ಲೆಂ ತಶೆಂ ಸಮಾಧಾನಾಚೆಂ ಇನಾಮ್ ಆಪ್ಣಾಯಿಲ್ಲ್ಯಾ ನಿನಿಶಾ ಆನಿ ನಿಶೆಲ್ ಭಭಯ್ಣ್ಯಾಂನಿ ತಾಂಚೆ ಆವಯ್ ಬರಾಬರ್ ಆಸ್ಪತ್ರೆಕ್ ಆಪ್ಣಾಚಿ ಭೆಟ್ ಕರುನ್, ಬೋವ್ ಸೊಭಿತ್ ಕರುನ್ ಕವಿತಾ ಸಾಂಗುನ್ ಆಪ್ಣಾಕ್ ದಿಲ್ಲಿ ಖುಶಿ ವಿಸರ‍್ಚೆಬರಿ ನಾ ಅಶೆಂ ತಾಣೆ ಸಾಂಗ್ಲೆಂ.
ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಟ್ರಸ್ಟಾನ್ ಆಯ್ಲೆವಾರ್ ಪರ್ಗಟ್ ಕೆಲ್ಲಿಂ ಪುಸ್ತಕಾಂ ತಾಕಾ ದಿಲಿಂ.