ಚಾಫ್ರಾಚ್ಯೊ ತೀನ್ ಕವಿತಾ ಆನಿ ನಿರಾಸ್ವಾದ್ - ಭಾಗ್ 2
-ವಿಲ್ಸನ್ ಕಟೀಲ್
(ಕಲಾಂಗಣಾಂತ್ 2010 ವರ್ಸಾ ಚಲಲ್ಲ್ಯಾ ವಿಶ್ವ ಕೊಂಕಣಿ ಮ್ಹಾಮೇಳಾಚ್ಯಾ ಸಂದರ್ಭಾರ್ ಏಕ್ ದೀಸ್ ಕವಿತೆಕ್ ಸಮರ್ಪುನ್ ದಿಲ್ಲೊ ಆಸಲ್ಲೊ. ದಶೆಂಬರ್ 4 ತಾರಿಕೆಚ್ಯಾ ಹ್ಯಾ ದಿಸಾ, ಸಕಾಳಿಂಚ್ಯಾ ಆದೆಸಾಂತ್ ಚಾಫ್ರಾಚ್ಯಾ ಕವಿತಾಂಚೆರ್ ವಿಚಾರ್ ಸಾತೆಂ ಚಲ್ಲೆಂ. ವಿಷಯ್ ಆಸಲ್ಲೊ : `ಚಾಫ್ರಾಚ್ಯಾ ಕವಿತಾಂನಿ ಜಾಗೃತಿಚೆಂ ಕಿಟಾಳ್ ಆನಿ ನಿರಾಸ್ವಾದ್'. ಗೊಂಯ್ ವಿಶ್ವವಿದ್ಯಾಲಯಾಚ್ಯಾ ಡೊ ಚಂದ್ರಲೇಖಾ ಡಿಸೋಜಾನ್ ಅಧ್ಯಕ್ಷಪಣ್ ಘೆತಲ್ಲೆಂ ತರ್ ಫಾ ಮೆಲ್ವಿನ್ ಪಿಂಟೊ ಆನಿ ವಿಲ್ಸನ್ ಕಟೀಲ್ ಹಾಂಣಿ ತಾಂಚೆ ಪ್ರಬಂಧ್ ಮಾಂಡಲ್ಲೆ. ತೆ ಆಮಿ ಹಾಂಗಾಸರ್ ಶಿಂಕ್ಳೆ ಕ್ರಮಾರ್ ಪರ್ಗಟ್ ಕರ್ತಾಂವ್ - ಸಂಪಾದಕ್)
ದುಸ್ರಿ ಕವಿತಾ: ಖರಸ್
ಪಯ್ಲೆ ಕವಿತೆಂತ್ ಸೊಂಶ್ಯಾಚೆ ಕಾನ್ ದಿಲೆ. ಸೊಸುನ್ ವ್ಹರ್ಚೆಂ ತ್ರಾಣ್ ಮಾಗ್ಲೆಂ; ಕಿತೆಂ ತರೀ ಸಮ್ಜೊಂಕ್. ಪುಣ್ ಹೆ ಕವಿತೆಂತ್ ಸಮ್ಜೊಂಕಯ್ ಸಕ್ಲೊನಾ ಕವಿ. ಚಾಫ್ರಾಚ್ಯಾ ಮಟ್ಟಾರ್ ಪಳೆಂವ್ಕ್ ಗೆಲ್ಯಾರ್ ಹಿ ಅತಿರೇಕಾಚ್ಯಾ ನಿರಾಸ್ಪಣಾಚಿ ಕವಿತಾ.
ಕಾನಾಂಚಿ ದೂಕ್ ಸೊಸುನಚ್ ತೊ ಆಲ್ಮಾರಿಂತ್ಲ್ಯಾ ಬುಕಾಂತ್ಲಿ ಕವಿತಾ ವಾಚುಂಕ್ ಅತ್ರೆಗ್ತಾ. ತಿಕಾಯಿ ಕಿರ್ಕೊಳ್ ವಾಳಯ್ ವಾಚುನ್ ವೆತಾ, ಕವಿ ಖರ್ಶೆತಾ.
