ಮೆಲ್ವಿನ್ ರೊಡ್ರಿಗಸಾಚ್ಯಾ ‘ಹೆ ರೆಂವೆನ್’ ಕವಿತೆಚೆರ್ ಎಚ್ಚೆಮ್ ಪೆರ್ನಾಳಾಚಿ ಖೊಡ್
ಕಾಳಾಕ್ ಆನಿ ಕಾವ್ಯಾಕ್ ಬೋವ್ ಲಾಗ್ಶಿಲೊ ಬಾಂದ್ ಆನಿ ಸಂಬಂದ್. ಏಕ್ ಬರಿ ಕವಿತಾ ಕಾಳಾ ಸಾಂಗಾತಾ ಚಲಯಿಲ್ಲ್ಯಾ ಸಂವಾದಾ ಖಾತಿರ್ ಕಾಳಾತೀತ್ ಜಾತಾ ಮಾತ್ ನ್ಹಯ್, ಎಕಾ ಠರಾವಿಕ್ ಕಾಳಾಚ್ಯಾ ಲೊಕಾಜಿಣ್ಯೆಚೆ ಉತ್ರೊಣೆಚಿ ಗೊವಾಯ್ ಜಾವ್ನ್ ಉರ‍್ತಾ. ಜಶೆಂ ಹರ್ ಗೊವಾಯೆಂತ್ ಏಕ್ ಅಸ್ಪಶ್ಟ್ ಕಾಣಿ ಆಸ್ತಾ ತಶೆಂ ಎಕೆ ಕವಿತೆಂತೀ ಕಾಳಾಚೆ ಉತ್ರೊಣೆಚಿ ಅಸ್ಪಶ್ಟ್ ಕಾಣಿ ಆಸ್ತಾ.
ಆಪ್ಲ್ಯಾ ‘ಪ್ರಕೃತಿಚೊ ಪಾಸ್’ ಕವಿತಾಜಮ್ಯಾಕ್ ಆಯ್ಲೆವಾರ್ ಸಾಹಿತ್ಯ ಅಕಾಡೆಮಿಚೊ ಪುರಸ್ಕಾರ್ ಜೋಡ್ನ್ ಘೆತಲ್ಲೊ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಚಿ, ‘ವಾಟ್’ , ಸಂಗ್ರಹಾಂತ್ಲಿ ‘ಹ್ಯೆ ರೆಂವೆನ್’ ಅಸಲ್ಯಾ ಅಪ್ರೂಪ್ ಕಾಲೆತಿಚಿ ಕವಿತಾ. ಕಾವ್ಯಾ ತಂತ್ರಾಚೆ ದಿಶ್ಟಿನ್ ಪಳೆಯ್ಲ್ಯಾರ್, ಹೆ ಕವಿತೆಂತ್ ವಯ್ಲ್ಯಾಬಾರ್ ವಿಶೇಸ್ ಸಂಕೀರ್ಣತಾ ಕಾಂಯ್ ದಿಸುನ್ ಯೇನಾ. ಸಾದಿಂ ಉತ್ರಾಂ ಆನಿ ಸಾದೊ ಅಲಂಕಾರ್.
ಹೆ ಕವಿತೆಚಿ ವಿಶೇಷತಾ ಮ್ಹಳ್ಯಾರ್, ಆಜೀಕ್ ಚಡುಣೆಂ ಬಾರಾ ವರ್ಸಾಂ ಆದಿಂ, ಮ್ಹಣ್ಜೆ 2oooವ್ಯಾ ವರ್ಸಾ ಬರಯಿಲ್ಯಾ ಹೆ ಕವಿತೆನ್, ವಿಸಾವ್ಯಾ ಶೆಕ್ಡ್ಯಾಚ್ಯಾ ನಿಮಾಣ್ಯಾ ಥೊಡ್ಯಾ ವರ್ಸಾಂನಿ, ಕೆನರಾಚ್ಯಾ ಲೊಕಾಜಿವಿತಾಚೆರ್ ಖಾಡಿಯೆಚ್ಯಾ ಗಾಂವಾನ್ ಆನಿ ಖಾಡಿಯೆಚ್ಯಾ ಗಾಂವ್ಚ್ಯಾ ದುಡ್ವಾನ್ ಘಾಲ್ಲೊ ಪ್ರಭಾವ್ ಆನಿ ಹ್ಯಾ ಪ್ರಭಾವಾಕ್ ಲಾಗೊನ್ ಎಕಾ ಸಮುದಾಯಾಚ್ಯಾ ಲೊಕಾನ್ ಭೊಗ್‌ಲ್ಲೆ ಬಾಂದ್ಪಾಸ್ ಮಾರ್ಮಿಕ್ ಥರಾನ್ ಧರ್ನ್ ದವರ್ಲ್ಯಾತ್.
