Kavita Khodd

ಫಾತೊರ್ ಕಾತರ್ನ್, ರೇಂವ್ ಪೊಕೊರ್ನ್ ನಾಸ್ ಜಾವ್ನ್ ವೆಚಿಂ ಮಲೆಕೊಡಿ ಆನಿ ಪೊಯ್ತಾಜೆ

ಫಾತೊರ್ ಕಾತರ್ನ್, ರೇಂವ್ ಪೊಕೊರ್ನ್ ನಾಸ್ ಜಾವ್ನ್ ವೆಚಿಂ ಮಲೆಕೊಡಿ ಆನಿ ಪೊಯ್ತಾಜೆ

ಕವಿತಾ ಟ್ರಸ್ಟಾಚೊ ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಕೊಂಕ್ಣಿ ಕವಿಂಕ್ ಆಪ್ಲೊ ಗಾಂವ್ ಬಂಟ್ವೊಳ್ ಆಪವ್ನ್ ವರ್‍ಚೆಂ ಹೆಂ ಚವ್ತೆ ಪಾವ್ಟಿಂ.  ಪಯ್ಲೆಪಾವ್ಟಿಂ, ಆಡ್ಬೊಸರ್ ಪುನ್ವೆಚಾನ್ನ್ಯಾಂತ್ ಮಲೆಕೊಡಿಚ್ಯಾ ದೊಂಗ್ರಾರ್ ಕವಿತೆ ಸಾಂಗಾತಾ ಜೆರಿಜುಜೆ (ಜೆಜು) ಚಿಂ ಫೊಕಣಾಂ ಆನಿ ಸನ್ನಾಂಮಾಸಾಚೆಂ ಗಡ್ದ್ ಜೆವಣ್ ಆಸ್ಲೆಂ.  ಹಾಂವ್ ತವಳ್ ಮುಂಬಯ್ ಮ್ಹಾಶೆರಾಕ್ ಪಾಟ್ ಕರ್‍ನ್ ಗಾಂವಾಕ್ ಆಯಿಲ್ಲೊಂ ಮಾತ್ ಜಾಲ್ಲೆವರ್‍ವಿಂ ಕವಿಗೋಶ್ಟಿಂತ್ ಕವಿತಾ ವಾಚ್ಚಿ ಮ್ಹಜಿ ತಯಾರಿ ಖಂಡಿತ್ ನಾತ್ಲಿ.  ಆಜ್ , ಚಡ್‌ಉಣೆಂ ಜೆ ಕವಿಗೋಶ್ಟಿಂತ್ ಹಾಂವ್ ವಾಂಟೊ ಘೆತಾಂ, ಥಂಯ್ ಏಕ್ ತರೀ ನವಿಚ್ ಕವಿತಾ ವಾಚ್ಚಿ ಸವಯ್‌ಶಿ ಹಾಂವೆ ಕರ್‍ನ್ ಘೆತ್ಲ್ಯಾ ಆನಿ ಹೆರ್ ಸಾಂಗಾತಿ ಕವಿಂಕೀ ಹೆಂ ಸಾಂಗ್ತೇ ಆಸಾಂ. ಪುಣ್ ತೆ ದೀಸ್ ಹಾಂವ್ ಕವಿಗೋಶ್ಟಿಕ್ ಕವಿತಾ ವಾಚುಂಕ್ ನ್ಹಯ್ ಬಗರ್ ಏಕ್ ಕಾವ್ಯಾರಸಿಕ್ ಜಾವ್ನ್ ಗೆಲ್ಲೊಂ ತರೀ, ಕವಿತಾ ವಾಚ್ಚೆ ಕವಿ ಉಣೆ ಆಸ್ಲೆಲ್ಯಾನ್, ಕವಿಗೋಶ್ಟಿಚಿ ಜವಾಬ್ದಾರಿ ಘೆತುಲ್ಲ್ಯಾ ವಿತೊರಿನ್ ಮ್ಹಾಕಾಯೀ ಮ್ಹಜಿ ಏಕ್ ಆದ್ಲಿ ಕವಿತಾ ವಾಚುಂಕ್ ಅವ್ಕಾಸ್ ದಿಲೊ ಮಾತ್ ನಯ್, 'ಕುಪಾಂ ಪೊಂದ್ಲಿ ಮುಕಾಂ' ಬುಕಾಂತ್ಲಿ ಏಕ್ ಕವಿತಾಯೀ ವಿಂಚುನ್ ಕಾಡ್ನ್ ದಿಲಿ.

