ಮೊತಿಯಾಂಚಿಂ ಮೊಲಾಂ: ತಿತೀನ್ ವೇಳ್ ಆನಿ ಸಂಬಂಧಾಂಚೆ ತೀನ್ ತಿರ್‍ಕುಟ್
ಘಡಿಯಾಳ್ ಕಾಂಯ್ ವರ್‍ಸಾಂ ಆದಿಂ ಘರಾಂನಿ ಬಾರಿಚ್ ಗರ್ಜೆಚಿ ವಸ್ತ್. ಸುಮಾರ್ ವೀಸ್ ವರ್‍ಸಾಂ ಅದಿಂ ಗೊಂಯಾಂ ಥಾವ್ನ್ ಫಾ. ಜೊಸ್ಸಿನ್ ಮ್ಹಾಕಾ ಗಿಫ್ಟ್ ಜಾವ್ನ್ ದಿಲ್ಲೆಂ ಘಡಿಯಾಳ್ ಜೊಗಾಸಾಣೆನ್ ರಜೆರ್ ಘರಾ ಹಾಡ್ನ್ ಆಮ್ಚೆ ಮಾತ್ಯೆಚೆ ವೊಣದಿರ್ ಖಿಳಾಯ್ತಾನಾ ಮ್ಹಜ್ಯಾ ಅಭಿಮಾನಾಕ್ ಪಾಕಾಂ ಪುಟಲ್ಲಿಂ! ನಿಮಾಣೆ ತರ್‌ಯ್ ಆಮ್ಗೆರ್‌ಯ್ ಸೊಬಿತ್ ಘಡಿಯಾಳ್ ಆಯಿಲ್ಲೆಂ!!
ಗ್ರೇಸ್ತಾಂಗೆರ್ ವೆಳಾಚಿ ಗರ್ಜ್ ತಿರ್‍ಸುಂಚ್ಯಾ ಸಾಂಗಾತಾ ಘಡಿಯಾಳ್ ಸೊಭಾಯೆಚೊ, ದವ್ಲತೆಚೊ ಸಂಕೇತ್ ಜಾವ್ನಾಸ್‌ಲ್ಲೆ ದೀಸ್ ತೆ. ತೆದ್ನಾಂ ಗಿಫ್ಟ್ ದಿಂವ್ಚಿ ವಸ್ತ್ ಜಾವ್ನ್ ಘಡಿಯಾಳ್, ವೊಚ್, ಟಾಯ್ಮಪೀಸಾನ್ ಕಿತ್ಲ್ಯಾ ಕಾಳ್ಜಾಂಚಿಂ ಭೊಗ್ಣಾಂ ಆಶಾರ್ ಪಾಶಾರ್ ಕೆಲ್ಲಿಂ ನಾಂತ್!! ಮೊಬಾಯ್ಲ್ ಆಯ್ಲ್ಯಾ ಉಪ್ರಾಂತ್ ಘಡಿಯಾಳಾಂಚೊ ತಶೆಂ ವೊಚಾಂಚೊ ಮಹತ್ವ್ ಪಯ್ಲೆಂಚ್ಯಾ ತಿತ್ಲೊ ಉರೊಂಕ್ ನಾ. ಪುಣ್ ಕಾಂಯ್ ಘಡಿಯಾಳಾಂ ಆಜೂನ್‌ಯ್ ಘರಾಚ್ಯಾ ವಿವಿಧ್ ಕುಡಾಂನಿ ದಿಷ್ಟಿಕ್ ಪಡ್ತಾತ್. ಪುಣ್ ತಾಂಚೊ ವೇಳ್ ಏಕ್‌ಚ್ ಆಸಾ ತೆಂ ಖಚಿತ್ ಸಾಂಗೊಂಕ್ ಜಾಯ್ನಾ. ಆನಿ ಹೆರ್ ಥೊಡಿಂ ಘಡಿಯಾಳಾಂ ಕಾಂಯ್ ಬೆಟ್ರೆಚೆ ಧಾವೆಕ್ ಖರ್‍ಶೆವ್ನ್ ಬಂಧಚ್ ಪಡ್ಲ್ಯಾಂತ್ ಕೊಣ್ಣಾ! ಅಸಲೊ ಏಕ್ ಚಿಲ್ಲರ್ ವಿಷಯ್ ವಿಂಚುನ್ ಏಕ್ ಮಹತ್ವಾಚಿ ಗಜಾಲ್ ಕವಿ ಗುರು ಬಾಳಿಗಾನ್ ಕವಿತಾ ಫೆಸ್ತ್ - 2012 ವೆಳಾರ್ ಪೇಶ್ ಕರ್‍ತಾನಾ ಹಾಂವ್ ವಿಜ್ಮಿತ್ ಪಾವ್‌ಲ್ಲೊಂ ಆನಿ ಹೆ ಕವಿತೆಚೊ ರೊಕ್ಡೊಚ್ ಫ್ಯಾನ್ ಜಾಲ್ಲೊಂ!