ಹೆ ಕವಿತೆಚ್ಯಾ ಪಯ್ಲ್ಯಾಚ್ ಕಡ್ವ್ಯಾಂತ್ ಕವಿ ಮ್ಹಣ್ಟಾ : ಹ್ಯೆ ರೆಂವೆನ್ ಸ್ವಾಸ್ ದಿಲಾ / ಗಾಂವ್ಚ್ಯಾ ಮರ್ಚ್ಯಾ ಬೊಡಾಂ / ಹ್ಯೆ ರೆಂವೆನ್ ಮಾಸ್ ದಿಲಾಂ / ಜಾಯ್ತ್ಯಾ ದುಬ್ಳ್ಯಾ ಹಾಡಾಂ - ಮುಕಾರುನ್ ಕವಿ ಮ್ಹಣ್ಟಾ : ಹ್ಯೆ ಭುಂಯ್ಚ್ಯಾ ಆಂಗಾಂತ್ ಮುಂಗಾ / ತೆಲಾ ಝರಿ ವಾಳ್ಟಾತ್ / ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್ / ಗಾಂವಾಂತ್ ಗುಲೊಬ್ ಫುಲ್ತಾತ್.
ರೆಂವೆಚ್ಯಾ ಗಾಂವ್ಚ್ಯಾ ತೆಲಾ ಬಾಂಯ್ತ್ ಘಾಮ್ ಪೀಳ್ನ್ ಥೆಂಬೆ ಪುಂಜಾವ್ನ್ ಧಾಡ್‌ಲ್ಲ್ಯಾನ್, ಗಾಂವ್ ಮ್ಹಣ್ಚ್ಯಾ ಗಾಂವಾಂತ್, ಮಾತ್ಯೆಕ್ ಶೆಳ್ ಮೆಳೊನ್ ತಿ ಫಳಾಧೀಕ್ ಜಾವ್ನ್ ಝಾಡಾಂ ವಾಡೊನ್ ಗುಲೊಬ್ ಫುಲ್ಲ್ಯಾತ್ ಆನಿ ಅಶೆಂ ಗುಲೊಬ್ ಪುಲ್ಲೆಲ್ಯಾನ್ ಮರ್ಣಾ ಥಾವ್ನ್ ಜಿವಿತಾಕ್ ಆನಿ ಪಿಡೆ ಥಾವ್ನ್ ಭಲಾಯ್ಕೆಕ್ ಜಿವಿತಾಚಿ ಉತ್ರೊಣ್ ಜಾಲ್ಯಾ ಮ್ಹಣ್ ಕವಿ ಒಪ್ತಾ.
ಪುಣ್ ಅಶೆಂ ಒಪ್ಚ್ಯಾ ಪಾಟ್ಲ್ಯಾನ್ ಕಿತೆಂಗೀ ಹೊಗ್ಡಾಯಿಲ್ಲ್ಯಾಚಿ ದೂಕ್ ಕವಿಕ್ ಧೊಸ್ತಾ. ದೆಕುನ್ ತೊ ಮ್ಹಣ್ಟಾ : ಇತ್ಲೆಂಯ್ ಅಸೊನ್ ಹ್ಯಾಯಿ ಗಾಂವ್ಚ್ಯಾ / ಮಾತ್ಯಾ ಶಿರಾಪ್ ಭೆಜ್ಲಾ / ದೆಕುನ್ ಮಿಸ್ತಾ ಹರ್ಯೆಕ್ ಮನಿಸ್ / ಭಾಯ್ರ್ ಭಿತರ್ ಶಿಜ್ಲಾ.