ಉಪ್ರಾಂತ್ ಥೊಡೆ ಕಡ್ವೆ ಹೆ ಕವಿತೆಂತ್ ಯೆತಾತ್. ಝಾಡಾವಯ್ಲೆ ತಾಳಿಯೆಂತ್ಲಿ ಚಿಕೊಳಿಂ ಮಾಳುಂಕ್ ಆಶೆತಾನಾ ಶೆಜಾರ್ಚಿ ಚಲಿ ಮಾಳುನ್ ವೆತಾ. ರಸ್ಮಿ ಆಂಗ್ಲೆಂ ನ್ಹೆಸಲ್ಲೆಕ್ ವೆಂಗುಂಕ್ ಆಶೆತಾನಾ ತಿಗೆಲೊ ನೊವ್ರೊ ವೆಂಗೊನ್ ವೆತಾ. ತಳ್ಯಾಂತ್ಲ್ಯಾ ಲ್ಹಾರಾಂನಿ ಉಪ್ಯೆಂವ್ಕ್ ಆಶೆತಾನಾ ಆಡ್ಸರ್ ಸೊಣ್ಣಾಂ ಉಪ್ಯೆವ್ನ್ ವೆತಾತ್. ವೆಳೆವಯ್ಲಿಂ ಕರ್ಲಾಂ ವಿಂಚುಂಕ್ ಆಶೆತಾನಾ ಸಾಂಡ್ಲಲಿಂ ಬಾಳಾಂ ವಿಂಚುನ್ ವೆತಾತ್. ಮೊಳ್ಬಾವಯ್ಲಿಂ ತಾರಾಂ ಮೆಜುಂಕ್ ವೆತಾನಾ ಮೊವಾಲಿ ಪೋರ್ ಮೆಜುನ್ ವೆತಾ. ಹ್ಯಾ ಸರ್ವ್ ಕಡ್ವ್ಯಾಂನಿ ನಿರಾಸ್ವಾದ್ ಖರ್ಶೆತಾ ಆನಿ ಖರ್ಶೆತಾ. ಪುಣ್ ಹ್ಯಾ ಖರ್ಶೆವ್ಣೆ ಮಧೇಂಯ್ ದೊ. ವಿಲಿಯಮ್ ದಸಿಲ್ವಾನ್ ಸಾಂಗಲ್ಲೆಬರಿ ನಿರಾಸ್ವಾದಾಕ್ ಉಸ್ವಾಸ್ ಫುಂಕುಂಕ್ ಕವಿ ಕಿತ್ಲೊ ಯಶಸ್ವಿ ಜಾಲಾ ತೆಂ ಮ್ಹಜ್ಯಾನ್ ಸಾಂಗೊಂಕ್ ಜಾಯ್ನಾ.
ಪುಣ್ ಹ್ಯಾ `ಖರಸ್' ಕವಿತೆಚೊ ಆಕ್ರೇಚೊ ಕಡ್ವೊ ಬೋವ್ ಮುಖ್ಯ್ ಜಾತಾ.
`ಜಿಣಿಯೆಚಿಂ ನವ್ಲಾಂ, ಘುಸ್ಪಟಿಂ ಸವ್ಲಾಂ, ಸಮ್ಜೊಂಕ್ ಆಶೆಲೊಂ
ದುಬ್ಳಿಂ ಅಬಳಿಂ ಸಮ್ಜೊಂಕ್ ಸಕ್ಲಿಂ, ಹಾಂವ್ ಖರ್ಶೆಲೊಂ'
ಹಾಂಗಾಸರ್ `ಸೊಂಶ್ಯಾಚೆ ಕಾನ್' ಂತ್ಲ್ಯಾ ಹಾಂವೆಂ ಹಾಂವೆಂ ಮಾಂಡುನ್ ಹಾಡಲ್ಲ್ಯಾ ಕಿತೆಂ ತರೀ ಆಯ್ಕೊನ್ ಸಮ್ಜೊನ್ ಘೆಂವ್ಚೆ ಆಶೆಕ್ ತೆಂಕೊ ಮೆಳ್ತಾ. ತರ್ ಕವಿ ಥಂಯ್ ಥೊಡಿಂ ಜಿಣಿಯೆಚಿಂ ನವ್ಲಾಂ ಆನಿ ಘುಸ್ಪಟಿಂ ಸವಲಾಂ ಆಸಲ್ಲಿಂ. ಹ್ಯಾ ದ್ವಂದ್ವಾಂಕ್ ಜಾಪಿ ಆಯ್ಕೊಂಕ್ ಆಶೆಲೊ. ಆತಾಂ ಸಮ್ಜೊಂಕ್ ಆಶೆಲೊ. ಪಯ್ಲೆ ಕವಿತೆಂತ್ ತ್ರಾಣ್ ತರೀ ಮಾಗ್ಲೆಂ. ಪುಣ್ ಹಾಂತುಂ ನಿತ್ರಾಣ್ ಜಾವ್ನ್ ಫಕತ್ ಖರ್ಶೆಲೊ.
ಆತಾಂ ತಿಸ್ರಿ ಕವಿತಾ: `ಚಾರ್ ಚವ್ಗಾಂ ಮಾನ್ ನಾ'
ಪಯ್ಲೆ ಕವಿತೆಂತ್ ಆಯ್ಕೊಂಕ್ ವಚೊನ್, ದುಸ್ರೆ ಕವಿತೆಂತ್ ಸಮ್ಜೊಂಕ್ ಆಶೆವ್ನ್ - ದೊನಾಂತಯ್ ಸಲ್ವೊನ್, ಆನಿ ಆತಾಂ ಕವಿ ಹೆ ಕವಿತೆಂತ್ ತೊಚ್ ಸಾಂಗ್ತಾ, `ಆಯ್ಕಾತ್ ಮ್ಹಾಕಾ, ಆಯ್ಕಾತ್ ಮ್ಹಾಕಾ' ಮ್ಹಣ್ ಬೊಬಾಟ್ತಾ.
ಆಯ್ಕೊಂಕ್ ಸಲ್ವೊನ್, ಸಮ್ಜೊಂಕ್ ಸಲ್ವಲ್ಲೊ ಕವಿ ಹಾಂಗಾಸರ್ ತೊಚ್ ಉಲಯ್ತಾ ಮ್ಹಣ್ತಾನಾ ದೆದೆಸ್ಪೊಪಣಾಚಿಂ ಉತ್ರಾಂ ಆಸಜೆ. ಪುಣ್ ಹಾಂಗಾಸರ್ ದೆದೆಸ್ಪೊರ್ಪಣ್ ಆಸಾ. ಪುಣ್ ಕವಿತೆಚೆ ಕುಡಿಂತ್ ಕಸಲೀಯ್ ಬದ್ಲಾವಣ್ ನಾ. ಜಾಂವ್ ಶೈಲೆಂತಯ್. ಪಾಂಚ್ ಕಡ್ವ್ಯಾಂಚಿ ಕವಿತಾ ಹಿ. ಹರ್ಯೆಕಾ ಕಡ್ವ್ಯಾಂತಯ್ `ಆಯ್ಕಾತ್ ಮ್ಹಾಕಾ' ಆಸಾ. ಪಯ್ಲ್ಯಾ ಕಡ್ವ್ಯಾಂತ್ ಕವಿ ಮ್ಹಣ್ತಾ - ಕಲ್ವಂತಾಚ್ಯಾ ಕಮ್ರಾರ್ ಭಾಂಗಾರಾಚೆಂ ನೆವಾಳೆಂ ಆಸ್ಲ್ಯಾರಿ, ನಾಕಾಕ್ ನೊತಿಂ, ಗಳ್ಯಾಂತ್ ಸುವರ್ಣಾಚೆಂ ಘೊಸಾಳೆಂ ಆಸತ್ ಮ್ಹಣ್ತಾ ಆನಿ ಸಾಂಗ್ತಾ:
`ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಸಂಸ್ರಾಕ್ ಹಾಚೆಂ ಭಾನ್ ನಾ
ಚಾರ್ ಚವ್ಗಾಂ ಮಾನ್ ನಾ'
ದುಸ್ರ್ಯಾ ಕಡ್ವ್ಯಾಂತ್ ಗರಿಬಾಚ್ಯಾ ಗುಮ್ಟಾವೆರಿ ಸೊಭಾಗೆಚೊ ನಾದ್ ಆಸಾ ಆನಿ ತಳ್ವ್ಯಾಂ ತಾಲ್, ಪಾಂಯಾಂ ನಾಚ್, ಸಂಗೀತಾಚೊ ಸಾದ್ ಆಸಾ. ಹ್ಯಾ ಸಂಗೀತಾಕ್ ಆಯ್ಕೊಂಚಿ ಆಶಾ ಕೊಣಾಕಿ ನಾ ಮ್ಹಣ್ತಾ ಕವಿ ಅಶೆಂ ಆಪ್ಲ್ಯಾಚ್ ಉತ್ರಾಂನಿ -
`ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಆಯ್ಕತೆಲ್ಯಾಂಕ್ ಕಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ'
ತಿಸ್ರ್ಯಾ ಕಡ್ವ್ಯಾಂತ್ ಮಳ್ಯಾಂತುಲ್ಯಾ ತಳ್ಯಾಂ ತಿರಿ ಕಾರೆಣ್ಯಾಚಿ ರಾಸ್ ಆಸಾ. ತಾಚ್ಯಾ ರೊಸಾಕ್, ವ್ಯಾಧಿ ನಾಸ್ ಕರ್ಚಿ ಸಕತ್ ಆಸಾ. ಆನಿ ಕವಿ ಮ್ಹಣ್ತಾ:
`ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಕೊಣಾಕ್ ತಾಚೆಂ ಧ್ಯಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ'
ಆನಿ ಚವ್ತ್ಯಾಂತ್ ದೊಂಗ್ರಾವೆಲ್ಯಾ ಝರ್ಯಾವೆರಿ ಅಮೃತಾಚಿ ಧಾರ್ ಆಸಾ, ತಾಂತುಂ ಗೊಡಾಮಿಟಾ ಲವಣಾಂಚಿ ಧಾರ್ ಆಸಾ
`ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಕೊಣಾಕ್ ತಾಚಿ ತಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ'