ದುಸ್ರ್ಯಾ ವರ್‍ಸಾಯೀ ವಿಲಿಯಮ್ ಪಾಯ್ಸಾನ್ ಆಮ್ಕಾಂ ಕವಿತಾ ವಾಚುಂಕ್ ಮಲೆಕೊಡಿ ದೊಂಗ್ರಾಕ್‌ಚ್ ಆಪವ್ನ್ ವೆಲೆಂ ಆನಿ ತವಳ್‌ಚ್ ಮಂಗ್ಳುರಾಂತ್ ‘ಪಬ್ಬ್ ಎಟ್ಯಾಕ್’ ಜಾಲ್ಲೆವರ್‍ವಿಂ ಕಲಾಕಾರ್ ವಿಲ್ಸನ್ ಕಯ್ಯಾರಾಚೆಂ ಏಕ್ ಪೇಂಯ್ಟಿಂಗ್‌ಯೀ ಕವಿಗೋಶ್ಟಿಂತ್ ಪ್ರದರ್ಶನಾಕ್ ದವರ್‌ಲ್ಲೆಂ. ಹ್ಯಾ ಪಾವ್ಟಿಂ ಫೊಕಣಾಂ ನಾತ್ಲಿಂ, ಬಗರ್ ಹಾಂವ್, ಆಕಾರಾಚೊ ಕಲಾಕಾರ್ ದಯಾ ವಿಕ್ಟರ್ ಲೋಬೊ, ವಿಲ್ಸನ್ ಕಟೀಲ್ ಆನಿ ವಿಲಿಯಮ್ ಪಾಯ್ಸ್ ಪೇಂಯ್ಟಿಂಗಾ ವಿಶ್ಯಾಂತ್ ಉಲಯ್ಲ್ಯಾಂವ್ ತರ್, ಹಾಸ್ಯ್ ಕವಿ ಸಿಜ್ಯೆಸ್ ತಾಕೊಡೆನ್ ಪೇಂಯ್ಟಿಂಗಾಂತ್ಲೆಂ ಅರ್‍ಧೆಂ ವಿಣ್ಗೆಂ  ಚೆಡುಂ ಆಪ್ಲಿ ಭಾಯ್ರ್ ಪಡ್‌ಲ್ಲಿ ದುದಾಚಿ ಗಾಯ್ ಸೊಧುನ್ ಮಲೆಕೊಡಿಚ್ಯಾ ದೊಂಗ್ರಾಕ್ ಪಾವ್ಲಾಂಗಾಯ್ ತಶೆಂ ದಿಸ್ತಾ ಮ್ಹಣ್ ಲ್ಹಾನ್‌ಶೆಂ ಫೊಕಾಣ್ ಮಾರ್‍ಲೆಂ.

