(ಮೊತಿಯಾಂ ಪರತ್ ಉಸ್ತುಂಕ್ ಲಾಗ್ತಾನಾ... ಹೂಂ... ಕಾಂಯ್ ತೀನ್ ವರ್ಸಾಂ ಉಬೊನ್ ಗೆಲಿಂ ಹ್ಯಾ ಅಂಕಣಾಕ್ ಪಡ್ದೊ ವೊಡುನ್! ಜಿಣಿ ಪರತ್ ಕುಡ್ಕ್ಯಾನ್ ಕುಡ್ಕೊ ಬಾಂದುನ್ ಹಾಡುಂಕ್ ಕಾಂಯ್ ತಿತ್ಲಿಂಚ್ ವರ್ಸಾಂ ಲಾಗ್ಲಿಂ ಕೊಣ್ಣಾ!! ದೆಕುನ್ ಮೊತಿಯಾಂ ಸೊದುಂಕ್ ಪರತ್ ತ್ರಾಣ್ ಆಯ್ಲಾಂಶೆಂ ಭೊಗ್ತಾ. ಘಟಾಯೆಚೆಂ ಟೊನಿಕ್ ದೀವ್ನಚ್ ಆಸ್‌ಲ್ಲ್ಯಾ ಮೆಲ್ವಿನ್ ರೊಡ್ರಿಗಸಾಕ್ ಅಭಾರಿ - ಮ್ಯಾಕ್ಸಿಮ್ ಲೋಬೊ)
ಕಾಲ್ಚೆಂ ಜಿವಿತ್ ಪೊಶೆವ್ನ್, ಆಯ್ಚೆಂ ಜಿವಿತ್ ಹೊಗ್ಡಾಂವ್ಚೆ ಮನಿಸ್
‘ಕಾಲ್ಚೆಂ ಜಿವಿತ್’ ಕವಿ ಜೆಸ್ ಫೆರ್ನಾಂಡಿಸ್ ಹಾಂಚಿ ಕಾಳ್ಜಾಕ್ ಲಾಯೆಕ್ ಲಾಗ್‌ಲ್ಲಿ ಕವಿತಾ ಹಿ. ಕಾಲ್ಚೆಂ ಜಿವಿತ್ ಹೊಗ್ಡಾವ್ನ್ ಘೆತಾಂ ಮ್ಹಣ್ ಎಕಾನೇಕ್ ಭಿಯೆವ್ನ್ ಜಿಯೆಂವ್ಚಾ ಮನ್ಶಾಕ್ ಜಾಗಂವ್ಚಿ ಕವಿತಾ ಹಿ. ಮನ್ಶಾಚ್ಯಾ ಜಾಯ್ತ್ಯಾ ಮೂಳ್ ಸಮಸ್ಯಾಂ ಪಯ್ಕಿಂ ಭ್ಯೆಂ ಮಾತ್ರ್ ಭಾರೀ ಕಠಿಣ್. ತಾಂತ್ಲ್ಯಾನ್ ತಾಂತುಂ, ಜಿಯೆಂವ್ಚೆಂಚ್ ಭ್ಯೆಂ ಕೊಣಾಕ್ ಗ್ರಾಶಿಲೆಂ ತರ್! ಹ್ಯಾ ಸಮಸ್ಯಾಂತ್ಲ್ಯಾನ್ ಪಾಶಾರ್ ಜಾಯ್ನಾತ್‌ಲ್ಲೆ ಕೊಣಚ್ ಆಸ್ಚೆನಾಂತ್ ಆನಿ ಹ್ಯಾ ಸಮಸ್ಯಾಂತ್ಲ್ಯಾನ್ ಝೆಂಜ್ರೊನ್‌ವಚನಾತ್‌ಲ್ಲೆ ಕಾಂಯ್ ಥೊಡೆಚ್ ಆಸ್ತಿತ್.
