ಮೊತಿಯಾಂಚಿಂ ಮೊಲಾಂ: ಎಲ್ಯೆರ್ ತಾಕೊಡೆಚ್ಯಾ `ಸ್ವಾಧಿಕ್ ಸಾಕ್ರಾಮೆಂತ್’ ಕವಿತೆಚೆಂ ಆಸ್ವಾದನ್
'ಸ್ವಾಧಿಕ್ ಸಾಕ್ರಾಮೆಂತ್' ಕವಿತೆಂತ್ ಏಕ್ ಕಥೊಲಿಕ್, ಧಾರ್‍ಮಿಕ್, ಪುಣ್ ಏಕ್ ನಾಜೂಕ್ ವಿಷಯ್ ವಿಂಚುನ್ ಕವಿ ಅಪ್ಲ್ಯಾ ಕಾವ್ಯಾಳ್ ಚಲಾಕೆನ್ ತಶೆಂ ಧಾರ್‍ಮಿಕ್ ಚಿಂತ್ಪಾಚೆ ಪ್ರಭುದ್ದತೆನ್ ದೇವ್‌ಶಾಸ್ತ್ರಾಚೆಂ ಕಾಂಯ್ ತುಫಾನಚ್ ಉಟಯ್ತಾ! ಹಿ ಕವಿತಾ ಜಿತ್ಲೆ ಪಾವ್ಟಿಂ ಹಾಂವ್ ವಾಚ್ತಾಂ, ತಿತ್ಲೆ ಪಾವ್ಟಿಂ ಹಾಂವೀ ಶಿರಿ ಚುಕ್ತಾಂ, ಕವಿತೆಚ್ಯಾ ತ್ರಾಣಾಕ್ ವಿಜ್ಮಿತ್ ಪಾವ್ತಾಂ. ಹೆ ಕವಿತೆಂತ್, ಎಕಾ ಧರ್ಮಾಂತ್ ಉಬ್ಜೊಂಕ್ ಸಾಧ್ ಆಸ್ಚೆ ಕಪಟಿ ಪರಿಗತೆಕ್ ಜೊಕ್ಲೆಲೆಂ ಬೊಟ್ ಆಸಾ, ವ್ಯಂಗ್ಯ್ ಆಸಾ, ಬಂಡಾಯ್ ಆಸಾ. ಸಾದ್ಯಾ ಉತ್ರಾಂನಿ ಆನಿ ಬಳ್ವಂತ್ ರೂಪಕಾಂನಿ ಸ್ವಾಧಿಕ್ ಸಾಕ್ರಾಮೆಂತ್, ಪವಿತ್ರ್ ಸಾಕ್ರಾಮೆಂತ್ ಜಾಯ್ಜಯ್ ಆಸ್‌ಲ್ಲೊ ಎವ್ಕರಿಸ್ತ್ ವಿಲಾಯ್ತೆಚೊ ಆನಿ ದಳ್ಬಾರಾಚೊ 'ಸಾಕ್ರಾಮೆಂತ್' ಮ್ಹಣ್ಜೆ 'ಘುರ್‍ತ್’ ಜಾತಾ ತೆಂ ಕವಿ ದಾಕ್ಷೆಣ್ ನಾಸ್ತಾಂ, ಧೈರಾನ್ ಸಾಂಗ್ತಾ.