ಆನಿ ಹಾಂಗಾ ಥಾವ್ನ್ ಸುರು ಜಾತಾ, ನಿರ್ಭಾಗ್‌ಪಣಾಚಿ, ಕಾಳಿಜ್ ಕಡಂವ್ಚಿ - ಬಾಂದ್ಪಾಸಾಂಚಿ ಕಾಣಿ. ಆನಿ ಹೆ ಕಾಣಿಯೆಂತ್ ಆಪ್ಲ್ಯಾ ನೆಂಟ್ಯಾ ಭುರ್ಗ್ಯಾಂಕ್ ಆನಿ ಭರ್ತಾರಾಕ್ ಪಾಟಿಂ ಗಾಂವಾಂತ್ ಸಾಂಡುನ್ ಯೇವ್ನ್, ಹಾಂಗಾ ಆರ್ಬಿ ಭುರ್ಗ್ಯಾಂಕ್ ರುಲಾಂವ್ ಶಿಜವ್ನ್ ಖಾವಂವ್ಚಿ ಆವಯ್, ಗಾಂವಾಂತ್ ಪಾಲಂವ್ ಉಬತ್ ಕೊಣ್ಣಾ ಮ್ಹಣ್ ಚಿಂತುನ್ ವಿರಾರ್ ಜಾಂವ್ಚೊ , ಪೋರ್‌ಚ್ ಕಾಜಾರ್ ಜಾವ್ನ್ ತರ್ನೆ ಹೊಕ್ಲೆಕ್ ಗಾಂವಾಂತ್ ಸಾಂಡುನ್ ಆಯಿಲ್ಲೊ ತರ್ನೊ ಹೊರೆತ್, ಭುರ್ಗ್ಯಾಂಕ್ ಆನಿ ಬಾಯ್ಲೆಕ್ ಗಾಂವಾಂತ್ ಸಾಂಡುನ್ ಯೇವ್ನ್ ಹಾಂಗಾ ತೊ ಸಂತೊಸ್ ಸೊರ್‍ಯಾಂತ್ ಸೊಧ್ಚೊ ಬಾಪಯ್ ಆನಿ ಜಿಬೆರ್ ಗಾಂವ್ಚಿ ಭಾಸ್ ಆಮ್ಶೆವ್ನ್ ಖರ್ಶೆಂವ್ಚಿ ಲೊಕಾ ಸಂಸ್ಕೃತಿ - ಸಗ್ಲೆ ಎಕೆಕ್ ಕಿರ್ದಾರ್ ಕಶೆಂ ಹಾಜರ್ ಜಾತಾತ್.
ಕವಿತೆಚ್ಯಾ ಶಿಖರಾರ್ ಕವಿ ಮ್ಹಣ್ಟಾ : ಹ್ಯೆ ರೆಂವೆನ್ ಸ್ವಾಸ್ ದಿಲಾ / ದಿತಾಂ ಗಳ್ಯಾ ಪಾಸ್ ಘಾಲಾ / ಹ್ಯೆ ರೆಂವೆನ್ ಮಾಸ್ ದಿಲಾಂ / ದಿತಾಂ ಕಾಳ್ಜಾ ಘಾಸ್ ಘಾಲಾ / ಹ್ಯೆ ಭುಂಯ್ಚ್ಯಾ ಆಂಗಾಂತ್‌ಮುಂಗಾ / ತೆಲಾಝರಿ ವ್ಹಾಳ್ತಾತ್ / ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್ / ಸದಾಂಚ್ ಕಾಂಟೆ ತೊಪ್ತಾತ್ .