ವಿಶೇಸ್ ಮ್ಹಳ್ಯಾರ್ ಹಾಂವೆ ಹ್ಯಾಚ್ ಕವಿಗೋಶ್ಟಿ ಖಾತಿರ್ ಮ್ಹಣ್ ಏಕ್ ಕವಿತಾ ಬರಯಿಲ್ಲಿ ಆನಿ ಕವಿತಾ ಟ್ರಸ್ಟಾಚೊ ಅಧ್ಯಕ್ಶ್ ಮೆಲ್ವಿನ್ ರೊಡ್ರಿಗಸಾನೀ ತಾಚಿ ಏಕ್ ಕವಿತಾ ಪೇಶ್ ಕೆಲಿ. ದೊನೀ ಕವಿತೆಂಚೊ ವಿಶಯ್ ಏಕ್‌ಚ್ ಆಸ್ಲೊ ಮಲೆಕೊಡಿಚೊ ದೊಂಗೊರ್. ( ಕವಿ ಮೆಲ್ವಿನ್ ರೊಡ್ರಿಗಸಾನ್ ಮಲೆಕೊಡಿ ದೊಂಗ್ರಾಸುವಾತೆಚೇರ್ ಬರಯಿಲ್ಲಿ ಕವಿತಾ ತಾಚೊ, ಡೊ. ಟಿ.ಎಮ್.ಎ ಪಯ್ ಫಾಂವ್ಡೇಶನ್ ಪುಸ್ತಕ್ ಪುರಸ್ಕಾರ್ ಜಿಕ್ಪಿ ಕವಿತಾ ಜಮೊ, ‘ಪ್ರಕೃತಿಚೊ ಪಾಸ್’ ಹಾಂತುಂ ಅಸಾ. ಪರ್‍ಗಟ್ಣಾರ್ - ಕವಿತಾ ಪಬ್ಲಿಕೇಶನ್ಸ್ , ವರಸ್ :  2008. ಮ್ಹಜಿ ಕವಿತಾ ವಿತೊರಿನ್ ತೊ ಮಿತ್ರಾಚೊ ಸಂಪಾದಕ್ ಆಸ್ತಾನಾ 8 ಮಾರ್‍ಚ್ 2009ವ್ಯಾ ಅಂಕ್ಯಾರ್ ಛಾಪುಲ್ಲಿ, ಆಜೂನ್ ಬುಕಾರುಪಾರ್ ಯೇಂವ್ಕ್ ನಾ). ಪುಣ್ ಹಾಂವೆಯೀ, ಕವಿ ಮೆಲ್ವಿನಾನೀ ಮಲೆಕೊಡಿ ಮ್ಹಳ್ಳ್ಯಾ ದೊಂಗ್ರಾಕ್ ಪಳೆಂವ್ಚಿ ದೀಶ್ಟ್ ಮಾತ್ ಸಾಮ್ಕೀಚ್ ವೆಗ್ಳಿ. ಕವಿ ಮೆಲ್ವಿನ್ ಮಲೆಕೊಡಿ ದೊಂಗ್ರಾಚೆ ಸೊಭಾಯೆಕ್ ಭುಲ್ತಾ ಆನಿ ಸಗ್ಳೋಚ್ ಶರಣಾಗತ್ ಜಾತಾ. ದೆಕುನ್‌ಚ್ ತೋ ಮ್ಹಣ್ಟಾ:

ಯೇ ಮ್ಹಜ್ಯಾ ಮಲೆಕೊಡಿ
ಖಿಣಾಕ್ ಮ್ಹಾಕಾ ವೆಂಗೊನ್ ಧರ್
ಯೇ ಮ್ಹಜ್ಯಾ ಮಲೆಕೊಡಿ
ವ್ಯಾಧಿ ಮ್ಹಜ್ಯೊ ಶಮನ್ ಕರ್! 

ಹಾಂವ್ ತಸೊ ನ್ಹಯ್, ಹಾಂವ್ ಮಲೆಕೊಡಿದೊಂಗ್ರಾಚೆ ನಿಶ್ಟುರಾಯೆಚೆಂ ಉದಾರ್ ಮಾಗ್ತಾಂ.

ದೆಕುನ್ ಮ್ಹಣ್ಟಾಂ:

ಜಿಬೆಕ್ ಮ್ಹಜ್ಯಾ ಉತರ್ ತುಜೆಂ
ಉಸ್ಣೆಂ ದೀ
ಅಸ್ಕತ್ ಕಾಳ್ಜಾಕ್ ಮ್ಹಜ್ಯಾ
ಫಾತೊರ್ ಕರ್ 

ಪುಣ್ ಆಮ್ಚೊ ದೊಗಾಂಯ್ಚೊಯಿ ಶೆವೊಟ್ ಏಕ್‌ಚ್: ಸುಟ್ಕಾ, ಸಮಾಜಿಕ್ ಪಿಡೆಥಾವ್ನ್.