ಥೊಡೆಪಾವ್ಟಿಂ ಧರ್ಮಾಂತ್ ರೂಪಿತ್ ಜಾಂವ್ಚ್ಯಾ ದ್ವಂದ್ವಾಂಕ್ ಜಾಪಿಚ್ಯಾಂಕಿ ಚಡ್ ಸವಾಲಾಂಚಿ ಶಿಂಕಳ್ ಆಸ್ತಾ. ಆನಿ ತಿಂ ಸವಾಲಾಂ ವಿಚಾರ್‍ಚಿ ತಾಂಕ್ ಸಕ್ಡಾಂಕ್ ಆಸನಾ. ಕವಿ ಎಲ್ಯೆರ್ ತಾಕೊಡೆನ್ ತಿ ಹಾಂಗಾಸರ್ ಪ್ರಕಟ್ ಕೆಲ್ಯಾ ಸಬಾರ್ ದ್ವಂದ್ವ್ ಪೇಶ್ ಕರ್‍ನ್. ಕವಿತಾ ಸುರು ಜಾತಾಚ್ ಏಕ್ ಮಾರ್‌ಮಿಕ್ ದ್ವಂದ್ವ್ ಉಜಾರ್ ಕರುನ್ ಪಯ್ಲ್ಯಾ ಕಡ್ವ್ಯಾಂತ್: ಗಾಂವ್ಚ್ಯಾ ವಾಟಾಂನಿ ಬೆಣ್ಸಿ ಬಿಯಾಂನಿ ಇರಯ್ಲಲೊ ರಂಗ್ ಆನಿ ಮನ್ಶಾ ಜಿವಾಂನಿ ವ್ಹಾರಯ್ಲಲಿಂ ರಗ್ತಾಂ! ನೈಸರ್‌ಗಿಕ್ ಸೊಬಾಯೆಂತೀ ಇರೊನ್ ಗೆಲ್ಲಿ ಮನ್ಶಾ ಜಿಣ್ಯೆಚಿ ಧಾರುಣತಾ. ಆನಿ ಹಿ ಧಾರುಣತಾ ಪಾಚಾರ್‍ಚಾ ಗಾಂವ್ಚ್ಯಾ ಅಶೀರ್ ವಾಟಾಂನಿ ವಿಲಾಯ್ತೆ ಕಾರಾಚಿಂ ರೊದಾಂ! ಜೆಂಜ್ರೊನ್ ಗೆಲ್ಲ್ಯಾ ಗಾಂವಾರ್‌ಗೀ, ಗಾಂವ್ಚ್ಯಾ ಮನ್ಶಾ ಜಿವಾರ್‌ಗೀ ವಿಲಾಯ್ತೆಚೊ ದಳ್ಬಾರ್. ಆನಿ ಹೊ ದಳ್ಬಾರ್ ಪ್ರದರ್‍ಶಿತಾ ಕೊಣ್? ಸಾಯ್ಬಾ ಭೊಗೊಸ್! ದಳ್ಬಾರ್ ಮಸ್ತುನ್ ಲ್ಹಾನ್‌ಪಣ್, ದುಬ್ಳಿಕಾಯ್ ವೆಂಗ್‌ಲ್ಲ್ಯಾ ಕ್ರಿಸ್ತಾಚೊ ಸ್ವಾಧಿಕ್ ಸಾಕ್ರಾಮೆಂತ್! ಆಪ್ಲೆಸ್ತಕಿಂ, ಸ್ವಾಧಿಕ್ ಸಾಕ್ರಾಮೆಂತ್ ಖಂಯ್ ದಳ್ಬಾರ್ ಪರ್‍ಗಟ್ತಾ? ತೊ ಕೊಣ್ ಪವಿತ್ರ್ ಮನ್ಶಾಂಚ್ಯಾ ಹಾತಾಂತ್ ಸ್ವಾಧಿಕ್ ಜಾಂವ್ನ್ ಉರೊಂಕ್ ನಾ!
ಸ್ವಾಧಿಕ್ ಸಾಕ್ರಾಮೆಂತ್ ಘೆವ್ನ್ ಪವಿತ್ರ್ ಮನಿಸ್ ಖಂಯ್‌ಗೀ ಭಾಯ್ರ್ ಸರ್‍ಲಾ. ತೊ ದರ್‍ವಡ್ತಾ. ಆನಿ ಹ್ಯಾ ದರ್‍ವಡಾನ್ ತೊ ಕಾರಾರ್ ಸುಶೆಗಾತ್ ವೆತಾಸ್ತಾನಾ ತಾಕಾ ಗಾಂವ್ಚ್ಯಾ ಹಾಲ್-ಹವಾಲಾಚೆಂ ಖಂಯ್ ಪಡೊನ್ ಗೆಲಾಂ!. ವಾಟೆ ದೆಗೆಂಚ್ಯಾ ಪಾಪ್, ಧಾರಾಳ್ ಭುಕೆಚ್ಯಾ, ಕರಾಳ್ ಬಾಳಾಂಕ್, ಕರುಣಾಯೆಚೊ ಹಾಸೊ ಸಯ್ತ್ ದೀಂವ್ಕ್ ತಾಕಾ ಪುಟ್ವನಾ! ಕವಿತೆಚಿ ಸೊಬಾಯ್ ಪಳೆಯಾ: 'ನಿರಾಳ್ ಪೊಟಾಚೆಂ ಮ್ಹೆಳೆಂ ಕರುಂಕ್ ಬಸ್‌ಲ್ಲ್ಯಾ ಧಾರಾಳ್ ಭುಕೆಚ್ಯಾ, ಕರಾಳ್ ಬಾಳಾಂಕ್, ಕರುಣಾಯೆಚೊ ಹಾಸೊ'! ತಾಚಿ ತಯಾರಿ ತಾಣೆ ಕೆಲ್ಯಾ. ವಾಟೆ ದೆಗೆನ್ ಮ್ಹೆಳೆಂ ಕರುಂಕ್ ಬಸ್‌ಲ್ಲ್ಯಾ ಹಾಂಚಿ ಘಾಣ್ ತಾಕಾ ಅದ್ಳಾನಾತ್‌ಲ್ಲೆಬರಿಂ, ಸುಗಂಧಿ ಪರ್‍ಮಳ್ ಆಂಗಾಕ್ ತಾಣೆ ಬರೊ ಲೆಪ್ಲಾ!