ತೀನ್ ಜನಾಂಗಾಂಚೆ ತಿತೀನ್ ವೇಳ್ ತಶೆಂ ತಾಂಚ್ಯಾ ಸಂಬಂಧಾಂಚೆ ತೀನ್ ತಿರ್‍ಕುಟ್ ಹಾಂಗಾ ಸಾದರ್ ಜಾಲ್ಯಾತ್! ಎಕೆ ರಿತಿನ್ ಕುಟ್ಮಾಚೆಂ ತಶೆಂ ಮನ್ಶಾ ಜಿಣ್ಯೆಚೆ ಸಬಾರ್ ವಿಷಯ್ ಹಾಂಗಾ ಕವಿನ್ ಪ್ರಸ್ತುತ್ ಕೆಲ್ಯಾತ್. ಹ್ಯಾ ಘರಾಂತ್ ಆಸ್ಚಿಂ ಚ್ಯಾರ್ ಕುಡಾಂ ಆನಿ ತಾಂತ್ಲಿಂ ಚ್ಯಾರ್ ಘಡಿಯಾಳಾಂ! ಏಕ್, ಪಾಂಚ್ ಮಿನಿಟಾಂ ಮುಕಾರ್ ತರ್ ದುಸ್ರೆಂ, ಮಾತ್ಶೆಂ ತೀನ್ ಮಿನಿಟಾಂ ಮುಕಾರ್. ಆನಿ ಹೆರ್ ದೋನ್ ಬಂಧಚ್ ಪಡ್ಲ್ಯಾಂತ್. ವೆಳಾಕಾಳಾಚೆ ಗಡ್ದೆಂತ್ ತಾಂಚೆಂ ಇಂಜಿನ್ ಥಾಂಬ್ಲಾಂ ಜಾಯ್ಜಾಯ್. ಪುಣ್ ತಾಂಚಿ ಎಸ್ತೆಟಿಕ್ ಸೊಭಾಯ್ ಆಜೂನ್ ಮಾಜ್ವೊಂಕ್ ನಾ! ದೆಕುನ್ ಆಜೂನ್ ತಿಂ ಥಂಯಿಂಚ್ ಆಸಾತ್. ಹಿಂ ಸರ್‍ವ್ ಘಡಿಯಾಳಾಂ ಕಾಂಯ್ ಹ್ಯಾ ಕುಟ್ಮಾಚ್ಯಾ ತೀನ್ ಜನಾಂಗಾಂಚಿಂ ರೂಪಕಾಂ? ದೋನ್ ಜನಾಂಗಾಂ ಸದಾಂ ವೇಗ್ ಆರಾವ್ನ್ ಮುಕಾರ್ ಮುಕಾರ್ ವೆಚ್ಯಾ ಸ್ಪರ್ಧ್ಯಾಂತ್ ಆಸಾತ್. ಇಲ್ಲೆಂ ಮುಕಾರ್, ಇಲ್ಲೆಂ ಪಾಟಿಂ. ಬ್ಯಾಟರಿ ಸರ್‍ನ್ ಬಂಧ್ ಪಡಲ್ಲಿಂ ಘಡಿಯಾಳಾಂ ತಿಸ್ರ್ಯಾ ಜನಾಂಗಾಚೆಂ ಪ್ರತೀಕ್. ತಾಂಚೆಂ ಜಿವಿತ್ ಥಾಂಬ್ಲಾಂ. ಚಡಾವತ್ ತಶೆಂಚ್. ಹ್ಯಾ ತಿಸ್ರ್ಯಾ ಜನರೇಶನಾಚೆಂ ಸಗ್ಳೆಂ ಮುಗ್ದಾಲಾಂ. ತಾಂಕಾಂ ಬೆಟ್ರಿ ಘಾಲ್ನ್ ಫಾಯ್ದೊ ಕಿತೆಂ?