ಹಾಂಗಾ ಗುಮಾನಾಂತ್ ಘೆಜೆ ಜಾಲ್ಲಿ ಗಜಾಲ್ ಮ್ಹಳ್ಯಾರ್ - ಹೆ ಕಾಂಟೆ ಕೊಣಾಕ್ ತೊಪ್ತಾತ್? ಹೆ ರೆಂವೆನ್ ಕೊಣಾಚ್ಯಾ ಗಳ್ಯಾಕ್ ಪಾಸ್ ಘಾಲಾ? ಆನಿ ಹೆ ರೆಂವೆನ್ ಕೊಣಾಚ್ಯಾ ಕಾಳ್ಜಾ ಕ್ ಘಾಸ್ ಘಾಲಾ?
ಹಿ ಸಗ್ಳಿ ಕವಿತಾ ಆಮ್ಚೆ ಮುಕಾರ್ ಉಭಿ ಜಾತಾ ಖಾಡಿಯೆಚ್ಯಾ ಗಾಂವ್ಚೊ
Plot ಘೆವ್ನ್. ಹೆ ಕವಿತೆಚಿ ಕಿರ್ದಾರ್ ಸಗ್ಳೆ ಖಾಡಿಯೆಚ್ಯಾ ಗಾಂವಾಂಕ್ ಘೊಳೊಂಕ್ ಗೆಲ್ಲೆ ಗಾಂವ್ಕಾರ್. ತಿ ಆರ್ಬಿ ಬಾಳಾಂಕ್ ರುಲಾಂವ್ ಶಿಜವ್ನ್ ಖಾವಯ್ತಾನಾ ಆಪ್ಲ್ಯಾ ಭರ್ತಾರಾಕ್ ಆನಿ ಬಾಳಾಂಕ್ ಯಾದ್ ಕರುನ್ ಖಿನ್ನ್ ಜಾಂವ್ಚಿ ಆವಯ್, ತೊ ಗಾಂವಾಂತ್ ಅಪ್ಲ್ಯಾ ತರ್ನೆ ಹೊಕ್ಲೆಚೊ ಪಾಲಂವ್ ಉಬತ್ ಕೊಣ್ಣಾ ಮ್ಹಣ್ ದುಬಾವಾನಚ್ ದೆಧೆಸ್ಪೊರ್ ಜಾಂವ್ಚೊ ತರ್ನೊ ಹೊರೆತ್, ಬಾಯ್ಲೆ ಭುರ್ಗ್ಯಾಂ ಖಾತಿರ್ ಘೊಳೊಂಕ್ ಗೆಲ್ಲೆಕಡೆ ಸೊರ್‍ಯಾಂತ್ ಸಂತೊಸ್ ಸೊಧ್ಚೊ ಬಾಪುಯ್, ಆನಿ ಖರ್ಶೆಂವ್ಚೆ ಸಂಸ್ಕೃತಿಚೆ ಕಾಳ್ಜಾಕುಡ್ಕೆ - ಹೆ ಸಗ್ಳೆ ಕೊಣಾಚೆ ಪ್ರತಿನಿಧಿ? ಆನಿ ಆಜ್ ಚಡುಣೆಂ ಬಾರಾ ವರ್ಸಾಂ ಉಪ್ರಾಂತ್ ತಾಂಚಿ ಉತ್ರೊಣ್ ಖಂಯ್ ಯೇವ್ನ್ ಪಾವ್ಲ್ಯಾ? ಆನಿ ಕಿತ್ಲ್ಯಾರ್ ರಾವ್ಲ್ಯಾ ?
