`ಮ್ಹಜಿಂಚ್ ಸೊದ್ನಾಂ'ತ್ಲಿಂ ಮ್ಹಜಿಂ ಚಿಂತ್ನಾಂ
ಕವಿತಾ ಡೊಟ್ ಕೊಮ್ ಜಾಳಿಂತ್ ಕವಿ ಮೆಲ್ವಿನ್ ಲುದ್ರಿಗಾಚಿ `ಮ್ಹಜಿಂಚ್ ಸೊದ್ನಾಂ' ಕವಿತಾ ಚಾಕ್ತಾಂ ಚಾಕ್ತಾಂ ಏಕ್ ಘಡಿತ್ ವಾಚುಂಕ್ ಮೆಳ್ಳೆಂ. ಕೊಡಿಯಾಳ್ ಆಸ್ಪತ್ರೆಂತ್ ಉಸ್ವಾಸ್ ರಾವಲ್ಲ್ಯಾ ಪನ್ನಾಸ್ ವರ್ಸಾಂಚ್ಯಾ `ನಾರಾಯಣಾನ್' ಹಾಚೆಂ ಮೊಡೆಂ, ತಾಚ್ಯಾ ಗಾಂವಾ ಕೇರಳಾಚ್ಯಾ ಕಾಞಂಗಾಡ್ ಸಾರಿಯೆರ್ ಚಡೊಂವ್ಕ್ ಸಾಗ್ಶಿತಾನಾ, ಮೊಡೆಂ ಜಾಲ್ಲೊ `ತೊ' ಅಚಾನಕ್ ಜೀವ್ ಜಾವ್ನ್ ಉದಕ್ ಮಾಗೊಂಕ್ ಲಾಗ್ಲೊ. ಕುಡಿ ಸಂಗಿಂ ಎಂಬುಲೆನ್ಸಾರ್ ಪಯ್ಣ್ ಕರ್‍ತಲ್ಯಾಂಕ್ ಮೊಡೆಂ ಉಲಯ್ತಾನಾ, ಭಿರಾಂತೆನ್ ತಾಂಚಿ ಝಿಂಟ್ ಉಡ್ಲಿ.
ಜರ್ ಕವಿತೆಕ್ ಆನಿ ಹ್ಯಾ ಘಡಿತಾಕ್ ಕಿತೆಂ ಸಂಬಂಧ್ ಮ್ಹಣ್ ಸವಾಲ್ ಉದೆತ್ ತರ್ ಜಾಪ್ ಅಶಿ. ಮನೀಸ್ ಜೀವ್ ಆಸ್ತಾನಾ ತಾಚೊ ಕೊಣೀ ಮೋಗ್ ಕರಿತ್. ಪುಣ್ ಮೆಲ್ಲ್ಯಾ ಮೊಡ್ಯಾ ಸಂಗಿಂ ಎಕ್ಸುರೆ..! ಏಕ್ ಘಡಿ ಸಾರುಂಕ್ ಭಿರಾಂತ್, ಆನಿ ಅಸಲ್ಯಾ ಸಂಸಾರಾಂತ್ ಜಿಯೆಂವ್ಚೊ ಮನೀಸ್ ಸಂಸಾರಿ ರಾಟಾವಳಿಂತ್ ವ್ಯಸ್ತ್ ಆಸ್ತಾನಾ, ಆಪ್ಲ್ಯಾ ಪೆಲ್ಯಾಲಾಗಿಂ ಸೊಡ್ಯಾ... ಖುದ್ದ್ ಆಪ್ಲ್ಯಾ ಆತ್ಮ್ಯಾ ಲಾಗಿಂ ಉಲೊಂವ್ಕ್ ತಾಕಾ ವೇಳ್ ಮೆಳನಾ... ಮ್ಹಣ್ ನೀಬ್ ದೀವ್ನ್ ಚುಕಾರಿ ಮಾರ್‍ತಾ.