ಆತಾಂ ಘರ್ಚ್ಯಾ ಘಡಿಯಾಳಾಂಚಿ ಗಜಾಲ್ ಅಶಿ ದೆಕುನ್ ಹ್ಯಾ ತರ್‍ನ್ಯಾ ಘೊವ್ ಬಾಯ್ಲೆನ್ ವೇಳ್ ಚೊಂವ್ಚೊ ಮೊಬಾಯ್ಲಾಂತ್! ಮೊಬಾಯ್ಲ್ ಆಧುನಿಕತೆಚೆಂ ಪ್ರತೀಕ್ ಮಾತ್ರ್ ನ್ಹಯ್ ಅನಿವಾರ್‍ಯತೆಚೆಂ ಅತಿರೇಕ್! ಮೊಬಾಯ್ಲ್ ನಾಸ್ತಾಂ ಜಿಯೆಂವ್ಕ್ ಸಾಧ್ಯ್ ಆಸಾ? ಪುಣ್ ಆಧುನಿಕತೆಚೆ ಸವ್ಲತೆ ಸಂಗಿಂ ತಾಂಚೆ ಸಾಯ್ಡ್ ಇಫೆಕ್ಟ್ಸ್ ಖಂಯ್ ಪಯ್ಸ್ ಕರ್‍ಯೆತ್? ಘಡಿಯಾಳ್ ಮಾತ್ಶೆಂ ಮುಕಾರ್ ಆಸಾ ದೆಕುನ್ ಗಜಾಲ್ ಬ್ಯಾಟರಿಚಿಗೀ, ಚಾವಿಯೆಚಿಗೀ ಮ್ಹಣ್ ಮಾನುನ್ ಘೆವ್ಯೆತ್. ಮೊಬಾಯ್ಲಾಂತ್ ತೆಂ ಸಾಧ್ಯ್ ನಾ! ಆಧುನಿಕ್ ಟೆಕ್ನೊಲೊಜಿ ಖಂಯ್ ಫೇಲ್ ಜಾತಾ? ದೆಕುನ್ ದೊನ್ ಮೊಬಾಯ್ಲಾಂನಿ ವೇಳ್ ಮಾತ್ಸೊ ಪಾಟಿಂ-ಮುಕಾರ್ ಆಸಾ ಮ್ಹಣ್ತಾನಾ, ಹಾಂಕಾಂ ಘೊವ್-ಬಾಯ್ಲೆಕ್ ಎಕಾಮೆಕಾ ಮೆಳೊಂಕ್‌ಚ್ ಹರ್‍ಕತ್ ಜಾತಾ!! ದೊಗಾಂಯ್ಚೊ ವೇಳ್ ಸಾರ್‍ಕೊಚ್. ಪುಣ್ ತಿಂ ಆಮ್ಕ್ಯಾಚ್ ವೆಳಾರ್ ಮೆಳೊಂಕ್ ಸಕನಾಂತ್. ಎಕಾಚ್ ಜನರೇಶನಾ ಮಧ್ಲ್ಯಾ ಸಂಬಂದಾಂತ್ ಪುಟಾಪುಟ್!!!