ಎಕೆ ವಾಟೆನ್ ಹೆ ಕವಿತೆಚೊ ಮನೀಸ್ ಮೋಗ್ ಕರ್‍ಚೊ ಮನೀಸ್. ತೊ ಕಾಲ್ಚ್ಯಾ ಜಿವಿತಾಚೊ ಮೋಗ್ ಕರ್‍ಚೊ ಮನಿಸ್. ಕಾಲ್ಚೆಂ ಜಿವಿತ್ ತಾಕಾ ಭಾರಿಚ್ ಆವಡ್ಟಾ. ಕಾಲ್ಚೆಂ ಜಿವಿತ್ ಮ್ಹಳ್ಯಾರ್ ತಾಕಾ ಕಿತೆಂ ನೊಸ್ಟಾಲ್ಜಿಯಾ! ಪುಣ್ ಖೋಲ್ ಚೊಯ್ತಾನಾ ಹೊ ಆಯ್ಚೆಂ ಜಿವಿತ್ ಜಿಯೆಂವ್ಕ್ ಪಾಟಿಂ ಸರ್‍ಚೊ ಪಳ್ಕುರೊ ಜಸೊ ದಿಸ್ತಾ. ತಾಕಾ ವಿಪ್ರೀತ್ ಭ್ಯೆಂ. ಕಾಲ್ಚೆಂ ಸುಖ್ ಹಾತಾ ಭಾಯ್ರ್ ವಚತ್ ಮ್ಹಣ್ ಭ್ಯೆಂ, ದೆಕುನ್ ತೊ ಘುಂವೊನ್ ಕಾಲ್ಚೆಂ ಜಿವಿತ್ ಪರತ್ ದೆಕ್ತಾ, ತೆಂ ಪೊಶೆತಾ, ತೆಂ ವೆಂಗ್ತಾ ಆನಿ ತೆಂಚ್ ಜಿಯೆತಾ. ತರ್ ಆಯ್ಚೆಂ ಜಿವಿತ್ ತಾಣೆಂ ಜಿಯೆಂವ್ಚೆಂ ತರೀ ಕೆದ್ನಾಂ? ಆನಿ ಆಯ್ಚಿಂ ಸುಖಾಂ ತಾಣೆಂ ಭೊಗ್ಚಿಂ ತರೀ ಕೆದ್ನಾಂ?
ಭ್ಯೆಂ ನಾಸ್‌ಲ್ಲೊ ಮನೀಸ್ ಕೊಣಚ್ ನಾ ಕೊಣ್ಣಾ. ಭ್ಯೆಂ ಏಕ್ ಸ್ವಾಬಾವಿಕ್ ಉಮಾಳೊ. ಭಿಯಾ ವರ್ವಿಂ ಜಾಗ್ರುತ್ಕಾಯ್ ಆನಿ ಶಾಣೆಪಣ್ ಕಿರ್‍ಲೊಂಚಿ ಸಂಭವತಾ ಆಸಾ. ಪುಣ್ ಮೀತ್ ಚುಕ್‌ಲ್ಲೆಂ ಭ್ಯೆಂ, ಜೆಂ ಫೊಬಿಯಾ ಜಾವ್ನ್ ಪರಿವರ್ತಿತ್ ಜಾಯ್ತ್, ತೆಂ ಜಿಣ್ಯೆಚಿಚ್ ಖಿಳ್ ಚುಕಯ್ತ್! ಕವಿರಾಯ್ ವಿಲಿಯಮ್ ಶೇಕ್ಸಪಿಯರ್ ಫರ್ಮಾಣ್ ದಿತಾ: ಭಿವ್ಕುರೆ, ತಾಂಚ್ಯಾ ಮರ್‍ಣಾಂ ಆದಿಂ ಮರ್‍ತಾತ್ ಸಬಾರ್ ಪಾವ್ಟಿಂ, ಧಯ್ರಾದಿಕ್ ಮರಣ್ ಚಾಕ್ತಾತ್ ಬಗರ್ ಏಕ್‌ಚ್ ಪಾವ್ಟಿಂ! ತರ್ ಭಿಯೆಂವ್ಚೊ ಮನೀಸ್ ಜಿಯೆನಾ, ತೊ ಮೊರ್‍ತಾ, ಪರ್‍ತುನ್, ಪರ್‍ತುನ್ ಮೊರ್‍ತಾ. ತೆಂ ಹೆ ಕವಿತೆಂತ್ಲೊ ಮನಿಸ್‌ಯ್ ಒಪ್ತಾ ಮ್ಹಣೊನ್: (ಹಾಂವ್) ಝರುನ್ ವಯ್ತಾಂ ಮರುನ್ ವಯ್ತಾಂ ಪುಣ್ ತಾಣೆಂ ದಿಂವ್ಚೆಂ ಕಾರಣ್ ಮಾತ್ಶೆಂ ವೆಗ್ಳೆಂ: ಫಾಲ್ಯಾಂಕ್ ಜಲ್ಮ್ ದಿವ್ಪಾಕ್. ಅಬ್ಳೆ ಆಯ್ಚಿ ಕಾಂಯಿಂಚ್ ಫಿಕಿರ್ ನಾಸ್‌ಲ್ಲೊ ಹೊ ಫಾಲ್ಯಾಂಕ್ ಜಲ್ಮ್ ದಿವ್ಪಾಕ್ ಆಜ್ ಝರುನ್ ವಯ್ತಾ, ಮರುನ್ ವಯ್ತಾ! ಆತಾಂ, ಕಾಲ್ಚೆ ಸಂಗಿಂ, ಫಾಲ್ಯಾಂಚಿ ವೆಗ್ಳಿ ಗಿರಾಂತ್ ಲಾಗ್ಲಿಮೂ ಹಾಕಾ! ಕಾಲ್ಚ್ಯಾ ಜಿವಿತಾನ್ ಸಂಪೂರ್ಣ್ ಥರಾನ್ ರೆವ್ಡೊನ್ ಗೆಲ್ಲ್ಯಾ ಹಾಕಾ ಫಾಲ್ಯಾಂಚ್ಯಾ ಜಿವಿತಾಚೊ ಗೊಂಗೊ ವೆಗ್ಳೊ ಭೆಷ್ಟಾಯ್ತೆ ಆಸಾ.