ಪರತ್ ಏಕ್ ಪಾವ್ಟಿಂ ಕವಿತೆಚಿ ಅಪುರ್‍ಬಾಯ್ ಪಳೆಯಾ: ವರುಣಾಚೆ ಥಂಡಿ ವಾಯೆಂತ್, ತರುಣ್ ಸುಣಿಂ ಆಂಗ್ ಲಾಗವ್ನ್ ಧಾರುಣಾಯೆನ್ ಸುಕ್ ಭೊಗ್ತಾತ್! ಸಂತಾನ್ ವಾಡಂವ್ಕ್ ಸುಕಾಕ್ ವೆಂಗ್ ಮಾರ್ಚ್ಯಾ ಸುಣ್ಯಾಚೊ ಸಂಗಮ್ ಪೃಕೃತೆಚೆಂ ನೇಮ್ ಜಶೆಂ ಏಕ್ ಕಡೆನ್ ತರ್, ದುಬ್ಳ್ಯಾ ಗತಿಪಾಸ್ಟ್ ಸ್ಥಿತೆಂತ್ ಖಂಯ್ಚ್ಯಾ ಕರ್‍ಮಾಚೆಂ ಸುಕ್‌ಯ್ ಜೊಡುಂಕ್ ಸಕನಾತ್‌ಲ್ಲ್ಯಾ ಲಾಚಾರ್, ಹಾಡ್ಕುಟ್ಯಾ ಬಾಯ್ಲಾಂಚೆಂ ಕಾಳಿಜ್ ಕಡಂವ್ಚೆಂ ಚಿತ್ರಣ್ ಆನ್ಯೆಕ್ ಕಡೆನ್! ಹ್ಯಾ ಲಾಚಾರ್, ಹಾಡ್ಕುಟ್ಯಾ ಬಾಯ್ಲಾಂಕ್ ಏಕ್ ಬಿರ್‍ಮತಿಚೆಂ ಉತರ್ ಸಯ್ತ್ ಉಲಯ್ನಾಸ್ತಾಂ ಪವಿತ್ ಮನಿಸ್ ಸ್ವಾಧಿಕ್ ಸಾಕ್ರಾಮೆಂತ್ ಘೆವ್ನ್ ಬೊಂಗ್ಲ್ಯಾ ತೆವ್ಶಿಂ ವೇಗ್ ಆರಾಯ್ತಾ.
ತಿಕ್ಕೆಂ ಮುಕಾರ್ ಸರ್‍ಕಾರಿ ಬಾಂಯ್ ಕಾಟ್ಯಾರ್, ಸರ್‍ಕಾರಿ ಸೊರ್‍ಯಾಚಿ ನಶಾ ಭೊಗ್ಚೆ ಬೆಕಾರಿ! ತಾಂಚೆಂ ಕಿತೆಂಚ್ ಉರೊಂಕ್ ನಾ ಆತಾಂ. ಜಿವಿತಾಚಿ ಮಿಟಾಕಣ್ ಹೊಗ್ಡಾಯಿಲ್ಲೆ ತೆ! ಹ್ಯಾ ಜಿವಿತಾಚಿ ಮಿಟಾಕಣ್ ಹೊಗ್ಡಾಯಿಲ್ಲ್ಯಾ ಬೆಕಾರಿ ದಾದ್ಲ್ಯಾಂಕ್, ಭುಜ್ವಣೆಚೆಂ ಏಕ್ ಬೆಸಾಂವ್ ಸಯ್ತ್ ದೀನಾಸ್ತಾಂ, ಪವಿತ್ ಮನ್ಶಾಚೊ ಸ್ವಾಧಿಕ್ ಸಾಕ್ರಾಮೆಂತ್ ಬಿಂದಾಸ್ ಕಾರಾರ್ ವೆತಾ. ಪುಣ್ ಇತ್ಲ್ಯಾ ತುರ್‍ತಾನ್ ಆನಿ ಇತ್ಲ್ಯಾ ದಳ್ಬಾರಾನ್ ಸ್ವಾಧಿಕ್ ಸಾಕ್ರಾಮೆಂತ್ ವೆತಾ ತರೀ ಖಂಯ್? ಆತ್ಮಿಕ್ ಭುಕ್ ಥಾಂಬಂವ್ಕ್. ಭೋವ ಬರೆಂ! ಪುಣ್ ಕೊಣಾಚಿ? ಅತ್ಮಿಕ್ ಭುಕ್ ಪಾಶಾಂವಾಂನಿ ಪಿಕ್ಲಲ್ಯಾಂಚಿ, ಮಾಸಾಂ ಪಕ್ವನಾಂನಿ ಮಾಖ್ಲಲ್ಯಾಂಚಿ!! ಅರ್‍ತ್ ನಾತ್‌ಲ್ಲ್ಯಾ ಧಾರ್‍ಮಿಕ್ ವಾವ್ರಾಚೆರ್ ಕವಿತೆಚೊ ಚಾಟಿಯಾಂಚೊ ಪ್ರಹಾರ್!
