ಬಿಝಿ ಮನ್ಶಾಂಚೆಂ ಡಿಸ್‌ಕನೆಕ್ಟಡ್ ಜಿವಿತ್ - ರಾಜಯ್ ಪವಾರಾಚೆ ಕವಿತೆಚೆಂ ಆಸ್ವಾದನ್
ಲ್ಹಾನ್ ಆಸ್ತಾನಾ ವಡ್ಲಿಮಾಂಯ್ಚ್ಯಾ ಘರಾ ಎಕ್ಸುರಿಂ ವೊರಾಂ ಪಾಶಾರ್ ಕರ್‍ತಾನಾ ಹಾಂವ್ ಮ್ಹಜೆಚ್‌ ಸಂಗಿಂ ಖೂಬ್ ಝಾಂಕ್ತಾಲೊಂ. ಕಿತೆಂ ಝಾಂಕ್ತಾಲೊಂ? ನೊಕೊ! ಹೆ ವಿಶಿಂ ಕೊಣೆ ಮ್ಹಜಿ ಮಸ್ಕಿರಿ ಕರ್‍ತಾನಾ ಹಾಂವ್ ಮಾತ್ಶೆಂ ಲಜೆಲೊಂ ಮಾತ್ರ್! ಕ್ರಮೇಣ್ ಚಡ್ಶಿಂ ವರ್ಸಾಂ ಘರ್‍ಚ್ಯಾಂ ಥಾವ್ನ್ ಪಯ್ಸಚ್ ಖರ್ಚಿಲ್ಲ್ಯಾ ಮ್ಹಾಕಾ, ಹಾಂವ್‌ಚ್ ಮ್ಹಜೊ ಸಾಂಗೊಡಿ! ಅಶೆಂ ಹಾಂವ್ ಖೂಬ್ ಝಾಂಕುನ್‌ಚ್ ಉರ್‍ಲೊಂ, ಮೊನೊ ಮೊನೊ!
'ನೆಟ್‌ವರ್ಕ್ ಬಿಝಿ' ಕವಿತೆಚೊ ಗಿರಾಯ್ಕ್ ಮಾತ್ರ್ ಎಕ್ದಮ್ ಮೊಡರ್ನ್. ತೊ ದೀಸ್-ರಾತ್ ಝಾಂಕ್ತಾ ಪೊನಾಚೆರ್, ಝಾಂಕ್ತಾ ಸಗ್ಳ್ಯಾ ಸಂವ್ಸಾರಾ ಕಡೆನ್, ಝಾಂಕ್ತಾ ವೊರಾಂಚಿಂ ವೊರಾಂ... ವರ್ಸಾಂಚಿಂ ವರ್ಸಾಂ. ತಶೆಂ ಆಜ್‌ಕಾಲ್ ಆಮಿ ಖೂಬ್ ಬಿಝಿ ನ್ಹಯ್. ಹರ್ ವಗ್ತಾ ಆಮಿ ಕಿತೆಂ ನಾ ಕಿತೆಂ ಕರ್‍ನ್ ಬಿಝಿ, ಕೊಣ್ ನಾ ಕೊಣಾ ಸಂಗಿಂ ಕನೆಕ್ಟೆಡ್ ಆಸ್ತಾಂವ್. ಮೊಬಾಯ್ಲ್ ಪೊನಾವಿಣೆಂ ತರೀ ಆಮ್ಚಿ ಜಿಣಿ ಖಂಯ್? ಮಾಗಿರ್ ಆಮ್ಚ್ಯಾ ಪೊನಾರ್ ದೊನ್-ದೊನ್, ತೀನ್-ತೀನ್ ಸಿಮ್ಮಾಂ ಥಾವ್ನ್ ಕೊಲಾಂ, ಮೆಸೆಜ್, ಕೆದ್ನಾಂ ಚಾಟ್. ಮಾಗಿರ್ ಏಕ್ ಪೊನಾಚೆಂ ಕೊಲ್ ಕಟ್ಟ್ ಕರ್‍ನ್ ಆನ್ಯೇಕ್ ಎಟೆಂಡ್ ಕರಿಜೆ ಪಡ್ತಾ. ತೆಣೆ ಫೇಸ್‌‌ಬುಕ್ಕ್, ಟ್ವೀಟಾರಾರ್ ನವ್ಯಾ ನವ್ಯಾ ಫ್ರೆಂಡ್ಸಾಂಚೆ ಇನ್‌ವಾಯ್ಟ್. ತವಳ್, ತವಳ್ ಹುನ್, ಹುನ್ ಆಪ್ಡೆಟ್. ಅಶೆಂ ಫೊನ್ ಆನಿ ಮಾತ್ತಿಗೊಬೊರ್ ಮ್ಹಣ್ ಆಮಿ ಎಕ್ದಮ್ ಬಿಝಿ, ತಿತ್ಲೆಚ್ ಖುಶಿ. ಸದಾಂನಿತ್ ಇತ್ಲ್ಯಾ ಆನಿ ತಿತ್ಲ್ಯಾ ಕೊಲ್ ಆನಿ ಫ್ರೆಂಡ್ಸಾಂನಿ ಆಮ್ಚೆಂ ಜಿವಿತ್ ಮಾತ್ರ್ ಪುಲ್ಲ್, ಎಕ್ದಮ್ ಹೌಸ್‌ಪುಲ್ಲ್!
ತರ್ ಹೆಂ ಫುಲ್ಲ್ ಜಿವಿತ್ ನಿಜಾಕಿ ಫುಲ್ಲ್ ವ ಬಿತರ್ ಮಾತ್ಶೆಂ ಟೊಳ್ಳ್? ಝಾಂಕುನ್ ಝಾಂಕುನ್ ಜಿತ್ಲೆ ಆಮಿ ಕನೆಕ್ಟೆಡ್ ಜಾಂವ್ಕ್ ಸೊದ್ತಾಂವ್ ತಿತ್ಲೆಚ್ ಆಮಿ ಡಿಸ್‌ಕನೆಕ್ಟೆಡ್ ಉರ್‍ತಾಂವ್ ಕಶೆಂ? ಜಿತ್ಲೆ ಭಾಯ್ಲ್ಯಾಬಾರ್ ಆಮಿ ವ್ಯವಸ್ಥಿತ್ ಕನೆಕ್ಟೆಡ್, ತಿತ್ಲೆಚ್ ಭಿತರ್‍ಲ್ಯಾ ಭಿತರ್ ಆಮಿ ಸಂಪೂರ್ಣ್ ಡಿಸ್‌ಕನೆಕ್ಟೆಡ್. ಬಭಿತರ್ ಕನೆಕ್ಟೆಡ್ ತರ್ ಮಾತ್ರ್ ನ್ಹಯ್‌ಗೀ ಆಮಿ ಭಾಯ್ರಯ್ ಕನೆಕ್ಟೆಡ್ ಆಸ್ಚೆಂ? ದೆಕುನ್ ಜಿತ್ಲೆಂ ಝಾಂಕುನ್‌ಯ್ ಆಮ್ಚೆ ಸಂಬಂಧ್ ಭೆಷ್ಟೆ ಪೊಕೊಳ್!