ಹೆ ಕವಿತೆಂತ್ ವಯ್ಲ್ಯಾ ಚಾರ್ ಕಡ್ವ್ಯಾಂನಿ ಕವಿನ್ ಆಪ್ಲೆಂ ನಿರಾಸ್ಪಣ್ ಕಲ್ವಂತಾಂಚ್ಯಾ ಆಂಗಾವಯ್ಲ್ಯಾ ಭಾಂಗಾರಾಕ್, ಗರೀಬಾಚ್ಯಾ ಸಂಗೀತ್ ಸಾದಾಕ್, ತಳ್ಯಾಂ ದೆಗೆಚ್ಯಾ ಕಾರೆಣ್ಯಾಚೆ ರಾಶಿಕ್ ಆನಿ ದೊಂಗ್ರಾವಯ್ಲ್ಯಾ ಅಮೃತಾಚೆ ಧಾರಿಕ್ ಧಾಡ್ಲಾಂ. ಪುಣ್ ಆಕ್ರೇಚ್ಯಾ ಕಡ್ವ್ಯಾಂತ್ ತೊ ತಾಚೆಂಚ್ ನಿರಾಸ್ಪಣ್ ಉಲಯ್ತಾ:
`ಕೊಂಕಣಿಚೊ ಕವಿ ಹಾಂವ್ ಜಾತಾತ್ ಮ್ಹಜಿ ಸೊಭಾಣಾಂ
ಮರ್ಚೆ ಆದಿಂ ಮಡ್ಯಾಚೆರಿ ಕರೀತ್ ಆಸಾತ್ ರುದಾನಾಂ
ತರೀ ಬಾಬಾ ಆಯ್ಕಾತ್ ಮ್ಹಾಕಾ
ಜೆವ್ಣಾಕ್ ಕೆದಿಂ ಪಾನ್ ನಾ
ಚಾರ್ ಚೊವ್ಗಾಂ ಮಾನ್ ನಾ'
ಪಯ್ಲೆ ಕವಿತೆಂತ್ ತ್ರಾಣ್ ಮಾಗ್ಲ್ಯಾರಿ, ದುಸ್ರೆ ಕವಿತೆಂತ್ ಖರ್ಶೆಲ್ಯಾರಿ, ಹೆ ಕವಿತೆಂತ್ ಆನಿಕಯ್ ಮಾರ್ಮಿಕ್ ಜಾಲ್ಯಾರಿ ಕವಿಥಂಯ್ ಉಸ್ವಾಸ್ ಆಸಾ. ತೊ ಆಜೂನ್ ಮರೊಂಕ್ ನಾ. ಪಯ್ಲೆ ಕವಿತೆಂತ್ ಕಾನ್ ಧರಲ್ಲೆ, ಹಾಂಗಾಸರ್ ಮರ್ಚ್ಯಾ ಪಯ್ಲೆಂಚ್ ರುದಾನಾಂ ಕರ್ತಾತ್. ಪುಣ್ ಕವಿ ಮ್ಹಣ್ತಾ: ಹಾಂವ್ ಮರೊಂಕ್ ನಾ, ಆಯ್ಕಾ ಮ್ಹಾಕಾ. ದೊ. ವಿಲಿಯಮ್ ದಸಿಲ್ವಾನಾ ಸಾಂಗ್ಚೆಬರಿ ತಾಚ್ಯಾ ನಿರಾಸ್ಪಣಾಚೊ ಉಸ್ವಾಸ್ ಆಜೂನ್ ಆಸಾ. ತಾಚ್ಯಾ ಮಡ್ಯಾರ್ ಸೊಭಾಣಾಂ ಕೆಲ್ಯಾರಿ ತಾಚ್ಯಾ ನಿರಾಸ್ಪಣಾಚೊ ಉಸ್ವಾಸ್ ಆಸಾ, ಖರಸ್ ಆಸಾ.
ತ್ಯಾಯಿ ನಿರಾಸ್ ಉಸ್ವಾಸಾಚೆ ಖರ್ಶೆವ್ಣೆಕ್ ವೇಗ್ ಮೆಳ್ತಾನಾ ಕೊಂಕ್ಣಿ ಸೊಭಾಣಾಂಚ್ಯಾ ಆಸ್ಪಾಸ್ಚ್ಯಾ ರುಕಾಝಾಡಾಚಿಂ ಅನ್ಭೋಗಾಂತ್ ಪಿಕಲ್ಲಿಂ ಪಾನಾಂ ಮಾತಿಯ್ ಉಸ್ಕ್ಯಾರ್ ಝಡ್ಟಾತ್ ಆಸ್ತಲಿಂ. ದೇಂಟ್ ತುಟ್ಚೊ ನಿರಾಸ್ ಆವಾಜ್ ಪಾರ್ಕುಂಕ್ ಆಮ್ಕಾಂಯ್ ಸುಕ್ಷೀಮಾಯೆಚೆ ಕಾನ್ ಜಾಯ್ ಆನಿ ತಿ ಪಿಂರ್ಗೊಣ್ ಸೊಸುಂಕ್ ಕಾನಾಂಕ್ ತ್ರಾಣ್ಯ್ ಜಾಯ್.
ಯೆದೊಳ್ ಪರ್ಯಾಂತ್ ಮ್ಹಾಕಾ ಸೊಸಲ್ಲ್ಯಾಕ್ ತುಮ್ಚ್ಯಾ ಕಾನಾಂಕ್ ಋಣಿ.
-ಸಮಾಪ್ತ್