ಹಾಂಚಿ ಆವಯ್ ಬಾಪಯ್ ಮಾತ್ಶಿ ವೆಗ್ಳಿ. ತಾಂಚೊ ವೇಳ್ ಬಂಧ್ ಪಡ್ಲಾ ಮ್ಹಣ್ ಹಾಂವೆಂ ಚಿಂತ್ಲೆಂ ತೆಂ ಚೂಕ್ ಜಾಲೆಂ! ತೀಂಯ್ ಕಾಂಯ್ ಆಧುನಿಕತೆಕ್ ಅಪ್ವಾದ್ ನ್ಹಯ್! ಹಾಚ್ಯಾ ಬಾಪಾಯ್ಚೊ ವೇಳ್ ಕಂಪ್ಯೂಟರಾಂತ್ ಆಸಾ. ತೊ ಚಿಕ್ಕೆ ಮೊಡರ್‍ನ್ ಜಾಲಾ. ಬರೆಂಚ್ ಮ್ಹಣ್ಯಾಂ, ವೆಳಾಸಂಗಿಂ ಬದ್ಲೊಂಕ್ ಶಿಕಜಾಯ್ ನ್ಹಯ್ ಆಮಿ? ಹಾಚೆ ಆವಯ್ಕ್ ಕಂಪ್ಯೂಟರ್ ಖಂಯ್ ಮೆಳ್ತಾ? ತಿ ಟೀವಿಂತ್‌ಚ್ ಮೊನ್ಯಾಂನಿ ತಿಚೊ ಸಂಸಾರ್ ಸೊದ್ತಾ. ಉಪ್ರಾಂತ್ ತಾಂಕಾಂ ದೊಗಾಂಯ್ಕಿ ಸಾಂಜೆಚೊ ವೇಳ್ ಖಾಸ್ಗಿ ವೇಳ್. ಕಿತ್ಯಾಕ್, ಥಂಯ್ ತಾಂಚೆಂ ವರ್‍ಸಾಂ ಥಾವ್ನ್ ಧಾಂವ್ಚೆಂ ಸೀರಿಯಲ್ ಆಸಾ. ತಾಂಚ್ಯಾ ಪುತಾಕ್ ಆನಿ ಸುನೆಕ್ ತೆದ್ನಾಂಚ್ ಪಾವ್ಟ್! ಪುಣ್ ಕರ್‍ಚೆಂ ಕಿತೆಂ? ಸೀರಿಯಲಾ ಧರ್‍ಮಾನ್ ತಾಂಕಾಂಯ್ ಮೆಳೊಂಕ್ ಸಾಧ್ಯ್ ನಾ!
ಸದ್ದ್ಯಾಕ್ ತಿಂ ಲಾಗಿಂಚ್ ರಾವ್ತಾತ್ ದೆಕುನ್ ತಾಂಚೊ ನೆಣ್ತೊ ಪೂತ್ ತಾಂಚ್ಯಾ ಮದೆಂ ಸಾಂಕೊವ್ ಕಸೊ. ತಾಚೊ ಸಂಸಾರ್ ಎಕ್ದಮ್ ವೆಗ್ಳೊ. ತ್ಯಾ ಸಂಸಾರಾಚಿ, ಕವಿಕ್ ಬಿಲ್ಕುಲ್ ಫಿಕಿರ್ ನಾ. ಪುಣ್ ತೊ ವೆಗ್ಳೊ ತೆಂ ಆಮ್ಕಾಂ ಸಾಫ್ ಕಳಿತ್ ಆಸಾ. ತೊ ಸ್ಕೂಲ್, ಪ್ಲೇ ಹೋಮ್, after school activity, ಟ್ಯಾಬ್ಲೆಟ್ ಆನಿ ಚೊಟಾ ಭೀಮ್ ಮದೆಂ ವೆಸ್ತ್ ಆಸಾ ಜಾಯ್ಜಾಯ್. ದೆಕುನ್ ತೊಯ್ ಖೂಬ್ ಬಿಝಿ ಆಸಾ. ತಾಂಣೆ ಯೆಂವ್ಚೊ ಆನಿ ವೆಚೊ ಟಾಯ್ಮ್ ಸಗ್ಳೊ ಫಿಕ್ಸ್ ಆಸಾ. ತಶೆಂ ಘಡಿಯಾಳಾಂ, ಮೊಬಾಯ್ಲಾಂ, ಕಂಪ್ಯೂಟರ್, ಟಿವಿ ವಚೊಂ ಪೆಲ್ಯಾನ್. ಆತಾತಾಂ ತಾಕಾಚ್ ಪಳೆವ್ನ್ ಹಾಂಣಿ ಹಾಂಚೊ ವೇಳ್ ಸಮ್ಜೊಂಚೊ ಆನಿ ಪಾಪ್, ವೆಗ್ಳ್ಯಾನ್ ತಾಕಾಚ್ ಭೆಷ್ಟಾಂವ್ಚೆಂ ತೊ ವೇಳ್ ಪಾಡ್ ಕರ‍್ತಾ ಮ್ಹಣ್. ಇತ್ಲೆಂ ಸಿಸ್ಟಮೆಟಿಕ್ ಥರಾನ್ ತಾಚೆಂ ಪ್ರೋಗ್ರಾಮ್ ಪ್ಲಾನ್ ಕರುನಯ್ ತೊ ಗ್ರ್ಯಾನಿ ಆನಿ ಗ್ರ್ಯಾನ್ ಡ್ಯಾಡಾ ಕಡೆನ್ ವಚೊನ್ ವೇಳ್ ವಿಭಾಡ್ತಾ ಮ್ಹಣ್ ಹಾಂಕಾಂ ಪೊಟಾಜಾಳ್!!!
-ಮ್ಯಾಕ್ಸಿಮ್ ಲೋಬೊ
ಮೊತಿಯಾಂಚಿಂ ಮೊಲಾಂ:
ಆಟ್ರಾ: ಎಂಡ್ರ್ಯೂ ಎಲ್ ಡಿ’ಕುನ್ಹಾಚಿ ಕವಿತೆಚೆಂ ಆಸ್ವಾದನ್
ಸತ್ರಾ: ಅರುಣ್ ಸಾಖರ್‍ದಾಂಡೆಚೆ ಕವಿತೆಚೆಂ ಆಸ್ವಾದನ್
ಸೊಳಾ: ಕಾಶಿನಾಥ್ ಶಾಂಭಾ ಲೊಲಿಯೆಂಕಾರಾಚಿ ಕವಿತಾ
ಪಂದ್ರಾ: ಎಲ್ಯೆರ್ ತಾಕೊಡೆಚ್ಯಾ `ಸ್ವಾಧಿಕ್ ಸಾಕ್ರಾಮೆಂತ್' ಕವಿತೆಚೆಂ ಆಸ್ವಾದನ್
ಚೊವ್ದಾ: ಬಿಝಿ ಮನ್ಶಾಂಚೆಂ ಡಿಸ್‌ಕನೆಕ್ಟಡ್ ಜಿವಿತ್ (ರಾಜಯ್ ಪವಾರ್)
ತೆರಾ: ಕಾಲ್ಚೆಂ ಪೊಶೆವ್ನ್ ಆಯ್ಚೆಂ ಜಿವಿತ್ ಹೊಗ್ಡಾಂವ್ಚೆ ಮನೀಸ್ (ಜೆಸ್ ಪೆರ್ನಾಂಡಿಸ್)
ಬಾರಾ: ಸಾಂಪಾಕ್ ಹುತೊ, ಅನಾಥ್ ರಿತೊ - ಕಸಲಿ ವಿಟಂಬಣಾ? (ಭಕ್ತ ಕಾಞಂಗಾಡ್)
ಇಕ್ರಾ: ಜೆಮೆನಾಸ್ತಾಂ ಜಾಗಿಂ ಉರ್‍ಚಿಂ ಉತ್ರಾಂ (ಶರತ್‍ಚಂದ್ರ ಶೆಣೈ)