ಪುಣ್ ಅಚ್ಕಿತ್, ಹೆ ಕವಿತೆಚೆ ವ್ಯಕ್ತಿಕ್ ಕಾಂಯ್ ವರ್ಸಾಂ ಉಪ್ರಾಂತ್ ತಾಚಿಚ್ ಯಾದ್ ಜಾತಾ. ಆನಿ ತೊ ಮ್ಹಣ್ತಾ: ಅರೆ! ಕಿತ್ಲಿಂಶೀಂಚ್ ವರ್ಸಾಂ ಜಾಲಿಂ. ಹಾಂವ್ ಮ್ಹಜೆ ಕಡೆನ್ ಉಲೊಂವ್ಕಚ್ ನಾ! ಕಿತೆಂ ಮ್ಹಳೆಂಯ್? ಕಾಂಯ್ ವರ್ಸಾಂನಿಂಚ್ ತುಕಾ ತುಜೆಕಡೆನ್ ದೋನ್ ಸಬ್ದ್ ಉಲಂವ್ಕ್ ಪಾವ್ಟ್ ಮೆಳೊಂಕ್ ನಾ! ತಿತ್ಲೆಂ ಅಸ್ತವೆಸ್ತ್ ಜಿವಿತ್ ತುಜೆಂ! ಕವಿತೆಚೆಂ ವಾಕ್ಮೂಲ್ ಮೆಲ್ವಿನ್ ರೊಡ್ರಿಗಸಾನ್ ಸಾಂಗ್ಚೆ ತಿತ್ಲೆಂ ಟ್ರೆಜಿಕ್: ಸಂಸಾರಾ ಕಡೆನ್ ಝಾಂಕ್ ಮಾರುಂಕ್ ವಚೊನ್ ಹ್ಯಾ ಮನ್ಶಾಕ್ ಆಪ್ಲ್ಯಾಚ್ ಅಸ್ತಿತ್ವಾಚಿ ವಿಸರ್ ಪಡ್ತಾ!
ಜಿತ್ಲ್ಯಾ ವೆಗಾನ್ ತಾಚೆಂ ಗಿನ್ಯಾನ್ ಪೆಟ್ತಾ, ತಿತ್ಲ್ಯಾಚ್ ವೆಗಾನ್ ತೊ ಸನಿನ್ ಜಾತಾ ಆನಿ ವಾವ್ರಾಕ್ ಲಾಗ್ತಾ. ತುರ್ತಾನ್ ತೊ ತಾಚ್ಯಾಚ್ ಮೊಬಾಯ್ಲಾ ವೆಲ್ಯಾನ್ ತಾಕಾಚ್ ಪೊನ್ ಲಾಯ್ತಾ. ಅಬ್ಳೆ! ಒಲ್ ದ ಟಾಯ್ಮ್... ಎಂಗೇಜ್ಡ್! ಕುಂ ಕುಂ ಕುಂ.. ನೆಟ್‌ವರ್ಕ್ ಬಿಝಿ! ಕವಿತೆಚೆಂ ಅಪೂರ್ವ್ ಚಿಂತಪ್!! ಆಪ್ಲೆ ಹೆಳ್ಕೆವಿಣೆ, ಆಪ್ಲೆ ಪರ್ವಣ್ಗೆವಿಣೆಂಚ್ ಆಪ್ಲೆಂ ನೆಟ್‌ವರ್ಕ್ ಬಿಝಿ?? ಹೆಚ್ ಗತಿಕ್ ಉಲ್ಲೇಕ್ ಕರುನ್ 'ಮೊಬಾಯ್ಲ್ ಮಯ್ಮಾಂ' ಕವಿತೆಂತ್ ಗುರು ಬಾಳಿಗಾ ಮ್ಹಣ್ತಾ ಕೊಣ್ನಾ: ... ಹಾಂವ್ ಮ್ಹಾಕಾ ಮೆಳ್ಳೊ ನಾ. ಕಾಂಯ್ ವರ್ಸಾಂಚೆ ಅಸ್ತವೆಸ್ತ್, ಅಶಿಸ್ತೆಚ್ಯಾ ಜಿವಿತಾನ್ ಆಪ್ಣಾಚೆಂ ರಿಮೋಟ್ ಕಂಟ್ರೊಲ್ ಆಪ್ಲ್ಯಾ ಹಾತಾಂತ್ಲೆಂ ನಿಸರ್‍ನ್ ಗೆಲಾಂ! ದೆಕುನ್ಂಚ್ 'ಘಟ್ ಧರಾ' ಕವಿತೆಂತ್ ಮೆಲ್ವಿನ್ ರೊಡ್ರಿಗಸ್ ಜಾಗಯ್ತಾ: ಘಟ್ ಧರಾ ಜಿವಿತ್ ತುಮ್ಚೆಂ, ಖಂಯ್ಚೇಯ್ ಘಡ್ಯೆ ತೆಂ ನಿಸ್ರತ್... ಸ್ಥಿಮಿತ್ ಚುಕ್‌ಲ್ಲೆ ಜಿಣ್ಯೆಚೆಂ ಏಕೇಕ್ ಸುತ್ ಪರತ್ ಹಾತಿಂ ಹಾಡಿಜಾಯ್ ತರ್ ಜಿವಾರ್ ಯೇತ್. ಪುಣ್ ಪ್ರೇತನ್ ಕರ್ಚೆಂ ಜಾಣ್ತ್ಯಾಂಚೆಂ ಸಾಹಸ್. ಸಂಕಲ್ಪಿ ಮನಾಕ್ ಅಸಾಧ್ಯ್ ಕಾಂಯ್ ಥೊಡೆಂಚ್ ಆಸತ್! ತಶೆಂ ಮ್ಹಣ್, ತರ್‍ನ್ಯಾ ಜನಾಂಗಾಕ್ ಮೀತ್ ಮಿರ್‍ವಾಲ್ಲಿ ಸಡಿಲಾಯ್ ದಿಂವ್ಚ್ಯಾ ವ್ಹಡಿಲಾಂನಿ ಆಪ್ಲ್ಯಾ ಜವಾಬ್ಬಾರೆವಿಶಿಂ ಆಟಂವ್ಚೆಂ ಹಾಂಗಾ ಜಾಯ್ತೆಂ ಆಸಾ!
ಹೆ ಕವಿತೆಚ್ಯಾ ಮನ್ಶಾಚಿ ಮಾತ್ರ್ ಲೊಸ್ಟ್ ಕೇಸ್. ತೊ ಚುರ್ಚುರ್‍ತಾ: ... ಪುಣ್ ಮ್ಹಜೊ ಫೊನ್ ಲಾಗ್ಚೆ ಆದಿಂಚ್ ಕೊಣಾಲೊ ನಾ ಕೊಣಾಲೊ ತರೀ ಕೊಲ್ ಯೆತಾಚ್ ಆನಿ ಹಾಂವ್ ಕನೆಕ್ಟೂಚ್ ಜಾಂವ್ಕ್ ಪಾವನಾ ಮ್ಹಜೆ ಕಡೆನ್. ಬಿರ್ಮತ್! ಕಸ್ಲಿ ಸ್ಥಿತಿ ಜಾಲಿ ಹ್ಯಾ ಆಖ್ಖ್ಯಾ ಸಂಸಾರಾಕಡೆನ್ ಝಾಂಕುನ್ ಆಸ್‌ಲ್ಲೆ ವ್ಯಕ್ತಿಚಿ! ತೊ ಪಿಸಾಂತುರ್ ಜಾತಾ ಮ್ಹಣೊನ್: ಸಗ್ಳೆ ನಂಬರ್ ಖಿಣಾಂತ್ ಕನೆಕ್ಟ್ ಜಾತಾತ್ ಆನಿ ಮ್ಹಜೋಚ್ ನಂಬರ್ ಕಿತ್ಯಾಕ್ ಬಿಝಿ ಕಾಂಯ್? ಟ್ರೇಜಿಡಿ ವಯ್ರ್ ಟ್ರೇಜಿಡಿ!