ಆತಾಂ ಘಡ್ತಾ ಭೋವ್ ವ್ಹಡ್ ಅನ್ವಾರ್! ತಿತ್ಲೆ ಮರ್‍ಜೆನ್, ಬೊಂವ್ತಣಿಚ್ಯಾ ಸಂಸಾರಾಚಿ ಫಿಕಿರೆ ನಾಸ್ತಾಂಚ್, ಸುಗಮ್ ವಾಟ್ ಸಾಗ್ಸಿತೆಲ್ಯಾ ಸಾಕ್ರಾಮೆಂತ್ ತಶೆಂ ಪವಿತ್ ಮನ್ಶಾಕ್ ವ್ಹಾವಂವ್ಚ್ಯಾ ಕಾರಾಕ್ ಅಚಾನಕ್ ರಸ್ತೊ ಉತರ್‍ಚೆಂ ಜಾನ್ವಾರ್ ಆಪ್ಟತಾ! ದಳ್ದಿರ್ ಮನ್ಶಾಂಕ್ ಪಯ್ಸ್ ಕರ್‍ನ್ ವೆಚ್ಯಾ ಕಾರಾಕ್ ಜಾನ್ವಾರ್‌ಚ್ ಆಪ್ಟಾಜೆ ನ್ಹಯ್?? 'ವ್ಹಡ್ ಏಕ್ ಅನ್ವಾರ್' ಕವಿಚೆಂ ವ್ಯಂಗ್ಯ್. ಮೆಲ್ವಿನ್ ರೊಡ್ರಿಗಸಾನ್ ಉಲ್ಲೇಕ್ ಕೆಲ್ಲ್ಯಾ ಪರ್‍ಮಾಣೆ 'ಧರ್ಮ್’ ಮ್ಹಣ್ತಾನಾ ಮಧೆಂ ಮಾರ್‍ಗಾರ್ ಸಯ್ತ್ ವೊಮ್ತೆಂ ನಿದ್ತಲ್ಯಾಂಕ್' ಕವಿಚೊ ಧಾಗ್. ವ್ಹಡ್ ಅವ್ಘಡಾಂತ್ ವಾಜ್ಬಿ ಸಂಗ್ತ್ಯೊಚ್ ಘಡ್ತಾತ್. ಸಾಕ್ರಾಮೆಂತ್ ಘೆತ್ಲಲೊ ವಿಗಾರ್ ರಸ್ತ್ಯಾಕ್ ಉಸಳ್ತಾ ಆನಿ ಪವಿತ್ರ್ ಉಂಡೆ ವಾಟೆ ವಯ್ಲ್ಯಾ ಮ್ಹೆಳ್ಯಾಂನಿ! ಸಾಕ್ರಾಮೆಂತ್ ಘೆತ್ಲಲೊ ತೊ ವಿಗಾರ್ ಆನಿ ತೆ ಪವಿತ್ರ್ ಉಂಡೆ ಮ್ಹಣ್ ದುಬ್ಳ್ಯಾ ಗಾಂವ್ಚೊ ಲಾಚಾರ್ ರಸ್ತೊ ಆನಿ ಬಿರ್‍ಮತ್ ಬಾಳಾಂನಿ ಕರ್‍ಚೆಂ ವಾಟೆ ವಯ್ಲೆಂ ಮ್ಹೆಳೆಂ ಖಂಯ್ ಪಯ್ಸ್ ಉರ್‍ತಾ?