ಹೆ ವ್ಯಕ್ತಿಚಿ ಸವಯ್‌ಚ್ ಹಿ. ಸದಾಂಚೆಂ ಸುಪ್ರಭಾತಾ ತಾಚೆಂ. ಪ್ರತ್ಯೇಕ್ ಫಾಂತ್ಯಾಪಾರಾರ್, ಆನೀಕ್ ಏಕ್ ಪಾವ್ಟ್ ತೊ ಕಾಲ್ಚೆಂ ಜಿವಿತ್ ಜಿಯೆತಾ. ಉಪ್ರಾಂತ್, ಪ್ರತ್ಯೇಕ್ ದೊನ್ಪಾರಾಂ ತೊ ಸಕಾಳ್ಚ್ಯಾ ಸೂರ್ಯ್ ಕಿರ್ಣಾಂಚಿ ಯಾದ್ ಕರ್‍ತಾ. ಆನಿ ನಿಮಾಣೆ, ತ್ಯಾಚ್ ಸಾಂಜೆ ವೆಳಾರ್ ಆನೀಕ್ ಏಕ್ ಪಾವ್ಟ್ ಉರಿಲ್ಲೆಂ ಜಿವಿತ್ ಸೊದುಂಕ್ ತೊ ಭೊಂವ್ತಾ. ತಿತ್ಲೆಂಯ್ ಕಿತೆಂ ಮೊಲಾಧಿಕ್ ಕಾಲ್ಚ್ಯಾ ಜಿವಿತಾಂತ್ ಪೂರ್‍ನ್ ದವರ್‍ಲಾಂ ಮ್ಹಣ್? ಹೆಂ ಮೊಲಾಧಿಕ್ ನ್ಹಯ್, ಹೆಂ ಮಾರೆಕಾರ್. ಹೊ ವ್ಯಕ್ತಿ ಭಿಯಾನ್ ಜಿಯೆಂವ್ಚೊ ಮನೀಸ್, ಹೊ ವ್ಯಕ್ತಿ ಜಿಯೆಂವ್ಕ್ ಭಿಯೆಂವ್ಚೊ ಮನೀಸ್. ಖಂಯ್ಚ್ಯಾ ನಮುನ್ಯಾಚೆಂ ಭ್ಯೆಂ ಹಾಕಾ? ತಾಚೆಂ ಅಮೊಲಿಕ್ ಜಿವಿತ್ ಸೊಂಪತ್ ಮ್ಹಳ್ಳೆಂ ಭ್ಯೆಂ ತಾಕಾ ವ ದೀಸ್ ಸೊಂಪ್ಚೆ ಆದಿಂ ತಾಂಚ್ಯಾಂತ್ಲ್ಯಾ ಸುರ್ಯಾಚೊ ಅಸ್ತ್ ಜಾಯ್ತ್ ಮ್ಹಳ್ಳೆಂ ಭ್ಯೆಂ ತಾಕಾ. ಆನಿ ಆಪ್ಣೆಂ ಜಿಯೆಲ್ಲೊ ತೊ ದೀಸ್ ಕಾಂಯ್ ರಾಗಾರ್ ಜಾಯ್ತ್ ಮ್ಹಳ್ಳೆಂ ಭ್ಯೆಂ ತಾಕಾ! ಭ್ಯೆಂ, ಭ್ಯೆಂ, ಭ್ಯೆಂ. ಭಿಯಾನ್ ಬುಡೊನ್ ಗೆಲ್ಲೆಂ ಜಿವಿತ್ ಹೆಂ.