ಕವಿತೆಚೊ ಗಿರೊಪ್ ಶಿಂದ್ತಾನಾ...ಹಾಂವ್ ಕೊಣ್? ಮ್ಹಜ್ಯಾ ವಿಸ್ವ್ಯಾಂಚಿ ಗಜಾಲ್ ಕಿತೆಂ? ಮ್ಹಳ್ಳೆಂ ಸವಾಲ್ ಉದೆಲೆಂ. `ವಾಡಲ್ಲ್ಯಾ ವ್ಹಡಾರುಕಾಚಿ ಪಾಳಾಂ ಖಂಯ್ ಲಿಪ್ಲ್ಯಾಂತ್ ಮ್ಹಣ್ ಕಶೆಂ ಸೊಧುಂ?' ತಶೆಂ ಕುಡಿಚ್ಯಾ ವಿಶ್ವ್ಯಾಂಚಿ ಖಬಾರ್ ಕಶಿ ಕಾಡುಂ?
ತರ್ನೊ ಭುರ್ಗೊ ಆಸ್ತಾಂ ದೊಳೆ ಸ್ಪರ್ಶ್ ಕರ್ನ್ ಸೊಧ್ನಾಂ ಕರ್‍ಚೊ ಖೆಳ್ ಖೆಳ್ಚೆಂ, ಮಾತ್ಯಾಚ್ಯೊ ಉವೊ ಮಾರ್‍ಚೆಂ, ಹಾಲ್ಚೊ ದಾಂತ್ ವೋಡ್ನ್ ಪಾಕ್ಯಾರ್ ಉಡೊವ್ನ್, ನವೊ ದಾಂತ್ ಯೆಂವ್ಚೆ ಪರ್ಯಾಂತ್ ನಿಜ್ಜ್ಯಾಚೊ ಸ್ಪರ್ಶ್ ಕರ್‍ಚೆಂ, ಮಿಶಿ ಲೋಂವ್ ಉದೆತಾನಾ ಉಬ್ಜೊಂಚೊ ಅಭಿಮಾನ್, ಕುಂಕ್ಡಾಚ್ಯಾ ಪಾಕಾಂನಿ ಕಾನಾಚೊ ಕಾನ್ಪೊ ಕಾಡ್ಚೆಂ, ಹರ್ ನವೆಸಾಂವಾಂತ್ ಆನಂದ್ ಪಾವೊನ್ ವಿಸ್ವ್ಯಾಂಲಾಗಿಂ ಖೆಳ್ಚೆಂ ಸದಾಂಚೆಂ.
ಪ್ರಾಯ್ ವಾಡ್ತಾನಾ ಹೆಂ ಸರ್ವ್ ಕಶೆಂ ನಪಯಿಂಚ್ ಜಾಲೆಂ? ಜಶೆಂ ಹರ್ ಮ್ಹಯ್ನ್ಯಾಂತ್ ಪುನವ್ ಆಸ್ತಾನಾ ಚಂದ್ರ್ ದೆಖ್ಚಿ ಉರ್ಬಾ, ಆತಾಂ ಕೊಂಕ್ರಿಟಾಚ್ಯಾ ರಾನಾಂತ್ ಪುನವ್ ಯಾ ಆಮಾಸೆಚೆಂ ಗ್ಯಾನ್ ಆಸನಾ. ಕೆಲೆಂಡರಾರ್ ಸೊಧ್ನಾಂ ಕರಿಜೆ ಪಡ್ತಾ.