ಮಲೆಕೊಡಿಂತ್ ದುಸ್ರೆ ಪಾವ್ಟಿಂ ಸನ್ನಾಂ ಮಾಸಾಂಚ್ಯಾ ಗಡ್ದ್ ಜೆವ್ಣಾ ಬದ್ಲಾಕ್ ಮಾಪ್ಳ್ಯಾಚಿ ಬಿರಿಯಾನಿ ಆಸ್ಲಿ. 

ತಿಸ್ರ್ಯಾ ವರ್‍ಸಾ ವಿಲಿಯಮ್ ಪಾಯ್ಸಾನ್ ಕವೀಂಕ್ ಪೊಯ್ತಾಜೆ ನೇತ್ರಾವತಿ ನಂಯ್ಚೆ ತಡಿಕ್ ಆಪವ್ನ್ ವೆಲೆಂ. ಹಾಸ್ಯ್ ಕವಿ ಸಿಜ್ಯೆಸಾನ್ ದುಸ್ರ್ಯಾವರ್‍ಸಾ ತೆಂ ಕಶೆಂ ಕಲಾಕಾರ್ ವಿಲ್ಸನ್ ಕಯ್ಯಾರಾಚೆಂ ಪೇಂಯ್ಟಿಂಗ್ ಪಳೆವ್ನ್ ಗಾಯ್ಚಿ ಗಜಾಲ್ ಸಾಂಗ್ಲಿಗೀ ಆನಿ ತಿ ಕೊಣೆ ಕಾಯ್ದೊಕರ್‍ಪ್ಯಾನ್ ಆಯ್ಕಾಲಿಗೀ, ಹೆ ಪಾವ್ಟಿಂ ಗಾಂವ್‌ಭರ್ ಗೊರ್‍ವಾಂ ಕಸಾಯ್ ಕಾಯ್ದ್ಯಾಚೀಚ್ ಚರ್‍ಚಾ. ದೆಕುನ್ ಹಿ ಕವಿ ಗೋಶ್ಟಿ ಹೇಚ್ ಗಜಾಲಿ ಭೊಂವ್ತಿಂ ಚಲ್ಲಿ. ಹಾಂವೆಂ, ಕವಿ ಮೆಲ್ವಿನಾನ್ ಆನಿ ಥೊಡ್ಯಾ ಹೆರ್ ಕವಿಂನೀಯ್ ಗೊರ್‍ವಾಂ ಕಸಾಯ್ ಕಾಯ್ದ್ಯಾವಿಶ್ಯಾಂತ್ ಕವಿತಾ ವಾಚ್ಲ್ಯೊ ಮಾತ್ ನಯ್ ಹಾಂವೆ ಹ್ಯಾಚ್ ವಿಶಯಾಚೇರ್ ಮ್ಹಜೆ ಥೊಡೆ ವಿಚಾರ್ ಮಾಂಡ್ಲೆ.  (ಹೆ ವಿಚಾರ್ , 'ಗೋಧೂಳಿ ವೇಳ್, ವಾಗಾಚೊ ನಿಯಾಳ್'’ ಕವಿತಾ ಟ್ರಸ್ಟಾಚಿ ವೆಬ್‌ಸಾಯ್ಟ್ ಕೊಂಕಣಿಪೊಯೆಟ್ರಿ.ಕೊಮ್‌ಚೆರ್ ಆತಾಂಯೀ ವಾಚ್ಯೆತ್).  