ಆತಾಂ ವಾಸ್ತವ. ತಾಂಚೆಂ ಗಣ್ಣೆಂಚ್ ಕರ್‍ನಾಸ್ತಾಂ ದಳ್ಬಾರಾನ್ ಉಬೊನ್ ಗೆಲ್ಲ್ಯಾ ವಿಗಾರಾಕ್ ತಿಂಚ್ ಹಾಡ್ಕುಟಿ ಬಾಯ್ಲಾಂ ಆನಿ ತೆ ಬೆಕಾರಿ ದಾದ್ಲೆ ರಾಕಣ್ ಭಡ್ವೆ ಜಾವ್ನ್ ಉಬೊನ್ ಯೆತಾತ್. ಹಾಡ್ಕುಟ್ಯಾ ಬಾಯ್ಲಾಂಚೊ ಇರ್‍ಲಲೊ ಕಾಪ್ಡಾಂಚೊ ತೀರ್ ಆನಿ ಬೆಕಾರಿ ದಾದ್ಲ್ಯಾಂಚೆ ಬೆಕಾರ್ ಖಾಂದೆ, ಧಾರ್‍ಮಿಕ್ ಮನ್ಶಾಕ್ ತಾರಣ್ ಜಾತಾತ್! ವಿಂಚುನ್ ಕಾಡ್ಲೆಲ್ಯಾ ಬೊಂಗ್ಲ್ಯಾಗಾರಾಚಿ ಅತ್ಮಿಕ್ ಭುಕ್ ಥಾಂಬಂವ್ಕ್ ತುರ್‍ತಾನ್ ವೆಚ್ಯಾ ಸುಗಂದಿ ಪರ್‍ಮಳ್ ಲೆಪ್‌ಲ್ಲ್ಯಾ ಧಾರ್‍ಮಿಕ್ ಮನ್ಶಾಕ್, ಹಾಡ್ಕುಟಿಂ, ಬೆಕಾರ್ ಒಟ್ಟಾರೆ, ಘಾಣುಡ್ಡಿಂಚ್ ಸಸಾಯ್ ಜಾತಾತ್. ಆನಿ ಶಿಂಪ್ಲೆಲ್ಯಾ ಪವಿತ್ರ್ ಉಂಡ್ಯಾಚೆ ಕಿತೆಂ ಉರ್‍ಲೆಂ? ಕವಿತೆಚಿ ಅಪುರ್‍ಬಾಯೆಚಿ ಸಂಪ್ಣಿ: ಪವಿತ್ರ್ ಉಂಡೆ ಭುಕೆಲ್ಲ್ಯಾ ಬಾಳಾಂಚ್ಯಾ ಪೊಟಾಂನಿ ಜಿರೊನ್ ವೆತಾತ್. ಭುಕೆಲ್ಲ್ಯಾ, ನಿರ್‍ಗತಿಕಾಂ ಆನಿ ದಳ್ದಿರ್‍ಯಾಂ ಖಾತಿರ್ 'ದೇವ್ ಮನಿಸ್' ಜಾಲ್ಲ್ಯಾ ಜೆಜುಚೆ ಸಾಂಕೇತಿಕ್ (ಸಾಕ್ರಾಮೆಂತ್) ಉಂಡೆ ಹ್ಯಾ ವ್ಹಡ್ ಅನ್ವಾರಾಂತ್ ತೆ ಪಾವೊ ಜಾಲ್ಲ್ಯಾಂಕ್‌ಚ್ ಪಾವ್ತಾತ್ ಮ್ಹಣ್ಚೆಂಗೀ?