ಎಕಾ ಅನಾಮಿಕ್ ಜಾಣ್ತ್ಯಾನ್ ಸಾಂಗ್‌ಲ್ಲೆಬರಿ: ಭೂತ್‌ಕಾಳ್ ಭೆಟ್ ದಿವ್ಪಾಕ್ ಏಕ್ ಬರೊ ಜಾಗೊ, ಪುಣ್ ಹಾಂವ್ ಥಂಯ್ ಬಿಲ್ಕುಲ್ ಜಿಯೆಂವ್ಚೊ ನಾ. ಕಾಲ್ಚೆಂ ಜಿವಿತ್ ಚರಿತ್ರಾ ಜಾವ್ನ್ ಜಿಣ್ಯೆಕ್ ಲಿಸಾಂವ್ ಜಾಯ್ತ್ ವ ಉಗ್ಡಾಸ್ ಜಾವ್ನ್ ಆಯ್ಚೆ ವಾಟೆಕ್ ದಿವ್ಟಿ ದೀತ್ ಪುಣ್ ಕಾಲ್ಚ್ಯಾ ಜಿವಿತಾನ್ ಆಯ್ಚೆಂ ಜಿವಿತ್ ಲುಟುಂಕ್ ಸೊಡ್ಚೆಂ ವ ಕಾಲ್ಚೆಂ ಜಿವಿತ್ ಆರಾವ್ನ್ ಆಯ್ಚೆಂ ಜಿವಿತ್ ಜಿಯೆಂವ್ಕ್ ತ್ರಾಣ್ ನಾಸ್ತಾಂ ಉರ್‍ಚೆಂ ಖಂಡಿತ್ ಮಾರೆಕಾರ್.
ಕೊಣೆಂಗೀ ಸಾಂಗ್‌ಲ್ಲೆಂ ಆಯ್ಕಾಲೆಂ: ಆಮ್ಕಾಂ ಕಾಲ್ಚಿಯ್ ಖಂತ್ ನಾ, ಫಾಲ್ಯಾಂಚೀಯ್ ಖಂತ್ ನಾ. ಆಮಿ ಜಿಯೆಂವ್ಚೆಂ ಆಜಿಕ್ ಮಾತ್ರ್! ಕಿತ್ಯಾಕ್ ನಜೊ. ಆಮಿ ಆಜ್ ಮಸ್ತ್, ದರಬಸ್ತ್ ಜಿಯೆಜಾಯ್. ತಾಣೆಂ ಕಾಂಯ್ ಎಪಿಕುರಿಯನ್ ಸಿಧ್ದಾಂತ್ ಮ್ಹಣ್ ನಾಂವಾಡ್‌ಲ್ಲೆಂ: ಖಾ, ಪಿಯೆ, ಗಮ್ಮತ್ ಮಾರ್ ಉಲ್ಲೇಕ್ ಕರ್ನ್ ಸಾಂಗ್ಲೆಂ ಜಾಯ್ಜಾಯ್. ಹ್ಯಾ ಸಿದ್ಧಾಂತಾಂತ್ ಜಿಯೆಂವ್ಚೆಂ ಖಂಯ್ ಉರ್‍ಲೆಂ? ಹೆಂ ಜಿವಿತ್ ವಿಭಾಡ್ಚೆಂ ನ್ಹಯೆ ತರ್? ಆಮಿ ಮಾತ್ರ್ ಆಜ್ ಪುರ್‍ತೆಂ ಜಿಯೆಜಾಯ್. ಆಯ್ಚೆಂ ಫಾಂತೆಂ ಪೊಟ್ಲುನ್ ಧರಿಜಾಯ್, ಆಯ್ಚ್ಯಾ ಸುರ್ಯಾಚ್ಯಾ ಕಿರ್‍ಣಾಂನಿ ಕಾಳಿಜ್ ಫಾಂಕಿಜಾಯ್, ಆಯ್ಚ್ಯಾ ದೊನ್ಪಾರಾಂಚೆ ಧಗ್‌ಧಗಿನ್ ಸೃಷ್ಟಿ ಪೊಶಿಜಾಯ್ ಆನಿ ಸಾಂಜೆಚ್ಯಾ ಸುರ್‍ಯಾಸ್ತಾಂತ್ ಕುಟಮ್ ನೆಟಯ್ಜಾಯ್. ತೆದ್ನಾಂ ಆಮಿ ಆಜ್ ಜಿಯೆತೆಲ್ಯಾಂವ್.