ಧಾ: ಸುವರ್ಣ ಗಾಡ್ ಹಿಚೆ ಕವಿತೆಂತ್ಲಿಂ ಮೊತಿಯಾಂ
ನೋವ್: ವಾರ್‍ಯಾಚೆಂ ಆವ್ಕ್ ಸಂಪ್ತಾನಾ, ಕವಿಚೊ ಸ್ವಾಸ್ ತುಟ್ತಾ (ವಿಲ್ಸನ್ ಕಟೀಲ್)
ಆಟ್: ಎಡ್ಡಿ ಸಿಕೇರಿಚ್ಯಾ ‘ಮ್ಹಾಕಾ ಸೊಧ್ತಾಂ ಹಾಂವ್’ ಕವಿತೆಂತ್ಲಿಂ ಮೊತಿಯಾಂ
ಸಾತ್: ‘ಹಾತಾಕ್ ಮ್ಹೆಳೆಂ ತರ್ ತೊಂಡಾಕ್ ಕೆಳೆಂ’ ಪಾಚಾರ್‍ಚಿ ಅರುಣಾ ರಾವಾಚಿ ಕವಿತಾ
ಸ: ಮಿಸ್ತಿಕಾತೆಚ್ಯಾ ಅನ್ಭೋಗಾಂತ್ ನ್ಹಾಣಂವ್ಚೊ ‘ಪ್ರಕೃತಿಚೊ ಪಾಸ್’ (ಮೆಲ್ವಿನ್ ರೊಡ್ರಿಗಸ್)
ಪಾಂಚ್: ಜಿಣ್ಯೆನ್ ಮ್ಹಾಕಾ ಸಗ್ಳೆಂ ದಿಲೆಂ (ರ. ವಿ. ಪಂಡಿತ್)
ಚ್ಯಾರ್: ಗ್ವಾದಲೂಪಾಚಿ ಕವಿತಾ - ದೇವ್ ಖಂಯ್ ಆಸಾ?
ತೀನ್: ಒತ್ತಾಯ್ ಕೋರ್‍ನಾಕ್ಕಾ ಮಾಕ್ಕಾ - ಸುಧೀರ್ ಕೊಡಕಣೀ
ದೋನ್: ಆತಾಂ ಹಾಂವ್ ಹ್ಯಾಚ್ ಕಾಳ್ಖಾಂತ್ ಜಿಯೆತಲೊಂ (ಪ್ರಕಾಶ್ ಪಡ್ಗಾಂವ್ಕಾರ್)
ಏಕ್: ಜಾಯೊ ಜುಯೊ (ಮನೋಹರ್ ಸರ್ದೇಸಾಯಿ)
ಮ್ಯಾಕ್ಸಿಮ್ ಲೋಬೊಚಿಂ ಲೇಖನಾಂ:
ಕೊಂಕ್ಣಿ ಕಾವ್ಯಾಚ್ಯಾ ಪಕ್ವನಾ ಸಂಗಿಂ ಅಮೃತ್ ಚಾಕ್ತಾನಾ!
ಘಟ್ ಧರಾ.. ! - ಮ್ಯಾಕ್ಸಿಮ್ ಲೋಬೊ ಸ್ಪೇಯ್ನಾ ಥಾವ್ನ್ ಬರಯ್ತಾ
ವಾಸ್ತವಿಕತೆಚ್ಯಾ ವಿಪರ್‍ಯಾಸಾನ್ ಆನಿ ವಿರೋಧಾಭಾಸಾಂತ್ ಜಿಣ್ಯೆ ಶೆವೊಟ್ ಪಾಚಾರ್‍ಚ್ಯೊ ಕವಿತಾ
ಮ್ಯಾಕ್ಸಿಮ್ ಲೋಬೊಚ್ಯೊ ಕವಿತಾ:
ಭರ್ವಶ್ಯಾ ಕಿಟಾಳ್
ಸೊಧ್ನಾಂ
ಡಣಾ ಡಣಾ
ದೊರೆ
ಹಾಂವ್ ಜಾತಾನಾ