ಮಾಗಿರ್ ತೊ ನಿಚೆವ್ ಕರ್ತಾ: ಪುಣ್ ಜೆನ್ನಾ ಕನೆಕ್ಟ್ ಜಾತಲೊಂ ಹಾಂವ್ ಮ್ಹಜೆ ಲಾಗಿಂ, ತೆನ್ನಾ ಮನ್ ಭರೊನ್ನ್ ಉಲೊವ್ನ್ ಘೆತಲೊಂ. ಮ್ಹಜ್ಯೊ ಭಾವನಾ, ಮ್ಹಜಿಂ ಸಪ್ಣಾಂ ಶೇರ್ ಕರ್‌ತಲೊಂ ಮ್ಹಜ್ಯಾ ಕಾಳ್ಜಾ ಕಡೆನ್. ಕನೆಕ್ಟ್ ಜಾತಾ ಮ್ಜಣಾಸರ್ ಪ್ರೇತನ್ ಜ್ಯಾರಿ ದವರ್ಚೊ ಕವಿತೆಚೊ ಆಪುರ್ಬಾಯೆಚೊ ಠರಾವ್. ಆನಿ ಠರಾವಾಕ್ ಜೀವ್ ಭರುಂಕ್ ಗರ್ಜೆಚೆಂ ತಾಚೆಂ ಕಲ್ಪನ್: ಮನ್ ಭರ್‍ನ್ ಉಲಂವ್ಚಿ ತಾಚಿ ಜಬ್ಬೊರ್ ಆಶಾ; ಭಾವನಾಂ, ಸಪ್ಣಾಂ ಕಾಳ್ಜಾ ಕಡೆನ್ ಶೇರ್ ಕರ್ಚಿ ತಾಚಿ ಖತ್ಕತಿ ಆಕಾಂಕ್ಷಾ.
ಆತಾಂ ಕವಿತೆಚೆಂ ಕ್ಲೈಮೇಕ್ಸ್: .. ಮಾತ್ ತೆನ್ನಾ ಬ್ಯಾಲೆನ್ಸ್ ಉರ್‌ಲ್ಯಾರ್ ಪುರೊ ಮನ್‌ಭರ್ ಉಲೊಂವ್ಕ್.. ಡಿಸ್‌ಕನೆಕ್ಟ್ ಜಾಯ್ ಮೆರೆನ್! ಕವಿತೆಚೆ ಬಿವ್ಟಿಪುಲ್ ಟ್ವೀಸ್ಟ್! ವರ್ಸಾಂಚಾ ಅಸ್ತವೆಸ್ತ್, ಸೇಚ್ಛಾಚಾರಿ ಜಿವಿತಾನ್ ಜಿವಾರ್ ಪರಿಣಾಮ್ ಜಾಲ್ಲೊ ಆಸ್ತಾ. ತೊ ಆಡಾಂವ್ಕ್ ಅಸಾಧ್ಯ್. ಜಿಣ್ಯೆಚೆ ಸ್ಪೂರ್‍ತೆಚೆಂ ಬ್ಯಾಲೆನ್ಸ್ ಖಾಲಿ ಜಾಂವ್ಚೆಂ ಸಹಜ್. ದೆಕುನ್ ಡಿಸ್‌ಕನೆಕ್ಟ್ ಜಾಯ್ ಮೆರೆನ್ ಸಗ್ಳೆ ಅತ್ರೆಗ್ ಕೊಸ್ಳೊನ್ ಪಡ್ಚೆ ವಾಜ್ಬಿ.
ಪುಣ್ ಕವಿತೆಂತ್ ನಾ ತರೀ ಜಿವಿತಾಂತ್ ಸೆಕೆಂಡ್ ಚಾನ್ಸ್ ಆಸಾ. ಬ್ಯಾಲೇನ್ಸ್ ರೀಚಾರ್ಜ್ ಕೆಲ್ಯಾರ್ ಪುರೊ!