-ಮ್ಯಾಕ್ಸಿಮ್ ಲೋಬೊ
ಮೊತಿಯಾಂಚಿಂ ಮೊಲಾಂ:
ಬಾರಾ: ಸಾಂಪಾಕ್ ಹುತೊ, ಅನಾಥ್ ರಿತೊ - ಕಸಲಿ ವಿಟಂಬಣಾ?
ಇಕ್ರಾ: ಜೆಮೆನಾಸ್ತಾಂ ಜಾಗಿಂ ಉರ್‍ಚಿಂ ಉತ್ರಾಂ (ಶರತ್‍ಚಂದ್ರ ಶೆಣೈ)
ಧಾ: ಸುವರ್ಣ ಗಾಡ್ ಹಿಚೆ ಕವಿತೆಂತ್ಲಿಂ ಮೊತಿಯಾಂ
ನೋವ್: ವಾರ್‍ಯಾಚೆಂ ಆವ್ಕ್ ಸಂಪ್ತಾನಾ, ಕವಿಚೊ ಸ್ವಾಸ್ ತುಟ್ತಾ (ವಿಲ್ಸನ್ ಕಟೀಲ್)
ಆಟ್: ಎಡ್ಡಿ ಸಿಕೇರಿಚ್ಯಾ ‘ಮ್ಹಾಕಾ ಸೊಧ್ತಾಂ ಹಾಂವ್’ ಕವಿತೆಂತ್ಲಿಂ ಮೊತಿಯಾಂ
ಸಾತ್: ‘ಹಾತಾಕ್ ಮ್ಹೆಳೆಂ ತರ್ ತೊಂಡಾಕ್ ಕೆಳೆಂ’ ಪಾಚಾರ್‍ಚಿ ಅರುಣಾ ರಾವಾಚಿ ಕವಿತಾ
ಸ: ಮಿಸ್ತಿಕಾತೆಚ್ಯಾ ಅನ್ಭೋಗಾಂತ್ ನ್ಹಾಣಂವ್ಚೊ ‘ಪ್ರಕೃತಿಚೊ ಪಾಸ್’ (ಮೆಲ್ವಿನ್ ರೊಡ್ರಿಗಸ್)
ಪಾಂಚ್: ಜಿಣ್ಯೆನ್ ಮ್ಹಾಕಾ ಸಗ್ಳೆಂ ದಿಲೆಂ (ರ. ವಿ. ಪಂಡಿತ್)
ಚ್ಯಾರ್: ಗ್ವಾದಲೂಪಾಚಿ ಕವಿತಾ - ದೇವ್ ಖಂಯ್ ಆಸಾ?
ತೀನ್: ಒತ್ತಾಯ್ ಕೋರ್‍ನಾಕ್ಕಾ ಮಾಕ್ಕಾ - ಸುಧೀರ್ ಕೊಡಕಣೀ
ದೋನ್: ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ (ಪ್ರಕಾಶ್ ಪಡ್ಗಾಂವ್ಕಾರ್)
ಏಕ್: ಜಾಯೊ ಜುಯೊ (ಮನೋಹರ್ ಸರ್ದೇಸಾಯಿ)
ಮ್ಯಾಕ್ಸಿಮ್ ಲೋಬೊಚಿಂ ಲೇಖನಾಂ:
ಕೊಂಕ್ಣಿ ಕಾವ್ಯಾಚ್ಯಾ ಪಕ್ವನಾ ಸಂಗಿಂ ಅಮೃತ್ ಚಾಕ್ತಾನಾ!
ಘಟ್ ಧರಾ.. ! - ಮ್ಯಾಕ್ಸಿಮ್ ಲೋಬೊ ಸ್ಪೇಯ್ನಾ ಥಾವ್ನ್ ಬರಯ್ತಾ
ವಾಸ್ತವಿಕತೆಚ್ಯಾ ವಿಪರ್‍ಯಾಸಾನ್ ಆನಿ ವಿರೋಧಾಭಾಸಾಂತ್ ಜಿಣ್ಯೆ ಶೆವೊಟ್ ಪಾಚಾರ್‍ಚ್ಯೊ ಕವಿತಾ
ಮ್ಯಾಕ್ಸಿಮ್ ಲೋಬೊಚ್ಯೊ ಕವಿತಾ:
ಭರ್ವಶ್ಯಾ ಕಿಟಾಳ್
ಸೊಧ್ನಾಂ
ಡಣಾ ಡಣಾ
ದೊರೆ
ಹಾಂವ್ ಜಾತಾನಾ