ಹ್ಯಾ ಪಾವ್ಟಿಂಯೀ ಕಲಾಕಾರ್ ವಿಲ್ಸನ್ ಕಯ್ಯಾರಾನ್ ಅಕ್ರಿಲಿಕಾಚೇರ್ ಏಕ್ ವಾಗಾಚೆಂ ಆನಿ ಏಕ್ ಗಾಯ್ಚೆಂ, ಅಶೆಂ ಲ್ಹಾನ್ ದೋನ್ ಅಮೂರ್‍ತ್ ಪೇಂಯ್ಟಿಂಗಾಂ ಕರ್‍ನ್  ದಿಲ್ಲಿಂ. ಆನಿ ತಿಂ ಆಮಿಂ ಥಂಯ್ ದವರಿಲ್ಲಿಂ.  ಹ್ಯಾಚ್ ಕವಿಗೋಶ್ಟಿಂತ್ ಕೆನರಾ ಕೊಲೆಜಿಂತ್ ಶಿಕ್ಚ್ಯಾ ವೆಂಕಟೇಶ್ ನಾಯಕಾನ್ ಏಕ್ ಆಪುರ್‍ಬಾಯೆಚಿ ಕವಿತಾ ಪೇಶ್ ಕೆಲ್ಲಿ. ಬೋವ್‌ಶಾ ಹೀಚ್ ಕವಿತಾ ತಾಣೆ ಉಪ್ರಾಂತ್ ರಾಕ್ಣೊನ್ ಸಾಹಿತ್ಯ ಅಕಾಡೆಮಿ ಸಾಂಗಾತಾ ಮೆಳೊನ್ ಮಾಂಡುನ್ ಹಾಡುಲ್ಲ್ಯಾ ಕವಿಸಂದಿಂತ್ ವಾಚ್ಲ್ಯಾ.  ಜಿಯೊ ಅಗ್ರಾರಾನ್ ಹಿ ಕವಿಗೋಶ್ಟಿ ಚಲವ್ನ್ ವೆಲ್ಲಿ ಆನಿ ಹಿ ಕವಿಗೋಶ್ಟಿ ಸನ್ನಾಂ ಮಾಸಾಚೆಂ ಜೆವಣ್, ಬಿರಿಯಾಣಿ ನಾಸ್ತಾನಾ ಫಕತ್ ಅಂಬಡೆ ಶಿರಾಕ್ ಸೀಮಿತ್ ಜಾಲಿ ತರೀ ಕವಿಂಕ್ 'ದೋಣಿ'ರ್ ನ್ಹಂಯ್ ಉತ್ರೊಂಚೊ ಮಧುರ್ ಅನ್ಭೋಗ್ ದೀವ್ನ್ ಉಡಾಸಾಂತ್ ಉರ್‍ಲಿ.