-ಮ್ಯಾಕ್ಸಿಮ್ ಲೋಬೊ
ಮೊತಿಯಾಂಚಿಂ ಮೊಲಾಂ:
ತೆರಾ: ಕಾಲ್ಚೆಂ ಪೊಶೆವ್ನ್ ಆಯ್ಚೆಂ ಜಿವಿತ್ ಹೊಗ್ಡಾಂವ್ಚೆ ಮನೀಸ್ (ಜೆಸ್ ಪೆರ್ನಾಂಡಿಸ್)
ಬಾರಾ: ಸಾಂಪಾಕ್ ಹುತೊ, ಅನಾಥ್ ರಿತೊ - ಕಸಲಿ ವಿಟಂಬಣಾ? (ಭಕ್ತ ಕಾಞಂಗಾಡ್)
ಇಕ್ರಾ: ಜೆಮೆನಾಸ್ತಾಂ ಜಾಗಿಂ ಉರ್‍ಚಿಂ ಉತ್ರಾಂ (ಶರತ್‍ಚಂದ್ರ ಶೆಣೈ)
ಧಾ: ಸುವರ್ಣ ಗಾಡ್ ಹಿಚೆ ಕವಿತೆಂತ್ಲಿಂ ಮೊತಿಯಾಂ
ನೋವ್: ವಾರ್‍ಯಾಚೆಂ ಆವ್ಕ್ ಸಂಪ್ತಾನಾ, ಕವಿಚೊ ಸ್ವಾಸ್ ತುಟ್ತಾ (ವಿಲ್ಸನ್ ಕಟೀಲ್)
ಆಟ್: ಎಡ್ಡಿ ಸಿಕೇರಿಚ್ಯಾ ‘ಮ್ಹಾಕಾ ಸೊಧ್ತಾಂ ಹಾಂವ್’ ಕವಿತೆಂತ್ಲಿಂ ಮೊತಿಯಾಂ
ಸಾತ್: ‘ಹಾತಾಕ್ ಮ್ಹೆಳೆಂ ತರ್ ತೊಂಡಾಕ್ ಕೆಳೆಂ’ ಪಾಚಾರ್‍ಚಿ ಅರುಣಾ ರಾವಾಚಿ ಕವಿತಾ
ಸ: ಮಿಸ್ತಿಕಾತೆಚ್ಯಾ ಅನ್ಭೋಗಾಂತ್ ನ್ಹಾಣಂವ್ಚೊ ‘ಪ್ರಕೃತಿಚೊ ಪಾಸ್’ (ಮೆಲ್ವಿನ್ ರೊಡ್ರಿಗಸ್)
ಪಾಂಚ್: ಜಿಣ್ಯೆನ್ ಮ್ಹಾಕಾ ಸಗ್ಳೆಂ ದಿಲೆಂ (ರ. ವಿ. ಪಂಡಿತ್)
ಚ್ಯಾರ್: ಗ್ವಾದಲೂಪಾಚಿ ಕವಿತಾ - ದೇವ್ ಖಂಯ್ ಆಸಾ?
ತೀನ್: ಒತ್ತಾಯ್ ಕೋರ್‍ನಾಕ್ಕಾ ಮಾಕ್ಕಾ - ಸುಧೀರ್ ಕೊಡಕಣೀ
ದೋನ್: ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ (ಪ್ರಕಾಶ್ ಪಡ್ಗಾಂವ್ಕಾರ್)
ಏಕ್: ಜಾಯೊ ಜುಯೊ (ಮನೋಹರ್ ಸರ್ದೇಸಾಯಿ)
ಮ್ಯಾಕ್ಸಿಮ್ ಲೋಬೊಚಿಂ ಲೇಖನಾಂ:
ಕೊಂಕ್ಣಿ ಕಾವ್ಯಾಚ್ಯಾ ಪಕ್ವನಾ ಸಂಗಿಂ ಅಮೃತ್ ಚಾಕ್ತಾನಾ!
ಘಟ್ ಧರಾ.. ! - ಮ್ಯಾಕ್ಸಿಮ್ ಲೋಬೊ ಸ್ಪೇಯ್ನಾ ಥಾವ್ನ್ ಬರಯ್ತಾ
ವಾಸ್ತವಿಕತೆಚ್ಯಾ ವಿಪರ್‍ಯಾಸಾನ್ ಆನಿ ವಿರೋಧಾಭಾಸಾಂತ್ ಜಿಣ್ಯೆ ಶೆವೊಟ್ ಪಾಚಾರ್‍ಚ್ಯೊ ಕವಿತಾ
ಮ್ಯಾಕ್ಸಿಮ್ ಲೋಬೊಚ್ಯೊ ಕವಿತಾ:
ಭರ್ವಶ್ಯಾ ಕಿಟಾಳ್
ಸೊಧ್ನಾಂ
ಡಣಾ ಡಣಾ
ದೊರೆ
ಹಾಂವ್ ಜಾತಾನಾ