ಆಜ್ ಪರಿಸ್ಥಿತಿ ಖಂಡಿತ್ ಬದಲ್ಲ್ಯಾ. ಥೊಡ್ಯಾ ವರ್ಸಾಂದಿ ಭರ್ತಾರ್ ಇಲ್ಲೊ ಅಸ್ಕತ್ ಪಡ್ಲೊ ತರ್ ಆಪುಣ್ ಖಾಡ್ಯೆಚ್ಯಾ ಗಾಂವಾಂಕ್ ವಚೊನ್ ಆಯಾಚೆಂ ಕಾಮ್ ಕರ್ನ್ ತರೀ ಭರ್ತಾರ್ ಬಾಳಾಂಕ್ ಪೊಸ್ತಾಂ ಆನಿ ಕುಟ್ಮಾವೊಡ್ತಾಂತ್ ಗುಲೊಬ್ ಫುಲಯ್ತಾಂ ಮ್ಹಣ್ಚ್ಯಾ ಸ್ಫಿರಿತಾಚ್ಯೊ ಬಾಯ್ಲೊ ಉಣೆ ಜಾಲ್ಯಾತ್. ಕಾಜಾರಾ ಉಪ್ರಾಂತ್ ಗಲ್ಪಾಕ್ ಆಪವ್ನ್ ವ್ಹರುಂಕ್ ತಾಂಕ್ ಆಸ್ಲ್ಯಾರ್ ಮಾತ್ ಕಾಜಾರ್ ಜಾತಾಂ ಮ್ಹಣ್ ಕಂಡೀಶನ್ ಘಾಲ್ಚಿಂ ಕಾಪಡ್ ನ್ಹೆಸೊಂಕ್ ಕಳಿತ್ ನಾತ್ಲಿಂ ಚೆಡ್ವಾಂ ಚಡ್ಲ್ಯಾಂತ್, ಗಾಂವಾಂತ್ಲ್ಯಾ ಬಾಯ್ಲೆ ಭುರ್ಗ್ಯಾಂಕ್ ಮ್ಹಯ್ನ್ಯಾಕ್ ಇತ್ಲೆಚ್ ಮ್ಹಣ್ ಪಯ್ಶೆ ಧಾಡ್ನ್ ರೆಂವೆಚ್ಯಾ ಗಾಂವಾಂತ್ ಸಮಾನಾಂತರ್ ಸಂತೊಸ್ ಭೊಗ್ಚೆ ಬಾಪಯ್ ಸಯ್ತ್ ಆಸಾತ್. ಆಜ್, ರುಲಾಂವಾಚಿ, ಪಾಲ್ವಾಂಚಿಂ ಆನಿ ಗಳ್ಸರಿಚಿ ಪರಿಭಾಶಾಚ್ ಬದಲ್ಲ್ಯಾ.
ಇತ್ಲೆ ಸರ್ವ್ ಬದ್ಲಾವಣ್ಯೊ ಜಾತಾನಾ ಸಂಸ್ಕೃತಿ ತಿ ಕಶಿ ಪಾಟಿಂ ರಾವ್ತಲಿ ? ಸಂಸ್ಕೃತಿಯ್ ತಿಚ್ಯಾ ನಾಂವಾನ್ ಸಂಘಟನಾಂ ಬಾಂದುನ್ ರೆಂವೆಚ್ಯಾ ಗಾಂವಾಂಕ್ ವಚೊನ್ ಬರೆಂಚ್ ಕಲೆಕ್ಶನ್ ಕರ್ನ್ ಯೆತಾ ಆನಿ ಹಾಂಗಾ ಗಾಂವಾಂತ್ ಕೊಂಕ್ರಿಟಿಚ್ಯಾ ಗುಲೊಬಾಚಿಂ ವೊಡ್ತಾಂಚ್ ಉಬಾರ್ತಾ.
ಹಿಂ ದೋನ್ ರುಪಾಂ ದೊಳ್ಯಾಂ ಸಮೊರ್ ದವರ್ನ್ ಪಳೆಯ್ಲ್ಯಾರ್ - ಕವಿ ಮೆಲ್ವಿನಾಚಿ ಕವಿತಾ ಹಿ, ಏಕ್ ಕಾಳಾ ಕಡೆ ಸಂವಾದ್ ಕರ್ಪಿ ಕವಿತಾ ಜಾತಾ. ಕಿತ್ಯಾಕ್ ಮ್ಹಳ್ಯಾರ್ ಆಯ್ಚ್ಯಾ ಪರಿಸರಾಂತ್ ಹಿ ಕವಿತಾ ವಾಚ್ತಾನಾ ಬದಲ್ಲೆಲಿಂ ರುಪಾಂ ಆಪ್ಶಿಂಚ್ ಸಮೊರ್ ಯೇವ್ನ್ ರಾವೊನ್ ಉಲೊಂಕ್ ಲಾಗ್ತಾತ್.