ಥೊಡಿಂ ಭಾತಾಂ ಪುಡ್ಪುಡಿತ್
ಥೊಡಿಂ ಮಾತ್ರ್ ಪೊಕೊಳ್
ತರೀ
ಪಾಚ್ವ್ಯಾ ಮ್ಹಜ್ಯಾ ಗಾಂವಾರ್
ಪಡ್ಚೊನಾ ಕೆದಿಂಚ್ ದುಕೊಳ್

ಕವಿ ಪುಡೆಂ ಮ್ಹಣ್ತಾ:

ಕಣಸ್ ಕಾಗ್ದಾಂತ್ ಘಾಲ್ತಾನಾ
ಮಾಯ್ ರಡ್ಲ್ಯಾ ಕೊಣ್ಣಾ
ವ್ಹಯ್
ಕಾಗ್ದಾ ವಯ್ರ್ ಸುಕ್ಲ್ಯಾಂತ್ ದುಖಾಂ
ಪಾರ್ಕುಂಕ್ ಹಾಂವ್ ಜಾಣಾಂ

ಕವಿನ್ ಆವಯ್ಚೊ ಮೋಗ್ ಉತ್ರಾಂ ಪಿಂಜ್ರ್ಯಾಂತ್ ಫಿಚಾರ್ ಕರ್ನ್ ದವರುಂಕ್ ಕೆಲ್ಲೆಂ ಪ್ರೇತನ್ ಸುಫಳ್ ಜಾಲಾಂ ಮ್ಹಣ್ಯೆತ್. ಜರ್ ಪಿಂಜ್ರೊ ಉಗಡ್ಚೆಂ ಮನ್ ಕೆಲೆಂ ತರ್ ಥಂಯ್ಚೆ ಉಮಾಳೆ (ಕಳ್ವಳೆ?) ಜಾಣಾ ಜಾಂವ್ಕ್ ಚಡ್ ವೇಳ್ ಲಾಗ್ಚೊ ನಾ. "ಆವಯ್"  ಬದ್ಲಾಕ್ `ಜಿಂ ಮೊಗಾಚಿಂ' ಮ್ಹಣ್ ಮನಾಂತ್ ಧರ್ಲೆಂ ತರೀ ಬೊಗ್ಣಾಂಚೊ ಭೊಂಗೊಸ್ತಳ್ ಜಾಂವ್ಚೊನಾ.  ಆತಾಂ ಭಾತ್ ಕುಟ್ಮಾಚಿ ಪರಿಗತ್ ತರ್ ಸಾತ್ ದರ್ಯಾಂ ಪಯ್ಸ್ ಆಸೊನೀ ತಿ ಪಾರ್ಕುಂಚಿ ಶಾತಿ ನಾತ್ ಲ್ಲೊ ಕೊಣ್ ತರೀ ಮೆಳತ್ ಗಾಯ್...?

ಆಖ್ರೇಕ್ ಕವಿ ಮ್ಹಣ್ತಾ,

ಭಾತಾಂ ಎಕೇಕ್ ಭರ್ಸುನ್ ದುಧಾಂತ್
ಸೆಂವ್ಕ್ ಆಯ್ತೊ ಜಾಲಾಂ
ಆನಿ
ಯೆಂವ್ಚ್ಯಾ ವರ್ಸಾ ಗಾಂವ್ಚ್ಯಾ ಥಳಾರ್
ಜೆಂವ್ಚೊ ನಿಚೆವ್ ಘೆತಾಂ.

ನಿರಾಳ್ ಆನಿ ಸೊಂಪಿ ಸಂಪವ್ಣಿ.  ಕುಟ್ಮಾಥಾವ್ನ್ ಪಯ್ಸ್ ತರೀ ಕುಟ್ಮಾಚ್ಯಾ ಹರ್ಯೇಕ್ ಘಡಿತಾಂನಿ ಆಪುಣ್ ವಾಂಟೆಲಿ ದೆಕುನ್ ಭಾತಾಂ ಎಕೇಕ್ ದುಧಾಂತ್ ಭರ್ಸುನ್ ಸೆಂವ್ಕ್ ಆಯ್ತೊ ಜಾಲಾಂ (ಪೊಕೊಳ್ ಯಾ ಪುಡ್ಪುಡಿತ್), ಮ್ಹಣ್ ಕವಿನ್ ಉಚಾರ್ಚೆಂ ಉಗ್ತಿ ಪರ್ಗಟ್ಣಿ ತಶೆಂ ಭೊಗ್ತಾ. ಪುಣ್ ಉಪ್ರಾಂತ್ಲಿ ವೋಳ್ ಭರ್ವಶ್ಯಾಚಿಂ ಸುಚನಾಂ ದಿತಾ ಆನಿ ಆಶಾವಾದಿ ಜಾಂವ್ಚ್ಯಾಕ್ ಪ್ರೇರಣ್ ದಿತಾ. 

ಕವಿತಾ ಸಾಂಧರ್ಭಿಕ್ ಜಾಂವ್ಕ್ ಪುರೊ.  ಪುಣ್ "ನವೆಂ ಜೆಂವ್ಚೆಂ" ಹರ್ಯೇಕ್ ವರ್ಸಾ ಚಲ್ತಾ ದೆಕುನ್ ಕವಿನ್ ವಾಪರಲ್ಲೊ ವಿಶಯ್ ಪರತ್ ಪರತ್ ಉಬೊ ಜಾತಾ. ತಶೆಂಚ್ ಕವಿತಾಯೀ ಪರತ್ ಪರತ್ ಆಂವೊಡ್ತಾ.

- ಸ್ಟ್ಯಾನಿ ಬೆಳಾ