ಹ್ಯಾ ಪಾವ್ಟಿಂ, ಚವ್ತ್ಯಾ ವರ್‍ಸಾ ವಿಲಿಯಮ್ ಪಾಯ್ಸಾನ್ ಪರ್‍ತ್ಯಾನ್ ಪೊಯ್ತಾಜೆ, ಪೊರುಂ ಗೆಲ್ಲ್ಯಾ ಜಾಗ್ಯಾಕ್‌ಚ್ ಕವಿಂಕ್ ಆಪವ್ನ್ ವೆಲೆಂ. ಹ್ಯಾ ಪಾವ್ಟಿಂ ಮಂಗ್ಳುರ್‍ಚ್ಯಾ ಕವಿಂ ಸಾಂಗಾತಾ ಗೊಂಯಾಥಾವ್ನ್ ಫಕತ್ ಹೆ ಕವಿಗೋಶ್ಟಿಕ್‌ಚ್ ಮ್ಹಣ್ ಆಯಿಲ್ಲೊ ಸಾಹಿತ್ಯ್ ಅಕಾಡೆಮಿ ಪುಸ್ತಕ್ ಪುರಸ್ಕಾರ್ ಜಿಕ್ಪಿ ಕವಿ ಸತ್ತರ್ ವರ್‍ಸಾಂಚೊ ಕವಿ ಜೇಸ್ ಫೆರ್‍ನಾಂಡಿಸ್ ಸಯ್ತ್ ಆಸ್ಲೊ.  ತಾಣೆ ಆಪ್ಲೆ ಕವಿತೆಂತ್ ಕಿಶ್ಣಾಚಿ ಪಿರ್‍ಲುಕ್ ಆನಿ ಕ್ರೀಸ್ತಾಚೊ ಖುರಿಸ್ ಹೆ ಸಂಕೇತ್ ವಾಪರುನ್ ಏಕ್ ಅಂತರ್‌ಧರ್‍ಮೀಯ್ ಸಂವಾದ್ ಕಶೆಂ ಮಾಂಡ್ಲೊ.  ಬಾ. ಆಲ್ವಿ ಕಾರ್‍ಮೆಲಿತಾನ್ ಸಾಮಾರಿಯಾಚೆ ಸ್ತ್ರೀಯೆ ವಿಶ್ಯಾಂತ್ಲಿ ಏಕ್ ಆಪುರ್ಬಾಯೆಚಿ ಕವಿತಾ ಪೇಶ್ ಕೆಲಿ. ಚಡುಣೆಂ ಸಾತ್ ವರ್‍ಸಾಂಆದಿಂ ಸಾಮಾರಿಯಾಚೆ ಸ್ತ್ರೀಯೆವಿಶ್ಯಾಂತ್‌ಚ್ ಹ್ಯಾಚ್ ಬಾ.ಆಲ್ವಿನ್ ಆಪ್ಲ್ಯಾ ‘ಪಿಂತುರಾಂ’ ಕವಿತಾಜಮ್ಯಾಂತ್ ‘ತಾನ್’ ಮ್ಹಳ್ಳಿ ಕವಿತಾ ಬರಯಿಲ್ಲಿ. ಹ್ಯಾ ಬುಕಾಕೀ ಕರ್‍ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಪುಸ್ತಕ್ ಪುರಸ್ಕಾರ್ ಮೆಳ್‌ಲ್ಲೊ. ಹಾಂವ್ ಪೊರ್‍ಚ್ಯಾ  ಕವಿಗೋಶ್ಟಿಕ್ ಅಧ್ಯಕ್ಶ್ ಬಸ್‌ಲ್ಲೊಂ ಜಾಲ್ಲ್ಯಾನ್ ಹೆ ಗಜಾಲಿಂಚೊ ಹಾಂವೆ ಥಂಯ್ಚ್ ಉಲ್ಲೇಕ್ ಕೆಲೊ. ಹ್ಯೊ ದೊನೀ ಕವಿತಾ, ತ್ಯೊ ದೊನೀ ಬರಂವ್ಕ್ ಲಾಗ್‌ಲ್ಲೊ ಸಾತ್ ವರ್‍ಸಾಂಚೊ ಅಂತರ್ ಆನಿ ಅಂತರಾಮಧ್ಲಿ ಕವಿಚಿ ಆನಿ ಕಾವ್ಯಾಚಿ ವಾಡಾವಳ್ ಆನಿ ಸಾಮಾರಿಯಾಚೆ ಸ್ತ್ರೀಯೆಲಾಗ್ಗಿಂ ಯೆಂವ್ಚೆ ಸಾತ್ ದಾದ್ಲೆ - ಹ್ಯಾ ಸರ್‍ವ್ ಗಜಾಲಿಂ ವಿಶ್ಯಾಂತ್‌ಚ್ ಏಕ್ ಸವಿಸ್ತಾರ್ ಪ್ರಬಂದ್ ಬರವ್ನ್ ಕಾಡ್ಯೆತ್.

ವಿಶೇಸ್ ಮ್ಹಳ್ಯಾರ್ ಸ್ಟೀವನ್ ಕ್ವಾಡ್ರಸಾನ್ ಕವಿತೆಚೆ ವೊಳಿ ವಾಚುಲ್ಲ್ಯಾ ಜನ್ನಕವಿಚ್ಯಾ  ಯಶೋಧರ ಚರಿತಾಚಿ ಕಾಣಿಯೀ ಸಾತ್ ಜಲ್ಮಾಂಚಿಚ್.  ಹ್ಯಾ ಸಾತ್ ಜಲ್ಮಾಂಚ್ಯಾ ರೂಪಕಾಕ್ ಆನಿ ಸಾಮಾರಿಯಾಚೆ ಸ್ತ್ರೀಯೆಕ್ ಮೆಳೊಂಕ್ ಯೆಂವ್ಚ್ಯಾ ಸಾತ್ ದಾದ್ಲ್ಯಾಂಚ್ಯಾ ರೂಪಕಾಕ್ ಕಾಂಯ್ 'ಲಿಂಕ್' ಆಸಾಗೀ ಪಾರ್‍ಕಿಯೆತ್. ಸ್ಟೀವನ್ ಕ್ವಾಡ್ರಸಾನ್ ತರ್‍ಜಿಲ್ಲ್ಯಾ ಜನ್ನಕವಿಚ್ಯಾ ಯಶೋಧರ ಚರಿತ ಬುಕಾಕೀ ಕರ್‍ನಾಟಕ ಕೊಂಕಣೀ ಸಾಹಿತ್ಯ ಅಕಾಡೆಮಿಚೊ ಪುಸ್ತಕ್ ಪುರಸ್ಕಾರ್ ಮೆಳ್ಳಾ ಆನಿ ಹೆ ಸಗ್ಳೆ ಕವಿತಾ ಧರ್‍ಮಿಕ್ ವಿಶಯಾಚೆ. ಕಿರಿಸ್ತಾಂವ್ ಆನಿ ಜಯ್ನ್ ಧರ್‍ಮಾಚೆ.