ಕವಿತೆಂತ್ ಕವಿನ್ ಕುಡಿಚ್ಯಾ ಶಿರಾಂ ಶಿರಾಂ ವ್ಹಾಳ್ಚಿ ರಗ್ತಾ ಸಕತ್ ಸೊಧುನ್ ಕಾಡ್ಲ್ಯಾ ಆನಿ ಮನೀಸ್ ಕಿತೆಂ ತೆಂ ಸವಾಲ್ ಕೆಲಾಂ. ಮನ್ಶಾಕ್ ಮೆಳ್ಚಿ ಏಕ್ ಜೀಣ್, ತ್ಯೆ ಜಿಣಿಯೆಂತ್ ಅಂತ್ಯ್ ನಾತಲ್ಲೆ ಬರಿಂ ಧಾಂವ್ಚೆ ಧಾಂವ್ಣೆಕ್ ಆಮ್ಕಾಂಚ್ ಆಮಿ ವಿಸರ್ಚೆಂ ವಿಪರ್ಯಾಸ್ ಜಾವ್ನಾಸಾ.
ಯೋಗಾ ಕರ್‍ತಾನಾ `ಶವಾಸನಾ' ಏಕ್ ಉಂಚ್ಲೆಂ ಮತಿಚೆಂ, ಕುಡಿಚ್ಯಾ ಸಮಾಧಾನಾಕ್, ಸಂತೊಸಾಕ್ ಆಪ್ಣಾಂವ್ಚೆಂ ಕಸ್ರತ್. ಹಾಂತುಂ ಕುಡಿಚ್ಯಾ ಹರ್ ವಿಸ್ವ್ಯಾಚ್ಯಾ ಸಂದಾ ಸಂದಾ ಪಾವೊನ್, ಮತಿಂತ್ ಪೊಟೊಕೊಪಿ ಕಾಡ್ತಾನಾ ನಿಮಾಣೆ ಅತ್ವ್ಯಾಚ್ ಸಂಸಾರಾಕ್ ಪಾವೊನ್ ನೀದ್ ಯೆಂವ್ಚೊ ಅನುಭವ್ ತುಮ್ಕಾಂ ಜಾಲಾ ಆಸ್ತಲೊ.
ಕವಿನ್ ವಾಪರಲ್ಲಿ ರೂಪಕಾಂ- ನಾಕ್ಶೆಚೆರ್ ಆಮಾಶೆಕ್ ಲಾಗಿಂ ಜಾಲ್ಲೆ ಚಂದ್ರ್, ದೊಳ್ಯಾಂತ್ ದೆಕಲ್ಲೆಂ ಕಂಪ್ಯೂಟರ್, ಕವಿಕ್ ತಕ್ಲ್ರ್ ದಿಸ್ಚೆಂ ಘಾಟ್, ಬಯ್ಲ್, ಝರ್ ಆನಿ ಹರ್ಧ್ಯಾಂತ್ಲಿ ಮೇರ್ ಆನಿ ನಾಕಾ ಜಾಲ್ಲಿ ಪೊಟ್ಟು ಬಾಂಯ್... ಏಕ್ ಅತ್ವೊಚ್ ಸಂಸಾರ್ ಮತಿ ಪಡ್ದ್ಯಾರ್ ಪಾಶಾರ್ ಜಾವ್ನ್ ಗೆಲೊ.
ನಿಮಾಣೆ ಕವಿ ಮೆಲ್ವಿನಾಚಿ ಹಿ ಊಂಚ್ ಕವಿತಾ ಮ್ಹಣ್ ಸಾಂಗೊಂಕ್ ಜಾಯ್ನಾ. ಹೆ ಕವಿತೆ ವರ್ವಿಂ ಮ್ಹಜೆ ಮತಿಂತ್ ಚಿಂತ್ಪಾಚೆ ಪಾಕಟೆ ಫುಲ್ಲ್ಯಾತ್. ಕವಿತಾ ಅನುಭವಾಚ್ಯಾ ಶಿಖರಾಕ್ ವ್ಹರ್ನ್ ಪಾವಂವ್ಚ್ಯಾಂತ್ ಯಶಸ್ವಿ ಜಾಲ್ಯಾ.
-ವಿನ್ಸಿ ಪಿಂಟೊ, ಆಂಜೆಲೊರ್