-ಮ್ಯಾಕ್ಸಿಮ್ ಲೋಬೊ
ಮೊತಿಯಾಂಚಿಂ ಮೊಲಾಂ:
ಚೊವ್ದಾ: ಬಿಝಿ ಮನ್ಶಾಂಚೆಂ ಡಿಸ್‌ಕನೆಕ್ಟಡ್ ಜಿವಿತ್ (ರಾಜಯ್ ಪವಾರ್)
ತೆರಾ: ಕಾಲ್ಚೆಂ ಪೊಶೆವ್ನ್ ಆಯ್ಚೆಂ ಜಿವಿತ್ ಹೊಗ್ಡಾಂವ್ಚೆ ಮನೀಸ್ (ಜೆಸ್ ಪೆರ್ನಾಂಡಿಸ್)
ಬಾರಾ: ಸಾಂಪಾಕ್ ಹುತೊ, ಅನಾಥ್ ರಿತೊ - ಕಸಲಿ ವಿಟಂಬಣಾ? (ಭಕ್ತ ಕಾಞಂಗಾಡ್)
ಇಕ್ರಾ: ಜೆಮೆನಾಸ್ತಾಂ ಜಾಗಿಂ ಉರ್‍ಚಿಂ ಉತ್ರಾಂ (ಶರತ್‍ಚಂದ್ರ ಶೆಣೈ)
ಧಾ: ಸುವರ್ಣ ಗಾಡ್ ಹಿಚೆ ಕವಿತೆಂತ್ಲಿಂ ಮೊತಿಯಾಂ
ನೋವ್: ವಾರ್‍ಯಾಚೆಂ ಆವ್ಕ್ ಸಂಪ್ತಾನಾ, ಕವಿಚೊ ಸ್ವಾಸ್ ತುಟ್ತಾ (ವಿಲ್ಸನ್ ಕಟೀಲ್)
ಆಟ್: ಎಡ್ಡಿ ಸಿಕೇರಿಚ್ಯಾ ‘ಮ್ಹಾಕಾ ಸೊಧ್ತಾಂ ಹಾಂವ್’ ಕವಿತೆಂತ್ಲಿಂ ಮೊತಿಯಾಂ
ಸಾತ್: ‘ಹಾತಾಕ್ ಮ್ಹೆಳೆಂ ತರ್ ತೊಂಡಾಕ್ ಕೆಳೆಂ’ ಪಾಚಾರ್‍ಚಿ ಅರುಣಾ ರಾವಾಚಿ ಕವಿತಾ
ಸ: ಮಿಸ್ತಿಕಾತೆಚ್ಯಾ ಅನ್ಭೋಗಾಂತ್ ನ್ಹಾಣಂವ್ಚೊ ‘ಪ್ರಕೃತಿಚೊ ಪಾಸ್’ (ಮೆಲ್ವಿನ್ ರೊಡ್ರಿಗಸ್)
ಪಾಂಚ್: ಜಿಣ್ಯೆನ್ ಮ್ಹಾಕಾ ಸಗ್ಳೆಂ ದಿಲೆಂ (ರ. ವಿ. ಪಂಡಿತ್)
ಚ್ಯಾರ್: ಗ್ವಾದಲೂಪಾಚಿ ಕವಿತಾ - ದೇವ್ ಖಂಯ್ ಆಸಾ?
ತೀನ್: ಒತ್ತಾಯ್ ಕೋರ್‍ನಾಕ್ಕಾ ಮಾಕ್ಕಾ - ಸುಧೀರ್ ಕೊಡಕಣೀ
ದೋನ್: ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ (ಪ್ರಕಾಶ್ ಪಡ್ಗಾಂವ್ಕಾರ್)
ಏಕ್: ಜಾಯೊ ಜುಯೊ (ಮನೋಹರ್ ಸರ್ದೇಸಾಯಿ)
ಮ್ಯಾಕ್ಸಿಮ್ ಲೋಬೊಚಿಂ ಲೇಖನಾಂ:
ಕೊಂಕ್ಣಿ ಕಾವ್ಯಾಚ್ಯಾ ಪಕ್ವನಾ ಸಂಗಿಂ ಅಮೃತ್ ಚಾಕ್ತಾನಾ!
ಘಟ್ ಧರಾ.. ! - ಮ್ಯಾಕ್ಸಿಮ್ ಲೋಬೊ ಸ್ಪೇಯ್ನಾ ಥಾವ್ನ್ ಬರಯ್ತಾ
ವಾಸ್ತವಿಕತೆಚ್ಯಾ ವಿಪರ್‍ಯಾಸಾನ್ ಆನಿ ವಿರೋಧಾಭಾಸಾಂತ್ ಜಿಣ್ಯೆ ಶೆವೊಟ್ ಪಾಚಾರ್‍ಚ್ಯೊ ಕವಿತಾ
ಮ್ಯಾಕ್ಸಿಮ್ ಲೋಬೊಚ್ಯೊ ಕವಿತಾ:
ಭರ್ವಶ್ಯಾ ಕಿಟಾಳ್
ಸೊಧ್ನಾಂ
ಡಣಾ ಡಣಾ
ದೊರೆ
ಹಾಂವ್ ಜಾತಾನಾ