ಕೆ.ವಿ.ತಿರುಮಲೇಶ್ ಆಪ್ಲ್ಯಾ ಅಂಕಣಾಂತ್ ಮ್ಹಣ್ಟಾ, ಮಿಲ್ಟನಾಚೊ ‘ಪ್ಯಾರಡಾಯ್ಸ್ ಲೊಸ್ಟ್’ ಜಾಂವ್, ಡಾಂಟೆಚಿ ‘ಡಿವಾಯ್ನ್ ಕೊಮೆಡಿ’ ಜಾಂವ್ ವಾ ಜನ್ನ ಮ್ಹಾಕವಿಚೆಂ ಯಶೋಧರಚರಿತ ಸಗ್ಳೆ ಧರ್‍ಮ್ ಪ್ರತಿಪಾದನ್ ಕರ್‍ಚೆಚ್.  (ನಮ್ಮ ಕಾಲದ ಕವಿತೆ, ಆಳ-ನಿರಾಳ / 14 ಮಾರ್‍ಚ್ 2011). ಪುಣ್ ಹೆಂ ಕೊಂಕ್ಣೆಕ್ ಕಿತ್ಲೆಂ ಲಾಗು ಜಾತಾ? ಚರ್‍ಚೆಚೊ ವಿಶಯ್.

ಥಂಡ್‌ಗಾರ್ ಗಾಡಿಯೆಂತ್ ಪೊಯ್ತಾಜೆಥಾವ್ನ್ ಪಾಟಿಂ ಯೆತಾನಾ ಹಾಂವೆಂ ಕವಿ ಮೆಲ್ವಿನ್ ರೊಡ್ರಿಗಸಾಕ್ ವಿಚಾರ್‍ಲೆಂ: 'ಆತಾಂ ಮಲೆಕೊಡಿ ದೊಂಗ್ರಾರ್ ಕವಿಗೋಶ್ಟಿ ಕಿತ್ಯಾಕ್ ಚಲನಾಂತ್?' ಕವಿ ಮೆಲ್ವಿನ್ ಮ್ಹಣಾಲೊ: ತುಂವೆಂ ಲಾಸ್ಟ್ ಟೈಮ್ ಪಳೆಂವ್ಕ್‌ನಾತ್ಲೆಂಯ್‌ಗೀ ಎಚ್ಚೆಮ್? ಥಂಯ್ ಪೂರಾ, ಥಂಯ್ ಥಂಯ್ ಖೊಂಡುನ್ ಪೊಕೊರ್‍ನ್ ಘಾಲ್ಲೆಂ ನ್ಹಯ್‌ಗೀ?  ತಿಂ ಕಲ್ಪನಿಂ ಆತಾಂ ಮಲೆಕೊಡಿ ದೊಂಗೊರ್‌ಭರ್‍ನ್ ವಿಸ್ತಾರ್‍ಲ್ಯಾಂತ್, ವಯ್ರ್ ವಚೊಂಕ್ ಜಾಯ್ನಾ.   ಕಲ್ಪನ್ಯಾ ಸಾರ್‍ಕ್ಯಾಚ್  ‘ಮರೂನ್’ ರಂಗಾಚಿ ಆಮ್ಚಿ ಗಾಡಿ ಬಿ.ಸಿ ರೋಡ್ ಪಾವ್‌ಲ್ಲಿ ಆನಿ ತೆ ಗಾಡಿಯೆಭಿತರ್‍ಲ್ಯಾ ಥಂಡ್‌ಗಾರ್ ಹವ್ಯಾಂತೀ ಹಾಂವ್ ಬಾರೀಕ್ ಘಾಮೆಲೊಂ,  ಚಿಂತೂನ್, ಯೆಂವ್ಚ್ಯಾ ವರ್‍ಸಾ   ಪೊಯ್ತಾಜೆಂತ್ ಕವಿಗೋಶ್ಟಿ ಕರ್‍ಚಿ ತರ್ , ಆಮ್ಕಾಂ ಬಸೊಂಕ್ ರೇಂವ್ ತರೀ ಉರತ್? ಕಾರಣ್,  ಪೊರುಂ ಆಮಿ ಬಸುಲ್ಲ್ಯಾ ಜಾಗ್ಯಾರ್ -  ಹೆ ಪಾವ್ಟಿಂ ‘ಮರಳು ಸಾಗಾಟದ ವಾಹನಾಂಚ್ಯಾ’ ರಾಕ್ಸಾರೊದಾಂಚೆಂ ಘಾಯ್ ಆಸ್ಲೆ ಆನಿ ಆಮಿ ತೆ ಜೊಗಾಸಾಣೆನ್  ಪುಸುನ್ ಕಾಡ್ನ್ ತಾಚೆರ್ ಜಮ್ಕಾಣ್ ಸೊಡವ್ನ್ ಬಸುಲ್ಲ್ಯಾಂವ್.

ಮ್ಹಜ್ಯಾ ಕಾಳ್ಜಾಕ್ ರೆವೊಡ್ಲೆಲೆ ಅಘೋಶಿತ್ ಭಿರಾಂತೆಥಾವ್ನ್ ಪಾವ್ಟಿಂಚ್ಯಾಕ್ ಸುಟ್ಕಾ ಜೊಡ್ಯಾಂ ಮ್ಹಣ್ ಹಾಂವೆಂ ಕವಿ ಮೆಲ್ವಿನಾಕ್ ಮ್ಹಳೆಂ ಹಾಚೆ ವಿಶ್ಯಾಂತ್ ಹಾಂವ್ ಏಕ್ ಕವಿತಾ ಬರಯ್ತಾಂ, ‘ಪ್ರಕೃತಿಚೊ ನಾಸ್’.  ಕವಿ ಮೆಲ್ವಿನ್ ಹಾಸ್ಲೊ ಆನಿ ಮ್ಹಣಾಲೊ, ‘ಬರಯ್ ಎಚ್ಚೆಮ್, ಪುಣ್ ಪುರಸ್ಕಾರ್ ಮೆಳತ್ ಮ್ಹಣ್ ಖಾತ್ರಿ ನಾ’ 

ಹೆಂ ಸತ್ ಆಸೊಂಕೀ ಪುರೊ, ಕಲ್ಪನಿಂ ಆನಿ ರೆಂವೆ ಮಾಫಿಯಾಚೊ ಹಾತ್ ಕಿತ್ತೂನ್ ಪರ್‌ಯಾಂತ್ ಆಸಾ? ಸಾಂಗೊಂಕ್ ಕಶ್ಟ್.

 

 

 

-ಎಚ್ಚೆಮ್.

 



Title : ಫಾತೊರ್ ಕಾತರ್ನ್, ರೇಂವ್ ಪೊಕೊರ್ನ್ ನಾಸ್ ಜಾವ್ನ್ ವೆಚಿಂ ಮಲೆಕೊಡಿ ಆನಿ ಪೊಯ್ತಾಜೆ

Please fill in the form below with your feedback/ suggestions .

Fields marked with * are necessary



Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. kavitaa.com/konkanipoetry.com will not be responsible for any defamatory message posted under this article.

Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kavitaa.com / konkanipoetry.com to provide the IP address and other details of senders of such comments, to the authority concerned upon request.

Hence, sending offensive comments using kavitaa.com / konkanipoetry.com will be purely at your own risk, and in no way will kavitaa.com / konkanipoetry.com be held responsible.